កំពុងមានការចែករំលែក និងផ្ទុះការសរសើរជាខ្លាំងចំពោះអ្នកផលិតមាតិកា ជនជាតិអាមេរិកម្នាក់ ដែលធ្វើវីដេអូផ្សព្វផ្សាយអាហារតាមផ្លូវរបស់កម្ពុជា។ មិនតែប៉ុណ្ណោះ ចាប់អារម្មណ៍ទៅលើអត្តចរិតរបស់លោក គឺពិតជារួសរាយខ្លាំង ជាពិសេសពេលដែលគាត់ជួបជាមួយអាជីវករដែលលក់ដូរនៅតាមផ្លូវតែម្ដង។
Travelwithcris ជាផេករបស់ Youtuber ជនជាតិអាមេរិកម្នាក់ដែលប្រមូលផ្ដុំទៅដោយមាតិកាជាច្រើនផ្សេងគ្នាទៅតាមប្រទេសដែលគាត់បានទៅដល់។ ជាក់ស្ដែង Cris បានចំណាយពេលច្រើនថ្ងៃនៅកម្ពុជា ក្នុងទីក្រុងភ្នំពេញ ថែមទាំងបានជួយផ្សព្វផ្សាយអ្វីដែលល្អៗរបស់កម្ពុជាឱ្យពិភពលោកបានស្គាល់ថែមទៀតផង។ ជាការពិត Cris បានធ្វើវីដេអូផ្សព្វផ្សាយអាហារតាមផ្លូវរបស់កម្ពុជាជាច្រើនដូចជា នំបញ្ចុករែកលក់នៅតាមផ្លូវ, ចេកចៀនតាមរទេះ, ភេសជ្ជៈដែលលក់នៅតាមដងផ្លូវ និងអាហារតាមផ្លូវជាច្រើនទៀត រួមទាំងវត្ថុអនុស្សាវរីយ៍នៅតាមផ្សារក្នុងក្រុងភ្នំពេញ ដែលធ្វើឱ្យវីដេអូរបស់លោកទទួលបានការចាប់អារម្មណ៍ជាខ្លាំង ថែមទាំងទទួលបានការកោតសរសើរពីសំណាក់ប្រជាជនកម្ពុជាផងដែរ។ លើសពីនេះទៅទៀត អាជីវករដែលបានជួប Cris តែងបង្ហាញស្នាមញញឹម និងភាពរីករាយ ក្រោយពីបាននិយាយលេងជាមួយគាត់ ដែលនេះបង្ហាញពីការស្វាគមន៍របស់ប្រជាជនកម្ពុជាទៅកាន់ជនបរទេសដែលមកលេងកម្សាន្តក្នុងស្រុកខ្មែរ។
នៅក្នុងវីដេអូមួយរបស់ Cris ដែលនិយាយអំពី សុវត្ថិភាពក្នុងក្រុងភ្នំពេញ លោកបាននិយាយរៀបរាប់ថា៖«ខ្ញុំមានអារម្មណ៍សុវត្ថិភាពនៅក្នុងទីក្រុងភ្នំពេញ»៕