ក្រោយបញ្ចប់ជាស្ថាពរកាលពីខែធ្នូឆ្នាំមុន ការប្រគំតន្ត្រី “Eras Tour” របស់ Taylor Swift អាចរកចំណូលបានជាង ២ ពាន់លានដុល្លារ តាមរយៈការសម្ដែង ១៤៩ ឆាកទូទាំងពិភពលោក ទាំងសហរដ្ឋអាមេរិក អឺរ៉ុប និងបណ្ដាប្រទេសអាស៊ីមួយចំនួន។
ដោយឡែកនៅប្រទេសចិន តារាចម្រៀងវ័យ ៣៥ ឆ្នាំរូបនេះមិនបានសម្ដែង នោះទេ បើទោះបីនាងមានប្រជាប្រិយភាពយ៉ាងទូលំទូលាយក្នុងប្រទេសនេះក៏ដោយ។ ទោះយ៉ាងណា ថ្មីៗនេះអាជ្ញាធរក្រុងសៀងហៃបានបញ្ជាក់ថាពួកគេកំពុងពិភាក្សាជាមួយក្រុមការងារតារាចម្រៀង Taylor Swift ដើម្បីស្នើឱ្យកំពូលតារាចម្រៀងអាមេរិករូបនេះមកធ្វើការប្រគំតន្ត្រីនៅតំបន់របស់ខ្លួនដើម្បីជំរុញសេដ្ឋកិច្ចនិងទេសចរណ៍។
សារព័ត៌មានចិន The Paper បានរាយការណ៍កាលពីថ្ងៃទី១៤ ខែមករា ដោយដកស្រង់សម្តីមន្ត្រីមួយរូបថា អាជ្ញាធរក្រុងសៀងហៃបានរៀបចំ “កិច្ចពិភាក្សាបឋម” ជាមួយក្រុមការងាររបស់កំពូលតារាប៉ុប Taylor Swift អំពីលទ្ធភាពនៃការសម្ដែងរបស់នាងនៅក្នុងទីក្រុងមជ្ឈមណ្ឌលសេដ្ឋកិច្ចរបស់ប្រទេសចិនមួយនេះ។
គួរបញ្ជាក់ថា ដំណើរប្រគំតន្ត្រីទេសចរណ៍ពិភពលោក “Eras Tour” របស់ Taylor Swift គឺជាកម្មវិធីប្រគំតន្ត្រីទេសចរណ៍ដំបូងបំផុតក្នុងប្រវត្តិសាស្ត្រដែលអាចរកចំណូលបានច្រើនជាង ១ ពាន់លានដុល្លារ ខណៈការសម្តែងនីមួយៗរបស់នាងត្រូវបានចាត់ទុកថានាំមកនូវអត្ថប្រយោជន៍សេដ្ឋកិច្ចមហាសាលដល់ទីក្រុងនានាដែលទទួលរៀបចំ។
លោក Zhang Qi អនុប្រធានការិយាល័យវប្បធម៌ និងទេសចរណ៍ក្រុងសៀងហៃ បានប្រាប់សារព័ត៌មានថា ខ្លួនបានជួបក្រុមការងាររបស់ Taylor Swift រួចហើយ ប៉ុន្តែថាតើការប្រគំតន្ត្រីនេះអាចកើតឡើង ឬយ៉ាងណានោះ គឺនឹងត្រូវពឹងផ្អែកលើទីផ្សារ និងភាពទាក់ទាញរបស់ទីក្រុងសៀងហៃ។ យ៉ាងណាក៏ដោយ លោកមានសុទិដ្ឋិនិយមថាវានឹងអាចកើតឡើងក្នុងឆ្នាំនេះ ៕