ប្រិយមិត្តទាំងអស់គ្នាច្បាស់ជាដឹងហើយថា ឱ្យតែពេលហាន់ខ្ទឹមបារាំងដឹងតែត្រូវហូរទឹកភ្នែកហើយ។ បែនេះហើយទើបធ្វើឱ្យយើងមានចិត្តរារែកពេលត្រូវហាន់ខ្ទឹមបារាំងម្ដងៗ។ ដូច្នេះថ្ងៃនេះយើងនឹងចែករំលែកនូវវិធីខ្លះៗជួយសម្រួលពេលហាន់ខ្ទឹម៖
១. ប្រើកាំបិតដែលមុតល្អ
ការប្រើកាំបិតដែលមានមុខស្រួចមុតល្អគឺជាគន្លឹះសំខាន់ក្នុងវិជ្ជាធ្វើម្ហូប ជាពិសេសសម្រាប់ការហាន់ខ្ទឹមបារាំង។ ជាមួយគ្នានេះ កាំបិតមុតស្រួចមិនអាចធ្វើឱ្យសាច់ខ្ទឹមបែកខ្លាំងឡើយ ហើយក៏ជួយកាត់បន្ថយបរិមាណនៃការបញ្ចេញឧស្ម័នរបស់ខ្ទឹមបារាំងដែលបណ្ដាលឱ្យហូរទឹកភ្នែកផងដែរ។ ដូច្នេះមុនហាន់ខ្ទឹមបារាំងយើងគួរតែសំលៀងជាមុនសិន។
២. យកខ្ទឹមបារាំងទុកក្នុងទូរទឹកកក មុននឹងហាន់
វិធីមួយនេះក៏អាចជួយកាត់បន្ថយការឡើងក្រហាយភ្នែកពេលហាន់ខ្ទឹមបារាំងដែរ ដោយសារប្រតិកម្មគីមីក្នុងខ្ទឹមនឹងថយចុះក្រោមសីតុណ្ហភាពត្រជាក់។ ដូច្នេះមុនពេលហាន់ខ្ទឹមបារាំង យើងគួរយកទៅទុកក្នុងទូរទឹកកកប្រហែលពី ៣០ ទៅ ៤៥ នាទីសិន។
ប៉ុន្តែក្រោយពេលយកចេញពីទូរទឹកកកត្រូវហាន់ឱ្យលឿន ពុំនោះពេលខ្ទឹមបារាំងចាប់ផ្ដើមលែងត្រជាក់នឹងធ្វើឱ្យយើងក្រហាយភ្នែកបាន។ គួរបញ្ជាក់ដែរថា យើងក៏មិនអាចទុកខ្ទឹមបារាំងក្នុងទូរទឹកកកបានយូរដែរព្រោះវានឹងបណ្ដាលឱ្យខូច។
៣. ប្រើរបាំងការពារភ្នែក
ប្រសិនបើមិនចង់ចំណាយពេលយូរ យើងក៏អាចប្រើរបាំងការពារភ្នែកបានដែរ។ មានន័យថាយើងអាចប្រើវ៉ែនតាបានគ្រប់ប្រភេទ ប៉ុន្តែអ្នកជំនាញបានផ្ដល់យោបល់ថាការប្រើប្រាស់វ៉ែនតាដែលមានរបាំងជុំវិញកញ្ចក់រឹតតែមានប្រសិទ្ធភាព។ ជាឧទាហរណ៍វាអាចនឹងគួរឱ្យអស់សំណើចបន្តិចពិតមែន ប៉ុន្តែការប្រើវ៉ែនតាហែលទឹកពិតជាមានប្រសិទ្ធភាពខ្ពស់ជាងវ៉ែនតាធម្មតាមែន។
៤. ប្រើឧបករណ៍ផ្សេងជំនួស
ជឿជាក់ថាការវិវត្តន៍នៃសម្ភារៈផ្ទះបាយនាពេលបច្ចុប្បន្នគឺកាន់តែទំនើបដែលសមស្របទៅតាមតម្រូវរបស់អ្នកប្រើប្រាស់។ ដូច្នេះយើងអាចផ្លាស់ប្ដូរពីការហាន់ដោយប្រើកាំបិតធម្មតាមកជាការប្រើឧបករណ៍ផ្សេងជំនួសដែលអាចជួយកាត់បន្ថយការក្រហាយភ្នែក និងសន្សំពេលវេលាបានផងដែរ៕