ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
អ្នកជំនាញ និងបុគ្គលពាក់ព័ន្ធឧស្សហកម្មភាពយន្តខ្មែរបានទទួលស្គាល់ថា វិស័យភាពយន្តខ្មែរយើងនាពេលបច្ចុប្បន្នពិតជាងើបឡើងវិញបន្តិចមែន បន្ទាប់ពីយើងឆ្លងកាត់ព្យុះភ្លៀងនៃវិបត្តិជំងឺកូវីដ-១៩។ បើទោះបីជាអត្រាភាពយន្តខ្មែរមិនទាន់ហក់ឡើងខ្ពស់ដូចកាលពីមុន តែក៏នៅមានភាពយន្តខ្មែរជាច្រើនបានអណ្តែតលើតារាងការចាក់បញ្ចាំងរបស់រោងភាពយន្តធំៗជាហូរហែ នៅក្នុងឆ្នាំ ២០២៣ នេះ។ គួរឱ្យកត់សម្គាល់ ក្នុងចំណោមភាពយន្តខ្មែរទាំងនោះ មានភាពយន្តខ្មែរ ៣ រឿង ដែលផ្ទុះការគាំទ្រយ៉ាងភ្លូកទឹកភ្លូកដីលើផ្ទាំងសំពត់សរោងភាពយន្តក្នុងឆ្នាំ ២០២៣ នេះ៖
១. រឿង «កំណើតអរូប» (The Ritual Black NUN) ជាវណ្ណកម្មស្នាដៃផលិតរបស់ផលិតកម្ម Wonder Film Entertainment ៖ ខ្សែភាពយន្ត «កំណើតអរូប» ត្រូវបានចាក់បញ្ចាំងនៅគ្រប់រោងភាពយន្តទូទាំងប្រទេសកម្ពុជាកាលអំឡុងខែមេសា ឆ្នាំ ២០២៣ កន្លងទៅ។ ភាពយន្តរន្ធត់ ព្រឺព្រួចមួយនេះ បានអន្ទង់ចិត្តទស្សនិកជនឱ្យមកទស្សនាយ៉ាងច្រើនអំឡុងពេលនៃការចាក់បញ្ចាំង។
បន្ទាប់ពីជោគជ័យលើទីផ្សារក្នុងស្រុក Wonder Film Entertainment ក៏បានបន្តនាំយករឿង «កំណើតអរូប» ទៅចាក់បញ្ចាំងនៅប្រទេសថៃ និងឡាវ ផងដែរ។ ហើយថ្មីៗនេះផលិតកម្មបានប្រកាសនាំយកខ្សែភាពយន្តខ្នាតធំ «កំណើតអរូប» ទៅចាក់បញ្ចាំងនៅ ១៥ ប្រទេសធំៗក្នុងតំបន់អាស៊ី និងប៉ែកអឺរ៉ុប នៅខែមករា ឆ្នាំ ២០២៤ ខាងមុខ។ ផលិតកម្មភាពយន្តដែលផ្តោតលើគុណភាពជាចម្បងនេះ បានឱ្យដឹងថា ខ្សែភាពយន្តថ្មីរបស់ Wonder Film នឹងកាន់តែអស្ចារ្យបន្ថែមទៀត ទាំងបច្ចេកទេស និងគុណភាពលំដាប់អន្តរជាតិ ដែលនឹងចេញជាផ្លូវការចាប់ពី ពាក់កណ្ដាលឆ្នាំ ២០២៤ ខាងមុខនេះ។
២. រឿង «ប្រុសលក់ខ្លួន» (RENT BOY) ជាវណ្ណកម្មស្នាដៃផលិតរបស់ផលិតកម្ម LD Entertainment ៖ «RENT BOY» ត្រូវផលិតឡើងយ៉ាងសម្រិតសម្រាំង និងយកចិត្តទុកដាក់បំផុតលើគុណភាព បច្ចេកទេស សាច់រឿង និងមានការចូលរួមសម្តែងពីតារាភាពយន្តល្បីៗមកពី ៤ ប្រទេសរួមមាន កម្ពុជា មីយ៉ាន់ម៉ា ថៃ និងវៀតណាម។ «ប្រុសលក់ខ្លួន» ត្រូវចាត់ទុកជាភាពយន្តខ្មែរទី១ ដែលមានអ្នកកក់សំបុត្រទស្សនាតាំងពីរឿងនេះមិនទាន់សម្ពោធផ្លូវការតាមរោងភាពយន្ត និងបន្តលក់ដាច់គ្មានសល់កៅអីតាំងពីថ្ងៃប្រកាសចាក់បញ្ចាំង រហូតដល់ថ្ងៃដែលរឿងនេះទម្លាក់ចេញពីកាលវិភាគចាក់បញ្ចាំង។
លោក លៀក លីដា ចាងហ្វាងផលិតកម្ម LD Entertainment បានប្រាប់ឱ្យដឹងថា ខ្សែភាពយន្តខ្នាតធំ «RENT BOY» រកចំណូលបានជាង ៤០ ម៉ឺនដុល្លារ តែវានៅមិនទាន់អាចបំបែកកំណត់ត្រា Box Office សម្រាប់ភាពយន្តខ្មែរនៅឡើយទេ។ ទោះជាយ៉ាងនេះក្តី ផលិតកម្មមានគម្រោងនាំយករឿងខ្នាតធំនេះទៅចាក់បញ្ចាំងនៅទីផ្សារអន្តរជាតិផងដែ ដោយចាប់ផ្តើមចេញពីប្រទេសក្នុងតំបន់អាស៊ាន។
ដើម្បីពង្រឹងគុណភាពរឿងខ្មែរឱ្យកាន់តែមានគុណភាពស្តង់ដារសម្រាប់ទីផ្សារអន្តរជាតិ LD Entertainment បានវិនិយោគទុន ១ លានដុល្លារសហរដ្ឋអាមេរិក ផលិតខ្សែភាពយន្តជាស៊េរី ចំណងជើង «ប្រវត្តិស្នេហ៍នាងនាថ» ដែលរឿងនេះត្រៀមបញ្ចេញលើទីផ្សារនៅឆ្នាំ ២០២៤ ខាងមុខនេះ។
៣. រឿង «ម៉ែក្រឡាភ្លើង» (The Dark Mother) ជាជាវណ្ណកម្មស្នាដៃផលិតរបស់ផលិតកម្ម Sastra Film ៖ ខ្សែភាពយន្តនិយាយពីជម្រៅចិត្តរវាងម្តាយ និងកូនមួយនេះ ត្រូវបានផលិតកកម្ម សាស្ត្រា ប្រកាសថា ជាភាពយន្តខ្មែរដែលបំបែកកំណត់ត្រាលក់សំបុត្របានច្រើនជាងគេក្នុងរយៈពេល ២ សប្តាហ៍ដំបូងក្នុងឆ្នាំ ២០២៣។ ពេលនេះរឿង «ម៉ែក្រឡាភ្លើង» កំពុងបន្តការចាក់បញ្ចាំងគ្រប់រោងភាពយន្តក្នុងប្រទេសកម្ពុជា ហើយទទួលបានការគាំទ្រយ៉ាងខ្លាំងក្លា។
ខណៈកំពុងច្បាបភាពល្បីល្បាញនៅក្នុងស្រុក ខ្សែភាពយន្ដខ្មែរបំបែកកំណត់ត្រា លក់ក្នុងប្រទេស កំពុងត្រៀមខ្លួនចាក់បញ្ចាំងនៅបណ្តាប្រទេសជាច្រើនផងដែរ ដោយនឹង ផ្ដើមពីប្រទេសថៃ ចាប់ពីថ្ងៃទី ២៩ ខែកុម្ភៈ ឆ្នាំ ២០២៤ តទៅ។ តាមការបង្ហើបពីប្រភពជិតដិតបានឱ្យដឹងថា Sastra Film ក៏នឹងខ្សែភាពយន្តខ្នាតធំថ្មីបន្ទាប់ទៀតត្រៀមបញ្ចេញនៅឆ្នាំ ២០២៤ ខាងមុខនេះ ដោយសាច់រឿង និងមនោសញ្ចេតនាស៊ីជម្រៅមិនចាស់រឿង «ម៉ែក្រឡាភ្លើង» ប៉ុន្មានឡើង៕
Account
Security
Favourite Content