កាលពីថ្មីៗនេះកន្លងប្រជាជនកម្ពុជាបានមានប្រតិកម្មយ៉ាងខ្លាំងទៅកាន់បុគ្គលម្នាក់ឈ្មោះ Uncle Roger ដែលបានប្រើប្រាស់ពាក្យមិនសមរម្យ និងវាយតម្លៃមិនល្អទៅលើម្ហូបខ្មែរ។ ផ្ទុយទៅវិញ មានចុងភៅ អ្នកធ្វើវីដេអូ review ម្ហូប និងអ្នកធ្វើវិដេអូក្នុងយូធូបជាច្រើនក្រោយភ្លក់បានលើកសរសើរពីរសជាតិរបស់ម្ហូបខ្មែរ។ តោះ! មកមើលពីថាពួកគេគឺជាអ្នកណាខ្លះ?
១. Gordon Ramsay
លោកជាចុងភៅលំដាប់ពិភពលោកម្នាក់ដែលមានទាំងចំណេះ និងជំនាញពិតប្រាកដទៅលើការធ្វើម្ហូប។ កាលពី ៤ ឆ្នាំមុនលើកបានធ្វើដំណើរមកប្រទេសកម្ពុជា និងបានធ្វើម្ហូបខ្មែរជូនភ្ញៀវជាសែស្រឡាយរាជវង្សទៀតផង។ មិនតែប៉ុណ្ណោះ ចុងភៅរូបនេះក៏បានធ្វើដំណើរទៅខេត្តមណ្ឌលគិរី ហើយស្វែងយល់អំពីវប្បធម៌អាពាហ៍ពិពាហ៍ និងសរសើរចំពោះម្ហូបរបស់ប្រជាជននៅតំបន់នោះផងដែរ។ ជាពិសេសលោកពិតជាចូលចិត្តរសជាតិទឹកឃ្មុំព្រៃស្រស់ៗទៀតផង។
២. Angelina Jolie
កាលពី ៦ ឆ្នាំមុននៅក្នុងវីដេអូសម្ភាសជាមួយ BBC News តារាស្រី Angelina Jolie បានបង្រៀនពិធីការិនីពីការញ៉ាំអាពីងបំពង។ សម្រាប់ពិធីការិនីរូបនោះពិតជាមានការភ្ញាក់ផ្អើល និងមិននឹកស្មានថាវារសជាតិឆ្ងាញ់យ៉ាងនេះ។ ដូច្នេះហើយនាងមិនឆ្ងល់នោះទេ ថាហេតុអីបាន Angelina Jolie ចូលចិត្តញ៉ាំអាពីង។
៣. Sonny Side
លោកជាម្ចាស់ឆាណែល Best Ever Food Review Show ដែលដើរភ្លក់ម្ហូបនៅលើពិភពលោក។ ៦ ឆ្នាំមុនលោកបានបង្ហោះវីដេអូភ្លក់ម្ហូបនៅទីក្រុងភ្នំពេញក្នុងផ្សារធំថ្មីដូចជាសាច់ចង្កាក់ស្ងោរ មឹងអាំង បង្អែម និងចេកចៀន។ ក្រោយភ្លក់ម្ហូបទាំងនោះ លោកចូលចិត្តសឹងតែគ្រប់មុខទៅហើយ។
៤. Mark Wiens
សម្រាប់អ្នកធ្វើវីដេអូ review ម្ហូបម្នាក់នេះក៏មិនខុសគ្នាដែរ ក្រោយបានភ្លក់អាហារនៅទីក្រុងភ្នំពេញហើយវាពិតជាចាប់ជាតិឆ្ងាញ់មែនទែន។ លោកបានភ្លក់អាហារជាច្រើនដូចជានំបញ្វុកស្រុះ មឹកអាំង លៀសហាល ទឹកក្រឡុក និងនំប៉័ងសាច់គោអាំងជាដើម។
៥. Hungry Pursuit
លោកជាអ្នកធ្វើវីដេអូ vlog ភ្លក់ម្ហូបហើយបង្ហោះនៅលើបណ្ដាញសង្គម tiktok ម្នាក់។ លោកជាជនជាតិកាណាដារស់នៅកម្ពុជា ហើយរសជាតិម្ហូបខ្មែរពិតជាត្រូវចិត្តលោកមែនទែន។ ជាពិសេសនៅក្នុងវីដេអូដែលលោកញ៉ាំទឹកដូងត្រូវបានសារព័ត៌មានអន្តរជាតិមួយចំនួនយកទៅផ្សាយបន្តដោយសរសើរអំពីជំនាញកាប់ដូង និងភាពរួសរាយរបស់អ្នកលក់ផងដែរ។
៦. ម្ចាស់ឆាណែល Bitewithlily
នាងជាអ្នកផលិតវីដេអូភ្លក់នៅតាមតំបន់ជាច្រើនក្នុងពិភពលោក។ ក្នុងនោះនាងក៏បានមកប្រទេសកម្ពុជាភ្លក់នូវនំប៉័ងសាច់គោអាំង ហើយក៏ពេញចិត្តទាំងរសជាតិសាច់ ក្លិនឈ្ងុយ និងស្រួយរបស់នំប៉័ងលាបប័រ រួមជាមួយជ្រក់ថែមទៀតផង។
ក្រៅពីនេះក៏មានតារាយូធូប និងជនបរទេសមកលេងប្រទេសកម្ពុជាជាច្រើនទៀតដែលសរសើរម្ហូបខ្មែរមិនដាច់ពីមាត់ក្រោយបានភ្លក់ហើយ។ ជាពិសេសរសជាតិទាំងនោះអាចនឹងនៅដិតដាមជាប់មាត់ជានិច្ច៕






















Account
Security
Favourite Content