នាព្រលឹមស្រាងៗថ្ងៃទី២១ ខែមីនា នេះភ្ញៀវទេសចរជាតិ និងអន្តរជាតិបានប្រមូលផ្ដុំកកកុញខាងក្នុងបរិវេណប្រាសាទអង្គរវត្ត ដើម្បីរង់ចាំមើលព្រឹត្តិការណ៍ «សមរាត្រី» ព្រះអាទិត្យរះចំកណ្ដាលកំពូលប្រាសាទអង្គរវត្ត។
«ព្រឹត្តិការណ៍សមរាត្រី នៅប្រាសាទអង្គរវត្ត» បានទាក់ទាញភ្ញៀវទេសចរជាតិ និងអន្តរជាតិជាច្រើន ឱ្យមកទស្សនាទស្សនីយភាពដ៏អស្ចារ្យ និងកម្រមួយនេះផ្ទាល់ភ្នែករបស់ពួកគេ។ ជាក់ស្ដែង នាវេលាព្រឹកថ្ងៃទី ២១ ខែមីនានេះ នៅក្នុងបរិវេណប្រាសាទអង្គរវត្ត ផ្ទៃមេឃទាំងមូលត្រូវបានក្រាលគ្របដោយពន្លឺពណ៌មាសបាចសាចពាសពេញលើកំពូលប្រាសាទទាំងបី ជាមួយការលេចវត្តមានព្រះអាទិត្យដែលចរយាត្រាបន្តិចម្ដងៗចូលមកបង្ហាញខ្លួនចំកណ្ដាលកំពូលប្រាសាទអង្គរវត្ត ដែលព្រឹត្តិការណ៍នេះត្រូវបានគេស្គាល់ថាជា «ព្រឹត្តិការណ៍សមរាត្រី»។ ក្រឡេកមកមើលទិដ្ឋភាពផ្ទាល់នៅក្នុងប្រាសាទអង្គរវត្ត អ្នកទេសចររាប់រយនាក់បានកំពុងមានវត្តមានរង់ចាំមើលព្រឹត្តិការណ៍ដ៏អស្ចារ្យមួយនេះដោយមានការផ្ដិតយកវីដេអូ ក៏ដូចជារូបភាពស្អាតៗនៅក្នុងព្រឹត្តិការណ៍ដ៏អស្ចារ្យមួយនេះ។
គួរបញ្ជាក់ថា តាមការរំពឹងទុក ព្រឹត្តិការណ៍សមរាត្រីនៅប្រាសាទអង្គរវត្ត នឹងកើតមានចន្លោះថ្ងៃទី ២០ ដល់ ២២ ខែមីនា ឆ្នាំ ២០២៤ វេលាម៉ោង ៥ ដល់ ៧ ព្រឹក៕