ដូចប្រិយមិត្តបានជ្រាបស្រាប់ហើយថា ថ្មីៗនេះអ្នកប្រើប្រាស់បណ្តាញសង្គមកំពុងផ្ទុះការវែកញែករឿងម្ចាស់ទំព័រហ្វេសប៊ុកឈ្មោះ Think with PingAnn គិតជាមួយប៉េងអាន បានយក ស្គរសម្ភោរ ដែលជាឧបករណ៍ភ្លេងបុរាណខ្មែរ ទៅធ្វើជាតុដាក់កែវទឹកក្នុងកិច្ចសន្ទនាមួយជាមួយ ឌីជេ ណាណា។

ក្រោយកើតមានការប្រត្តិកម្មពីមហាជនអ្នកប្រើប្រាស់បណ្តាញសង្គមជាហូរហែ ទំព័រហ្វេសប៊ុកផ្លូវការ បុរាណាចារ្យ ដែលនិយមចែករំលែកចំណេះដឹងផ្សេងៗពាក់ព័ន្ធវប្បធម៌ អរិយធម៌ខ្មែរ បានលើកឡើថា «រឿងសម្ភោរ នេះឃើញកើតឡើងច្រើនដងដែរ ដោយសារតែបងប្អូនប្រជាជនខ្មែរយើងគាត់អត់បានយល់ អត់បានស្គាល់ពីឧបករណ៍នេះ»។
ក្នុងសំណេរដ៏វែងអន្លាយនោះ ផេក បុរាណាចារ្យ ក៏បានឱ្យដឹងអត្ថន័យរបស់ ស្គរសម្ភោរ ថា «នៅក្នុងវង់ភ្លេងបុរាណខ្មែរយើង សម្ភារជាឧបករណ៍សំខាន់បំផុតមួយ ដោយដើរតួនាទីជាអ្នកកំណត់ចង្វាក់ពេលចាប់ផ្តើមប្រគំម្ដងៗ។ សម្ភោរ កំណត់អោយចង្វាក់១ជាន់ ២ជាន់ ៣ជាន់ ឬដល់បទនានាទៀត និងជាមេជាបរមគ្រូធំ ក្នុងការសក្ការៈឧទ្ទិសដល់គ្រូធំទាំងឡាយ។ មុននឹងលេងសម្ភោរ អ្នកទះត្រូវតែគោរពបូជាសម្ភោរ ម៉្យាងអ្នកលេងសម្ភោរ ត្រូវតែជាអ្នកមាន ចរិតសមរម្យ ថ្លៃថ្នូរ អង្គុយបត់ជើងត្រឹមត្រូវតាមប្រពៃណីខ្មែរ»។
យ៉ាងណាមិញ ក្រោយបង្កើតកំហុសឆ្គងដោយអចេតនារួចមក ប៉េងអាន ដែលតែងតែផលិតវីដេអូចែករំលែកចំណេះដឹង និងរបៀបថែរក្សាផ្លូវចិត្ត បានចេញមុខមកសុំទោសជាសាធារណៈចំពោះកំហុសអចេតនាមួយនេះ និងបានទទួលយករាល់ការអប់រំក្នុងន័យស្ថាបនា និងបានសម្រេចលុបវីដេអូដែលបង្ហោះនោះថែមទៀតផង។ ការសម្រេចចចិត្តលុបវីដេអូនោះ បានធ្វើឲ្យអ្នកលេងហ្វេសប៊ុកខ្លះ សោកស្ដាយ ព្រោះវីដេអូដែលសម្ភាសន៍ ឌីជេ ណាណា ពិតជាមានអត្ថប្រយោជន៍មួយចំនួនដល់អ្នកមើល៕


























Account
Security
Favourite Content