ភាពជោគជ័យរបស់តារាខេប៉ុបមិនត្រែមតែវាស់ដោយចំណាត់ថ្នាក់លើតារាងចម្រៀងប៉ុណ្ណោះទេ ប៉ុន្តែក្នុងនោះក៏រួមមាននូវការឈ្នះពានរង្វាន់ក្នុងកម្មវិធីតន្រ្តីជាច្រើនដូចជា M Countdown, Inkigayo, Show Champion, Music Bank, The Show and Show! និង Music Core។ ការឈ្នះពានរង្វាន់ពីកម្មវិធីទាំងនេះកាន់តែច្រើនគឺកាន់តែបង្ហាញពីការរីកដុះដាលនៃប្រជាប្រិយភាព ទេពកោសល្យ និងវត្តមានដ៏រឹងមាំនៅក្នុងវិស័យខេប៉ុប។
ស្របពេលនេះ មានតែតារាប៉ុន្មានរូបប៉ុណ្ណោះអាចឈានដល់ដំណាក់កាលមួយដែលពួកគេសុទ្ធតែកាន់ពានរង្វាន់ជាង ១០០ ពានក្នុងដៃក្នុងអាជីពជាតារាខេប៉ុប។ ជាក់ស្ដែងដូចជាតារាខេប៉ុបទាំង ៦ ខាងក្រោមនេះ៖
៦. ក្រុម Girls’ Generation (១០០ ពានរង្វាន់)
បើទោះបីជាមិនមានសកម្មភាពដូចមុន តែក្រុម Girls’ Generation បានបន្សល់ទុកនូវស្នាដៃជាច្រើននៅលើវិស័យខេប៉ុប ហើយស្នាដៃទាំងនោះនៅតែធ្វើឱ្យអ្នកស្ដាប់មានអារម្មណ៍ថាស្រស់ស្រាយដដែល។ ពួកគេគឺក្រុមខេប៉ុបដំបូងគេបង្អស់ដែលកាន់ពានរង្វាន់រហូតដល់ទៅ ១០០ ពានដោយសារសមត្ថភាព ទេពកោសល្យ និងភាពលេចធ្លោ។
៥. IU (១០១ ពានរង្វាន់)
ជាមួយនឹងការជាប់ចំណាត់ថ្នាក់លើកំពូលតារាងជាច្រើន IU បានក្លាយជាសិល្បករ និងអ្នកសម្ដែងមួយរូបដែលលេចធ្លោព្រមទាំងពោរពេញដោយក្ដីស្រឡាញ់ ថែមទាំងអាចឈានដល់ដំណាក់កាលមួយក័គួរឱ្យកត់សម្គាល់ផងដែរ។ ថ្មីៗនេះនាងក៏ត្រូវបានគេបញ្ចូលជាសមាជិកក្លឹបសិល្បករដែលឈ្នះពានចំនួន ១០០ ក្នុងកម្មវិធីតន្ដ្រីជាច្រើន។ លើសពីនេះ នាងក៏ជាសិល្បករខេប៉ុបទោលតែមួយគត់ដែលអាចកាន់រហូតដល់ទៅ ១០១ ពានរង្វាន់។
៤. ក្រុម BIGBANG (១០២ ពានរង្វាន់)
ចាប់តាំងពីការបង្ហាញខ្លួនជាលើកដំបូងរហូតដល់បទ “Still Life” ក្រុមតារាចម្រៀងបុរស BIGBANG តែងតែធ្វើបានល្អដោយទទួលបានជ័យលាភីសម្រាប់គ្រប់ការវិលត្រលប់មកវិញរបស់ពួកគេជានិច្ច។ ទោះបីជាបច្ចុប្បន្ននេះ ក្រុម BIGBANG មិនទាន់មានការប្រកាសព័ត៌មានណាមួយទាក់ទងនឹងការវិលត្រលប់មកវិញ ប៉ុន្តែពួកគេនៅតែអាចរក្សាពានរង្វាន់ក្នុងដៃរហូតដល់ទៅ ១០២ ពានឯណោះ។
៣. ក្រុម TWICE (១២១ ពានរង្វាន់)
TWICE ត្រូវបានរាប់បញ្ចូលជាក្រុមខេប៉ុបមួយដែលអង្រួនចំណាប់អារម្មណ៍របស់អ្នកគាំទ្រចាប់តាំងពីពេលបង្ហាញខ្លួនលើកដំបូងរបស់ពួកគេ ហើយក៏បានក្លាយជាធនធានមួយដ៏មានតម្លៃរបស់ប្រទេសកូរ៉េខាងត្បូង។ ការគាំទ្រដ៏ពេញនិយមរបស់បទ “Cheer Up,” “TT” និង “Fancy” បានជំរុញឱ្យពួកគេឈានដល់ចំណុចកំពូលដែលមិនធ្លាប់មានពីមុនមកដោយពេលនេះពួកគេមានពានរហូតដល់ទៅ ១២១ ពានរង្វាន់ក្នុងដៃទៅហើយ។
២. ក្រុម EXO (១២២ ពានរង្វាន់)
EXO គឺជាក្រុមតារាចម្រៀងបុរសដំបូងគេដែលបានឈ្នះពានរង្វាន់ពីកម្មវិធីតន្រ្តីនានាចំនួន ១០០ ពាន។ ចាប់តាំងពីការបង្ហាញខ្លួនលើកដំបូងរបស់ពួកគេជាមួយបទ “Growl” បានធ្វើឱ្យប្រជាប្រិយភាពរបស់ពួកគេហាក់ទទួលបានសន្ទុះនៃការគាំទ្រខ្លាំងឡើងគួរឱ្យកត់សម្គាល់។ ភាពជោគជ័យដែលគ្មានដែនកំណត់របស់ពួកគេបាននាំឱ្យក្រុមចម្រៀងបុរសមួយនេះកាន់ពានរហូតដល់ ១២២ ពានរង្វាន់។
១. ក្រុម BTS (១៦៤ ពានរង្វាន់)
BTS ជាក្រុមតារាចម្រៀងបុរសលំដាប់សកលលោកដែលបានបំបែកកំណត់ត្រាជាច្រើនជាមួយនឹងបទល្បីៗដូចជា “Boy With Luv” “Dynamite” “Butter” និងជាច្រើនទៀត។ ជាមួយនឹងការតស៊ូជម្នះឧបសគ្គ និងភាពលំបាកតាំងពីជាក្មេងប្រុសសាមញ្ញ ៧ នាក់រហូតដល់ក្លាយជាក្រុមខេប៉ុបដែលពិភពលោកទទួលស្គាល់ទាំងសមត្ថភាព ភាពវៃឆ្លាត ទេពកោសល្យ រួមជាមួយស្នាដៃផ្សេងៗលើសពីការផលិតត្រឹមបទចម្រៀងបានធ្វើឱ្យក្រុមចម្រៀងមួយនេះក្ដោបក្ដាប់ពានរង្វាន់ដល់ទៅ ១៦៤ ពានឯណោះ៕