ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
កំហុសផ្នែកហិរញ្ញវត្ថុអាចមានឥទ្ធិពលយ៉ាងខ្លាំងដល់ជីវិតរបស់អ្នក។ បើអ្នកចេះចាយលុយបានល្អ ទោះបីជាអ្នកមិនក្លាយជាអ្នកមានក៏ដោយ ប៉ុន្តែអ្នកនឹងមិនធ្លាក់ខ្លួនក្រឡើយ។ ខាងក្រោមនេះគឺជាមេរៀនផ្នែកហិរញ្ញវត្ថុទាំង ៧ ដែលនឹងផ្លាស់ប្តូរជីវិតអ្នកឲ្យកាន់តែប្រសើរ។
មេរៀនទី១៖ កុំទិញរបស់ដើម្បីទាក់ទាញភ្នែកអ្នកដទៃ
រាល់ពេលដែលអ្នកទិញអ្វីមួយដើម្បីទាក់ទាញអ្នកដទៃ អ្នកនឹងមានលុយកាន់តែតិច។ លើសពីនេះ ការចាយប្រាក់ដើម្បីបង្ហាញឱ្យអ្នកដទៃដឹងថាអ្នកមានប៉ុណ្ណា គឺជាវិធីលឿនបំផុតដែលធ្វើឱ្យអ្នកអស់លុយពីខ្លួន។ វាមិនប្លែកអ្វីនោះទេ បើចង់មានមុខមាត់ក្នុង ប៉ុន្តែសំណួរសួរថា តើអ្នកត្រូវចំណាយប៉ុន្មានដើម្បីទទួលបានជោគជ័យពិតប្រាកដ? ចម្លើយគឺគ្មានទីបញ្ចប់។ ដូច្នេះកុំចំណាយប្រាក់ដើម្បីទាក់ទាញនរណាម្នាក់ ព្រោះការពិតគឺគ្មាននរណាម្នាក់ខ្វល់ពីអ្នកទេ ក្រៅពីធនាគារដែលតម្រូវឱ្យអ្នកបង់បំណុលរាល់ខែ។
មេរៀនទី២៖ សេដ្ឋីពិតគឺចេះសន្សំសំចៃ
មហាសេដ្ឋីក្នុងជីវិតពិតភាគច្រើន ខុសពីអ្វីដែលយើងឃើញតាមទូរទស្សន៍ ឬរឿងភាគ ដែលស្លៀកសំលៀកបំពាក់ថ្លៃៗ នាឡិកាប្រណីត និងរបស់មានតម្លៃផ្សេងៗទៀត។ បើទោះបីជាពួកគេជាច្រើនទទួលបានប្រាក់ចំណូលខ្ពស់ពីអាជីព ឬមុខជំនួញក៏ដោយ ប៉ុន្តែរឿងសំខាន់ដែលធ្វើឲ្យពួកគេក្លាយជាមហាសេដ្ឋីតាំងពីដំបូងនោះគឺការ “សន្សំសំចៃ”។ ពួកគេដឹងពីរបៀបរស់នៅទាបជាងកម្រិតជីវភាពរបស់ខ្លួន ស្លៀកសំលៀកបំពាក់ដែលមិនថ្លៃ ជ្រើសរើសបើកបររថយន្តចាស់ជាជាងដេញស៊េរី។ ការសន្សំសំចៃមិនមែនជាផ្លូវទៅកាន់ជីវិតឡូយឆាយនោះទេ ប៉ុន្តែវាគឺជាមូលដ្ឋានគ្រឹះនៃភាពមានបានយ៉ាងពិតប្រាកដ។
មេរៀនទី៣៖ មិត្តធម្មតា ជីវិតធម្មតា
វានឹងទៅជាយ៉ាងណា បើអ្នករាល់គ្នានៅជុំវិញខ្លួនអ្នកសុទ្ធតែមានទម្លាប់ចាយលុយមិនល្អ? តើអ្នកនឹងដឹងពីរបៀបសន្សំលុយដោយរបៀបណា ប្រសិនបើមនុស្សនៅជុំវិញអ្នកនៅតែចំណាយដោយមិនគិត ហើយជំពាក់បំណុលគេគ្រប់ច្រកល្ហក? តើអ្នកអាចសន្សំលុយដោយរបៀបណា ប្រសិនបើមិត្តភ័ក្តិរបស់អ្នកតែងតែបបួលអ្នកចេញដើររាល់យប់? អ្វីដែលចង់និយាយគឺថា បើអ្នកចង់បានជីវិតបែបណាដែលអ្នកចង់រស់នៅ អ្នកត្រូវហ៊ុំព័ទ្ធខ្លួនឯងដោយមនុស្សបែបនោះ។ មិនមែនមានន័យថាអ្នកគួរបោះបង់ចោលមិត្តរបស់អ្នកនោះទេ គ្រាន់តែព្យាយាមជំរុញខ្លួនអ្នកឱ្យនៅក្បែរមនុស្សដែលមិនចាំបាច់ធ្វើឱ្យជីវិតរបស់អ្នកកាន់តែប្រសើរឡើងក៏បាន ប៉ុន្តែមិនធ្វើឱ្យជីវិតអ្នកកាន់តែយ៉ាប់យ៉ឺននោះគឺគ្រប់គ្រាន់ហើយ។
មេរៀនទី៤៖ គិតពីរឿងរៀបការក៏ត្រូវគិតពីរឿងលុយ
បើអ្នកចង់រៀបការ អ្នកគួរតែគិតឲ្យបានល្អិតល្អន់ជាមុនសិន ព្រោះបើក្នុងចំណោមប្ដីប្រពន្ធមានអ្នកណាម្នាក់ចាយខ្ជះខ្ជាយ នោះពួកគេនឹងមិនអាចក្លាយជាអ្នកមាននោះទេ។ លើសពីនេះ ការមានទម្លាប់ហិរញ្ញវត្ថុខុសគ្នា ក៏ពិបាកនឹងធ្វើឱ្យប្ដីប្រពន្ធរីកចម្រើនរួមគ្នាដែរ។
មេរៀនទី៥៖ ការវិនិយោគប្រកបដោយប្រសិទ្ធភាពត្រូវការពេលវេលា
កុំធ្លាក់ចូលទៅក្នុងអន្ទាក់នៃការវិនិយោគលឿនៗ បានប្រាក់ងាយៗ និងគួរឱ្យរំភើបលើបណ្ដាញសង្គមឱ្យសោះ។ ការវិនិយោគតាមរបៀបដើម និងតាមដំណើរគឺមានប្រសិទ្ធភាពបំផុត ហើយក្នុងពេលតែមួយក៏ជាអ្វីដែលគួរឱ្យធុញបំផុតដែរ។ ប៉ុន្តែកុំភ្លេចថា គ្មានអ្នកណាក្លាយជាអ្នកមានក្នុងពេលមួយយប់នោះទេ។ ពួកគេជាច្រើនអាចចំណាយពេលរាប់ឆ្នាំ ឬរាប់ទសវត្សរ៍។ កុំវិនិយោគតាមអារម្មណ៍ តែត្រូវជ្រើសរើសការវិនិយោគដោយឆ្លាតវៃ។
មេរៀនទី៦៖ ការមានលុយជាប់ខ្លួនគឺជារឿងល្អបំផុត
សុខភាពហិរញ្ញវត្ថុរឹងមាំត្រូវបានសម្រេចដោយការមានសាច់ប្រាក់ល្មមជាប់ខ្លួន។ អ្នកត្រូវមានប្រាក់សន្សំទុកសម្រាប់ពេលមានអាសន្ន មុននឹងសម្រេចចិត្តវិនិយោគអ្វីមួយ។ អ្នកត្រូវការលុយដើម្បីរ៉ាប់រងការព្យាបាលជំងឺ ការជួសជុលរថយន្ត ឬត្រៀមក្នុងករណីប្រសិនបើអ្នកបាត់បង់ការងារ។ កុំចាយវាយច្រើនពេកក្នុងការវិនិយោគរហូតភ្លេចសន្សំប្រាក់ទុក។
មេរៀនទី៧៖ ចំណាយឱ្យបានច្រើនលើអ្វីដែលអ្នកស្រលាញ់
ចំណុចនេះមើលទៅហាក់ដូចជាផ្ទុយទៅនឹងការមានទម្លាប់ហិរញ្ញវត្ថុល្អបន្តិច ប៉ុន្តែការចំណាយច្រើនលើរបស់ដែលអ្នកស្រឡាញ់នោះគឺដើម្បីធ្វើឱ្យអ្នកលែងខ្វល់នឹងរឿងដែលមិនចាំបាច់ក្នុងជីវិតរបស់អ្នក ព្រោះវាមិនសមហេតុផលឡើយដែលអ្នកត្រូវចំណាយប្រាក់ខំរកបានដោយលំបាកទៅលើអ្វីដែលអ្នកមិនចូលចិត្តដោយសារតែវាកំពុងបញ្ចុះតម្លៃ។ ផ្ទុយទៅវិញ ប្រសិនបើអ្នកសុខចិត្តចំណាយលើអ្វីដែលអ្នកពិតជាចង់បាន អ្នកនឹងមិនត្រូវការអ្វីដែលឥតប្រយោជន៍តទៀត ហើយវាក៏ជាជំនួយដ៏ល្អក្នុងការកំណត់អាទិភាពចំណាយរបស់អ្នកផងដែរ ៕
Account
Security
Favourite Content