នៅថ្ងៃទី១៣ ខែវិច្ឆិកានេះ បណ្ដាញ Streaming Disney+ បានប្រកាសពីគម្រោងចេញផ្សាយរឿងភាគកូរ៉េធំៗជាច្រើនសម្រាប់ឆ្នាំ២០២៦ ខាងមុខនេះ ដែលសុទ្ធសឹងតែមានការចូលរួមសម្ដែងពីតារាជួរមុខ។



១. រឿងភាគ “Perfect Crown” សម្តែងដោយ IU និង Byun Woo Seok ត្រូវបានបញ្ជាក់ចេញផ្សាយទូទាំងពិភពលោកនៅលើ Disney+ នៅខែមេសា ឆ្នាំ ២០២៦។
រឿងភាគនេះនិយាយពីរឿងរ៉ាវកើតឡើងក្នុងរបបរាជានិយមអាស្រ័យរដ្ឋធម្មនុញ្ញប្រឌិតនៅក្នុងប្រទេសកូរ៉េ ដោយផ្ដោតលើស្នេហារបស់ Song Hee-joo ជាអ្នកស្នងមរតកដែលមានអ្វីៗគ្រប់យ៉ាង ប៉ុន្តែគ្រាន់តែជាសាមញ្ញជន និង Lee Ahn ជាព្រះអង្គម្ចាស់ដែលគ្មានអ្វីសោះ ទោះបីជាមានងារជាបុត្ររបស់ស្តេចក៏ដោយ។

២. រឿងភាគ “Goldland” សម្តែងដោយ Park Bo Young, Kim Sung Chul និង Lee Hyun Wook គ្រោងនឹងចាក់ផ្សាយនៅឆមាសទី១ឆ្នាំ ២០២៦។ រឿងនេះនិយាយពី Hee-joo ជានារីវ័យក្មេងម្នាក់ដែលរើសបានដុំមាសគេចពន្ធរបស់ក្រុមទុច្ចរិតដោយចៃដន្យ ស្របពេលក្រុមពាណិជ្ជករ និងយោធាលោភលន់កំពុងប្រកួតប្រជែងគ្នាដណ្ដើមយកដុំមាសនោះ។
ក្នុងរឿងនេះ តារាស្រី Park Bo Young ដើរតួជា Kim Hee-joo ជាមន្ត្រីសន្តិសុខអាកាសយានដ្ឋានអន្តរជាតិ ដែលបានជាប់ពាក់ព័ន្ធនឹងករណីរត់ពន្ធដុំមាសខុសច្បាប់ ហើយព្យាយាមការពារមាសទាំងនោះ ខណៈ Kim Sung Chul ដើរតួជា Jang-wook ជាសមាជិកស្ថាប័នចងការប្រាក់ឈ្មោះ Yuqi ដែលព្យាយាមចូលទៅជួយយកអាសា Hee-joo ដោយដឹងថានាងមានវត្ថុខុសច្បាប់ដែលគេកំពុងស្វែងរក។



៣. រឿងភាគ “The Remarried Empress” ត្រូវបានបញ្ជាក់ចេញផ្សាយនៅឆមាសទីពីរនៃឆ្នាំ ២០២៦ជារឿងភាគមនោសញ្ចេតនាបែប Fantasy ដកស្រង់ពីប្រលោមលោក Webtoon ដ៏ពេញនិយម និយាយពីរឿងរ៉ាវរបស់អធិរាជនីឥតខ្ចោះមួយអង្គនៃចក្រភពខាងកើត ដែលបានចែកផ្លូវជាមួយអធិរាជ បន្ទាប់ពីរកឃើញចេតនារបស់ទ្រង់ក្នុងការតែងតាំងអ្នកម្នាងម្នាក់ជាអធិរាជនី។ តួសម្ដែងក្នុងរឿងនេះរួមមាន៖ Shin Min Ah ដើរតួជា Navier អធិរាជនីនៃចក្រភពខាងកើត, Lee Jong Suk ដើរតួជា Heinry ព្រះអង្គម្ចាស់នៃចក្រភពខាងលិច, Ju JiHoon ដើរតួជា Soviesu អធិរាជដ៏មានអំណាចបំផុតនៃចក្រភពខាងកើត និង Lee Se Young ដើរតួជា Rasta អតីតទាសករដែលប្តេជ្ញាចិត្តក្លាយជាអធិរាជនី។


៤. រឿងភាគ “Portraits of Delusion” សម្តែងដោយ Kim Seon-ho និង Bae Suzy ត្រូវបានបញ្ជាក់ថានឹងចាក់ផ្សាយនៅឆមាសទីពីរនៃឆ្នាំ ២០២៦។
រឿងភាគដែលចំណាយថវិកាផលិតជាង ៤៥ ពាន់លានវ៉ុនមួយនេះ ត្រូវបានកែសម្រួលចេញពីប្រលោមលោក Webtoon “The Mystery of Madame Song” រៀបរាប់ពីរឿងរ៉ាវអាថ៌កំបាំងរបស់ Yoon Yi-ho ដែលជាវិចិត្រករវ័យក្មេងម្នាក់ ដែលត្រូវបានបញ្ជាឱ្យគូររូបរបស់ Song Jung-hwa ជាបិសាចជញ្ជក់ឈាមដ៏ទាក់ទាញ។


៥. រឿងភាគបែបបាញ់ប្រហារ “A Shop for Killers 2″ ត្រូវបានបញ្ជាក់ចេញផ្សាយនៅឆមាសទីពីរនៃឆ្នាំ ២០២៦ នៅលើ Disney+ ដែលនឹងបន្តនិយាយរឿងរ៉ាវនារីម្នាក់ដែលទទួលកេរមរតកជាឃ្លាំងអាវុធពីពូរបស់នាង ហើយក៏ក្លាយជាគោលដៅសម្រាប់ឃាតករ។ រដូវកាលថ្មីនេះនឹងមកជាមួយឈុតឆាក Action កាន់តែច្រើន ដោយមានការវិលត្រលប់ពីតារាល្បីៗក្នុងវគ្គមុនដូចជា Lee Dong Wook, Kim Hye Jun, Jo Han Seon, Geum Hae Na, Lee Tae Young, Kim Min រួមជាមួយសមាជិកថ្មី Hyun Ri, Masaki Okada និង Jung Yun Ha ៕


























Account
Security
Favourite Content