Taylor Swift បង្ហាញពីអារម្មណ៍រីករាយ ដែលខ្លួន និងមិត្តសំណព្វចិត្ត Selena Gomez បានជួបនឹងគូជីវិតនៅក្នុងពេលវេលាកៀកគ្នា ថែមទាំងបានសរសើរដល់មិត្តរូបនេះថា ជាកូនក្រមុំដែលស្រស់ស្អាតជាងនរណាទាំងអស់ ដែលខ្លួនធ្លាប់បានឃើញនៅលើលោកនេះ។


កាលពីថ្ងៃ ៦ ខែតុលានេះ Taylor Swift ទើបតែបានបង្ហាញវត្តមានចូលរួមកម្មវិធី The Morning Mash Up ដោយតារាស្រីវ័យ ៣៥ ឆ្នាំបានចែករំលែករឿងរ៉ាវពីក្រោយអាល់ប៊ុមថ្មី The Life of a Showgirl រួមទាំងអារម្មណ៍របស់ខ្លួនចំពោះអាពាហ៍ពិពាហ៍របស់មិត្តជំនិតដែលទើបតែបានរៀបចំឡើងកាលពីថ្ងៃទី ២៧ ខែកញ្ញា ឆ្នាំ ២០២៥ កន្លងទៅ។
Taylor Swift បានរៀបរាប់ថា៖ “Selena ជាកូនក្រមុំដែលស្អាតជាងគេ។ មិនត្រឹមតែជាកូនក្រមុំដែលស្អាតជាងគេប៉ុណ្ណោះទេ ប៉ុន្តែនាងក៏ជារបស់មួយដែលស្អាតបំផុតដែលខ្ញុំធ្លាប់បានឃើញ។ ខ្ញុំសប្បាយចិត្តខ្លាំងណាស់ នាងសមនឹងទទួលបានរឿងល្អៗទាំងនេះ”។

រំឭកដល់រូបថតជាមួយនឹងក្រុមមិត្តភ័ក្តិស្រីៗដែលខ្លួនបានចែករំលែកនៅលើគណនី Instagram តាំងតែពីឆ្នាំ ២០២៣ Taylor ថា ខ្លួនពិតជាសប្បាយចិត្តនៅពេលដែលមិត្តម្នាក់ៗអាចស្វែងរកគូជីវិតរបស់ខ្លួននៅពេលវេលាកៀកៗគ្នា។ នាងបន្តទៀតថា “ខ្ញុំបានថតរូបជាមួយមិត្តភ័ក្តិជាច្រើននាក់ មិនមែនតែ Selena ទេ ហើយម្នាក់ៗក៏បានជួបនឹងមនុស្សដែលខ្លួនស្រឡាញ់នៅពេលក្រោយពីនោះ។ ដោយឡែកនៅថ្ងៃបន្ទាប់ ខ្ញុំក៏ត្រូវឡើងសម្ដែងនៅទីក្រុង Kansas ដោយមិនដឹងទេថា Travis ក៏បានចូលរួមក្នុងកម្មវិធីនោះដែរ។ ខ្ញុំពិតជាសប្បាយចិត្តដែលខ្ញុំបានជួបនឹង Travis ហើយខ្ញុំពិតជារីករាយដែលមិត្តភ័ក្តិរបស់ខ្ញុំបានជួបនឹងសុភមង្គលនៅក្នុងជីវិត” តារាស្រីបន្ដដូច្នេះ។





គួរឱ្យដឹងផងដែរថា មួយខែមុននឹងអាពាហ៍ពិពាហ៍រវាង Selena Gomez និង Benny Blanco មកដល់ កាលពីថ្ងៃទី ២៧ ខែសីហា ឆ្នាំ ២០២៥ កន្លងទៅ Taylor Swift ក៏ទើបតែបានភ្ជាប់ពាក្យជាមួយនឹងមិត្តប្រុសកីឡាករបាល់ឱប Travis Kelce ផងដែរ៕

























Account
Security
Favourite Content