នៅថ្ងៃទិវាទីក្រុងពិភពលោក ទីក្រុងចំនួន ៥៥ ត្រូវបានចុះបញ្ជី ក្នុង «បណ្តាញទីក្រុងច្នៃប្រឌិត» របស់អង្គការយូណេស្កូ (UCCN) បន្ទាប់ពីទីក្រុងទាំងនេះ មានលក្ខខណ្ឌគ្រប់ចំណុច ដែលកំណត់ដោយអគ្គនាយកអង្គការយូណេស្កូ លោក Audrey Azoulay ។ ក្នុងនោះទីក្រុង «បាត់ដំបង» នៃប្រទេសកម្ពុជា ត្រូវបានយូណេស្កូសម្រេចដាក់បញ្ចូលជា «បណ្ដាញទីក្រុងច្នៃប្រឌិត» ក្នុងចំណោមទីក្រុងថ្មីៗ ទើបនឹងដាក់បញ្ចូលទាំង ៥៥ នោះ។
ទីក្រុងថ្មីត្រូវបានទទួលស្គាល់ជាទីក្រុងច្នៃប្រឌិត ដោយអង្គការយូណេស្កូ បន្ទាប់ពីការប្តេជ្ញាចិត្តយ៉ាងមុតមាំរបស់ពួកគេក្នុងការទាញយកវប្បធម៌ និងភាពច្នៃប្រឌិតជាផ្នែកនៃយុទ្ធសាស្ត្រអភិវឌ្ឍន៍របស់ពួកគេ និងការបង្ហាញការអនុវត្តប្រកបដោយភាពច្នៃប្រឌិតក្នុងការរៀបចំផែនការទីក្រុងដែលផ្តោតលើការរស់នៅរបស់ប្រជាជន។
ការបន្ថែមចុងក្រោយបំផុត នៃទីក្រុងទាំង ៥៥ ខាងលើ ទៅក្នុងបណ្តាញទីក្រុងច្នៃប្រឌិត ឥឡូវនេះមានទីក្រុងចំនួន ៣៥០ ហើយ នៅក្នុងចំណោមប្រទេសជាង១០០ ដែលតំណាងឱ្យវិស័យច្នៃប្រឌិតចំនួនប្រាំពីរ៖ សិប្បកម្ម និងសិល្បៈប្រជាប្រិយ ការរចនា ភាពយន្ត អាហារ អក្សរសាស្ត្រ សិល្បៈប្រព័ន្ធផ្សព្វផ្សាយ និងតន្ត្រី៕