ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ទឹកធ្លាក់ «ឆាយប្រុយ» ជាតំបន់ទេសចរណ៍ធម្មជាតិលាក់ខ្លួនក្នុងតំបន់ជួរភ្នំក្រវាញ ដែលមិនសូវមានអ្នកស្គាល់និងបានទៅដល់ច្រើន ប៉ុន្តែទឹកធ្លាក់ដែលមានកម្ពស់រហូតដល់ទៅ ៧០ ម៉ែត្រមួយនេះបានក្លាយជាទីពេញនិយមសម្រាប់អ្នកដែលចូលចិត្តដំណើរកម្សាន្តបែបផ្សងព្រេង។
ដំណើរកម្សាន្តបែបរុករកបានក្លាយជាទីពេញនិយមនាពេលបច្ចុប្បន្ន ខណៈតំបន់ទេសចរណ៍ធម្មជាតិស្រស់ស្អាតច្រើនកន្លែងត្រូវបានរកឃើញជាបន្តបន្ទាប់ និងបានចែកចាយលើបណ្ដាញសង្គម។ ថ្ងៃនេះដែរ AMS នឹងលើកយកទឹកធ្លាក់ដ៏ស្រស់ស្អាតមួយកន្លែងក្នុងប្រទេសកម្ពុជា ដែលស្ថិតក្នុងស្រុកវាលវែង ជាប់ព្រំប្រទល់ខេត្តពោធិ៍សាត់ និងកោះកុង។
ដ្បិតថាទឹកធ្លាក់ «ឆាយប្រុយ» ពុំសូវទទួលបានការចាប់អារម្មណ៍ទៅលេងកម្សាន្តពីសំណាក់ភ្ញៀវទេសចរច្រើនក៏ពិតមែន តែតំបន់ទេសចរណ៍ធម្មជាតិមួយនេះពិតជាស្រស់បំព្រងមិនចាញ់តំបន់ទឹកធ្លាក់ដទៃទៀតនោះទេ។ លើសពីភាពស្រស់ស្អាតទឹកធ្លាក់ «ឆាយប្រុយ» មានលក្ខណៈពិសេសមួយចំនួនដូចជា មានកម្ពស់ទឹកដល់ទៅ ៧០ ម៉ែត្រ ធ្លាក់ចុះមកក្រោមទង្គិចនឹងថ្មក្រោមដែលមានជម្រៅប្រហែល ៣០ ម៉ែត្រ។
មួយវិញទៀត ទីនោះដែរគឺប្រៀបបីដូចជាល្អាងភ្នំធម្មជាតិដែលមានទឹកថ្លាឆ្លុះដល់បាតប្រៀបបានដូចជាកន្លែងលាក់ខ្លួនដ៏អាថ៌កំបាំងមួយនៅក្នុងព្រៃជ្រៃ។ ទឹកធ្លាក់មួយកន្លែងនេះពិតជាសក្ដិសមបំផុតសម្រាប់អ្នកដែលចូលចិត្តភាពស្ងប់ស្ងាត់និងចូលចិត្តរស់នៅជាមួយធម្មជាតិព្រោះថាតំបន់នេះនៅឆ្ងាយពីទីប្រជុំជន។
គួរឱ្យដឹងដែរ ទឹកធ្លាក់កម្ពស់ ៧០ ម៉ែត្រនេះស្ថិតនៅក្នុងភូមិសាស្រ្តតំបន់ឧទ្យានជាតិជួរភ្នំក្រវាញខាងត្បូង ភូមិឆាយលូក ឃុំអូរសោម ស្រុកវាលវែង ព្រំប្រទល់រវាងខេត្តពោធិ៍សាត់ នឹងខេត្តកោះកុង ដែលមានចំងាយ ១៧៩ គីឡូម៉ែត្រ ពីទីរួមខេត្តពោធិ៍សាត់៕
រូបភាព ផ្ដល់ជូនដោយ ក្រុមប្រមាញ់រូបភាពជីវៈចម្រុះកម្ពុជា/គឹម បូរិន
Account
Security
Favourite Content