Idol Royalty ដែលជាវេទិកាដែលវាយតម្លៃគុណភាពតន្ត្រី សិល្បករ ភាពយន្ត និងព័ត៌មានកម្សាន្តនានា ថ្មីៗនេះបានបង្ហាញឈ្មោះបុគ្គលមានឥទ្ធិពលបំផុតលើលោកចំនួន ១០ នាក់ ហើយក្នុងបញ្ជីនេះរួមមានសមាជិក ៣ នាក់មកពីក្រុមចម្រៀងបុរស BTS រួមមាន RM, V, និង JUNGKOOK ។
សិល្បករទាំងបីរូបត្រូវបានគេស្គាល់សម្រាប់បទចម្រៀងបែបបំផុសគំនិតរបស់ពួកគេ ដែលនាំអ្នកស្តាប់ឱ្យវិភាគ និងបកស្រាយទិដ្ឋភាពផ្សេងៗបានយ៉ាងស៊ីជម្រៅតាមរយៈបទភ្លេងរបស់ពួកគេ។ ខណៈដែលសមាជិកទាំង ៧ នាក់របស់ BTS បានបញ្ចេញចម្រៀងទាំងបែបក្រុម និងបទចម្រៀងទោលរបស់ពួកគេម្តងម្នាក់ៗ រាល់ស្នាដៃរបស់ពួកគេទទួលបានការគាំទ្រខ្លាំងជាអន្តរជាតិរហូតអាចជាប់នៅកំពូលតារាងតន្ត្រីទូទាំងពិភពលោក។
ជាក់ស្ដែងដូចជា RM ឬ Kim Namjoon គឺបានចេញអាល់ប៊ុមទោលដំបូងរបស់ខ្លួន “Indigo” នៅថ្ងៃទី ២ ខែធ្នូ ឆ្នាំ ២០២២ ដែលមានបទចម្រៀងចំនួន ១០ បទ និងមានសិល្បករល្បីៗជាច្រើនចូលរួម featuring ធ្វើឱ្យអាល់ប៊ុមនេះបានជាប់ចំណាត់ថ្នាក់លេខ ១ នៅលើតារាង Billboard’s World Album យូរបំផុតសម្រាប់សិល្បករទោល K-POP ហើយ RM ក៏ក្លាយជាសិល្បករ K-POP ដំបូងគេដែលជាប់ក្នុង Top 40 នៅលើតារាង Billboard 200 រយៈពេលបីសប្តាហ៍។
ទស្សនាវដ្តី TIME បានដាក់ឈ្មោះ “Indigo” ថាជាអាល់ប៊ុម K-POP ល្អបំផុតប្រចាំឆ្នាំ ២០២២ ហើយ Billboard បានដាក់ឈ្មោះវាថាជាអាល់ប៊ុម K-POP ល្អបំផុតប្រចាំឆ្នាំ ២០២២ដូចគ្នា ខណៈអាល់ប៊ុមនេះបានឈានដល់ចំណាត់ថ្នាក់លេខ ១ នៅលើតារាង iTunes ជាង ៦៧ ប្រទេសជុំវិញពិភពលោកក្រោយចេញផ្សាយ។
ទន្ទឹមនឹងនេះដែរ V ឬ Kim Taehyung បានចេញអាល់ប៊ុមទោលដំបូងរបស់ខ្លួនគឺ “Layover” នៅថ្ងៃទី ៨ ខែកញ្ញា ឆ្នាំ ២០២៣ ដែលមានសរុប ៦ បទ និងវីដេអូចម្រៀង ៥ ។ V បានក្លាយជាសិល្បករទោលដំបូងគេក្នុងប្រវត្តិសាស្ត្រ ដែលអាល់ប៊ុមអាចលក់ដាច់ ២,១ លានឈុតនៅលើគេហទំព័រ Hanteo ក្នុងរយៈពេលត្រឹមមួយសប្តាហ៍ដំបូងនៃការចេញផ្សាយ ។
“Layover” ក៏បានក្លាយជាអាល់ប៊ុមទោលដោយសិល្បករ K-pop ដែលមានអ្នកចូលស្ដាប់ដល់ ៥០០ លានដងលឿនបំផុតផងដែរនៅលើ Spotify និងអាចជាប់ក្នុង Melon Hall of Fame បន្ទាប់ពីមានការស្ដាប់លើសពី ២ លាននៅថ្ងៃដំបូង។
ចំណែកឯ JUNGKOOK ឬ Jeon Jungkook ដែលជា maknae របស់ BTS បានបង្ហាញខ្លួនជាសិល្បករទោលជាមួយនឹងអាល់ប៊ុម “GOLDEN” ដែលត្រូវបានចេញផ្សាយនៅថ្ងៃទី ៣ ខែវិច្ឆិកា ឆ្នាំ ២០២៣។ ចាប់តាំងពីពេលនោះមករូបគេក៏គ្រងតំណែងលើតារាងពេញនិយមរបស់ Spotify មករហូត ហើយបានក្លាយជាសិល្បករទោល K-POP ដំបូងគេដែលវីដេអូចម្រៀងពីអាល់ប៊ុមទោលដំបូងមានការចូលទស្សនាលើស ១០០ លាន views នៅលើ Youtube ដល់ទៅ ៣ បទ ហើយបទចម្រៀង “Standing Next to You” បានក្លាយជាបទចម្រៀងពីសិល្បករទោល K-POP ដែលមានអ្នកចូលស្ដាប់ដល់ ៣០០ លានដងលឿនបំផុតនៅលើ Spotify។
លើសពីនេះ Jungkook ក៏បានក្លាយជាតារាប្រុសកូរ៉េខាងត្បូងដំបូងគេដែលបានឈ្នះពានរង្វាន់សិល្បករប្រុសប្រចាំឆ្នាំពីកម្មវិធី VMA របស់អាមេរិកផងដែរ Seven របស់គាត់ផងដែរ។មិនទាន់អស់នោះទេ រូបគេថែមទាំងក្លាយជាសិល្បករទោល K-POP ដែលមានការចូលស្ដាប់ចម្រៀងច្រើនបំផុតនៅលើ Spotify ក្នុងឆ្នាំ ២០២៣ ខណៈបទ “Seven” បានក្លាយជាបទចម្រៀងដែលមានការចាក់ស្ដាប់លើស ១ ពាន់លានដងលឿនបំផុតនៅលើ Spotify ។
យ៉ាងណាក៏ដោយ ពេលនេះ RM, V និង JUNGKOOK ពេលនេះបានចូលបំពេញកាតព្វកិច្ចយោធាតាមច្បាប់ និងត្រូវបានរំពឹងថានឹងបញ្ចប់កាតព្វកិច្ចនេះនៅឆ្នាំ ២០២៥ ៕