ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ទីក្រុងហុងកុង និងតូក្យូ គឺជាទីក្រុងអាស៊ីតែពីរគត់ដែលបានជាប់ក្នុងចំណាត់ថ្នាក់ទីក្រុងទាំង ១០ ដែលមានប្រជាជនមានទ្រព្យខ្ពស់រស់នៅច្រើនបំផុតទូទាំងពិភពលោក។
គិតត្រឹមខែមិថុនា ឆ្នាំ២០២៥ ទីក្រុងហុងកុងមានសេដ្ឋីរស់នៅច្រើនបំផុតលំដាប់ទីពីរនៅលើពិភពលោក ដោយមានប្រជាជនចំនួន ១៧ ២១៥ នាក់ មានទ្រព្យសម្បត្តិសុទ្ធច្រើនជាង ៣០ លានដុល្លារអាមេរិកក្នុងម្នាក់ៗ។ តួលេខនេះបានសម្គាល់ការកើនឡើង ១១.៥% ធៀបនឹងឆ្នាំមុន និងកើនឡើង ២២.៩% បើធៀបចាប់ពីដើមឆ្នាំនេះ។ នេះបើយោងតាមរបាយការណ៍ World Ultra Wealth Report 2025 ដោយក្រុមហ៊ុនស៊ើបការណ៍ទ្រព្យសម្បត្តិ Altrata។
របាយការណ៍នេះបានបង្ហាញថា តួលេខអ្នកមានទ្រព្យខ្ពស់មានកំណើនកើនឡើងខ្លាំង ដោយកំណែទម្រង់អចលនទ្រព្យ និងផលចំណេញភាគហ៊ុនដ៏រឹងមាំ ខណៈវិស័យហិរញ្ញវត្ថុត្រូវបានជំរុញដោយការហូរចូលនៃក្រុមហ៊ុនចិនដីគោកដែលស្វែងរកការចុះបញ្ជីនៅលើផ្សារហ៊ុនហុងកុង។ យោងតាមការចុះផ្សាយរបស់ CNBC នៅក្នុងឆមាសទីមួយនៃឆ្នាំ២០២៥ ការវាយតម្លៃ IPO នៅលើទីផ្សារហ៊ុនហុងកុងបានកើនឡើងប្រហែលប្រាំបីដងរហូតដល់ ១៤ពាន់លានដុល្លារ។
ផ្ទុយគ្នាវិញ នៅទីក្រុងតូក្យូ ចំនួនប្រជាជនដែលមានទ្រព្យសម្បត្តិច្រើនបានធ្លាក់ចុះបន្តិចមកត្រឹម ៦៩៤០ នាក់ ខណៈដែលប្រឈមមុខនឹងឧបសគ្គពីអតិផរណាខ្លាំង ភាពមិនប្រាកដប្រជាខាងនយោបាយ សម្ពាធអចលនទ្រព្យ និងការប៉ះពាល់របស់អ្នកនាំចេញដោយសារគោលនយោបាយពាណិជ្ជកម្មរបស់សហរដ្ឋអាមេរិកកាន់តែខ្លាំងឡើង។ យ៉ាងណាមិញ ទីក្រុងនេះនៅតែជាប់ចំណាត់ថ្នាក់ទីប្រាំមួយនៅក្នុងបញ្ជី។
ដោយឡែកទីក្រុង ៨ ទៀតដែលជាប់ចំណាត់ថ្នាក់ Top 10 គឺជាទីក្រុងរបស់សហរដ្ឋអាមេរិកទាំងអស់ ដែលនាំមុខដោយទីក្រុងញូវយ៉ក ដែលមានប្រជាជនដែលមានទ្រព្យសម្បត្តិច្រើនលើសលប់ចំនួន ២១ ៣៨០ នាក់។ ទីក្រុងឡូសអាន់ជឺឡេស សាន់ហ្វ្រាន់ស៊ីស្កូ និងឈីកាហ្គោ បានជាប់ក្នុងចំណាត់ថ្នាក់កំពូលទាំងប្រាំ។ សហរដ្ឋអាមេរិកមិនត្រឹមតែគ្របដណ្ដប់លើបញ្ជីទីក្រុងឈានមុខគេប៉ុណ្ណោះទេ ប៉ុន្តែក៏មានចំនួនប្រជាជនដែលមានទ្រព្យសម្បត្តិច្រើនរហូតដល់ ៣៨% នៃចំនួនអ្នកមានទូទាំងពិភពលោកផងដែរ។
របាយការណ៍នេះបានកត់សម្គាល់ថា មនុស្សប្រហែល ៥១០ ៨១០ នាក់នៅទូទាំងពិភពលោកមានលក្ខណៈសម្បត្តិគ្រប់គ្រាន់ជា “កំពូលអ្នកមាន” ហើយពួកគេបានគ្រប់គ្រងទ្រព្យសម្បត្តិសរុបចំនួន ៥៩.៨ ពាន់ពាន់លានដុល្លារ។
យោងតាមរបាយការណ៍របស់ Business Insider ម៉ាកយីហោប្រណីតៗបានកំណត់គោលដៅក្រុមនេះកាន់តែខ្លាំងឡើង ហើយអ្នកដែលផ្តោតលើអតិថិជនដែលមានទ្រព្យសម្បត្តិច្រើនបំផុតជាទូទៅមានលទ្ធផលល្អជាងក្រុមហ៊ុនដែលផ្ដោតលើទីផ្សារទូទៅ។
ទោះបីជាមានភាពមិនប្រាកដប្រជាផ្នែកសេដ្ឋកិច្ច និងកម្លាំងរំខានផ្សេងទៀតក៏ដោយ Altrata រំពឹងថាចំនួនប្រជាជនមានទ្រព្យស្ដុកស្ដម្ភទូទាំងពិភពលោក និងទ្រព្យសម្បត្តិរួមបញ្ចូលគ្នារបស់ពួកគេនឹងកើនឡើងជាលំដាប់ក្នុងរយៈពេលប្រាំឆ្នាំខាងមុខ។ ក្រុមហ៊ុននេះបានព្យាករណ៍ថាបុគ្គលដែលមានទ្រព្យសម្បត្តិច្រើននឹងកើនឡើងដល់ចំនួន ៦៧៦ ៩៧០ នាក់នៅឆ្នាំ ២០៣០ ដែលជាកំណើន ៣២.៥% ធៀបនឹងពាក់កណ្តាលឆ្នាំ ២០២៥ ៕
Account
Security
Favourite Content