​កម្មវិធី Miss Supranational Cambodia បាន​ផ្លស់ប្ដូរ National Director ថ្មី។​ ដំណឹង​មួយ​នោះ​ចេះតែ​បន្ត​លេចឮ​មិន​ឈប់ តាំងពី​បេក្ខភាព Miss Supranational Cambodia ២០២៤ ឈុំ ចាន់ដារ៉ា មិនបាន​ចេញ​ទៅ​ប្រកួត​នៅ​ប្រទេស​ប៉ូឡូញ កាលពី​ពេល​កន្លង​ទៅ។

ទើបតែ​ថ្ងៃនេះ​លោក ភួង វណ្ណា ​ឬគ្រប់គ្នាស្គាល់ថា AB Vanna ម្ចាស់​អេប៊ី ស្ទូឌីយ៉ូ ( AB STUDIO Co., LTD ) ដែល​តែងតែ​ជា​ទី​ទុក​ចិត្ត​នៃ​តារា​ប្រុស​ស្រី​ល្បី​ៗ​ក្នុង​ប្រទេស ទៅ​ទទួល​សេវាកម្ម បាន​ចេញ​មុខ​មក​បញ្ជាក់​ថា លោក​ទទួល​បាន​សិទ្ធិ​ពី​ Miss Supranational and Mister Supranational Organization បាន​ទទួល​អាជ្ញាប័ណ្ណ ដើម្បី​រៀបចំ​កម្មវិធី Miss Supranational Cambodia និង Mister Supranational Cambodia ចាប់ផ្ដើម​ពីឆ្នាំ ២០២៥ នេះតទៅ។

លោក​ ភួង​ វណ្ណា ជា​ម្ចាស់ អេប៊ី ស្ទូឌីយ៉ូ ( AB STUDIO Co., LTD ) ហើយ​ក្រុមហ៊ុន AB STUDIO Co., LTD នឹង ក្រុមហ៊ុន ( D.O.P. Agency ) រួម​សហការ​គ្នា​រៀបចំ​កម្មវិធី​ថ្នាក់​ជាតិ ដោយ​សេចក្ដី​សោមនស្ស​រីករាយ ក្នុង​ការ​ទទួល​យក​ការ​បណ្ដាក់​ទុន​ថ្មី​នេះ​ជាមួយ​ស្ថាប័ន​ដែល​បង្ហាញ​ពី​ការ​គោរព និង​សេចក្ដី​ថ្លៃថ្នូរ​ចំពោះ​អ្នក​កាន់​អាជ្ញាប័ណ្ណ និង​បេក្ខជន​របស់​ខ្លួន។

Miss Supranational Cambodia និង Mister Supranational Cambodia បាន​បញ្ជាក់​ជំហរ​យ៉ាង​ច្បាស់​ថា​លើក​តម្កើង​ក៏​ដូច​ជា​ផ្សព្វផ្សាយ​តំបន់​ទេសចរណ៍​ជាតិ វប្បធម៌​ ប្រពៃណី​ ទំនៀមទម្លាប់​ ការ​អភិវឌ្ឍន៍​ថ្មី​ៗ​នៃ​កម្ពុជា តាមរយៈ​ការប្រកួត Miss and Mister Supranational Cambodia 2025។ ព័ត៌មាន​បន្ថែម​អំពី​ព្រឹត្តិការណ៍​ការ​ប្រកួតប្រជែង​នឹង​ត្រូវ​បង្ហាញ​នៅ​ក្នុង​សន្និសីទ​សារព័ត៌មាន នា​ពេល​ឆាប់​ៗ​ខាង​មុខ​នេះ។

អ្នក​គាំទ្រ​សប្បាយ​ចិត្ត​ដែល Ab Vanna ទទួល​បាន​សិទ្ធិ​រៀបចំ Miss Supranational Cambodia និង Mister Supranational Cambodia ព្រោះ​ដឹង​ថា​លោក​មាន​ធនធាន មាន​បណ្ដាញ​ច្រើន និង​ជា​មនុស្ស​ស្គាល់​គេ​ឯង ហើយ​ពិសេស​គឺ​ការ​រៀបចំ​របស់ Miss Grand Ratanakiri 2024 កន្លង​ទៅ​បាន​ល្អ​ខ្លាំង ព្រោះ​ទាំង​មាន​បុគ្គល​ល្បី​ៗ​ចាំ​ជួយ​រៀបចំ​ដល់​ការងារ​ប្រកួត​ប្រជែង​កម្មវិធី​សម្រស់។

គួរ​បញ្ជាក់​ថា ឆ្នាំនេះ ភួង​ វណ្ណា ដែល​ជា​ម្ចាស់ អេប៊ី ស្ទូឌីយ៉ូ ក៏​បាន​ទិញ​សិទ្ធិ​រៀបចំ​ការ​ប្រកួតMiss Grand Ratanakiri ថ្នាក់​ខេត្តផង​ដែរ ហើយ​កញ្ញា ម៉ាច ដាវី ម្ចាស់​មកុដ Miss Grand តំណាង​ខេត្ត​រតនគិរី ទទួល​បាន​តំណែង​ជា​លំដាប់​រង​ទី​៣ Miss Grand Cambodia 2024៕