Owen Cooper តួសម្ដែងពីរឿង Adolescence ក្លាយតារាសម្ដែងប្រុសមានវ័យក្មេងបំផុតក្នុងប្រវត្តិសាស្រ្ត ដែលឈ្នះបានពានរង្វាន់ពីក្នុងកម្មវិធី Emmys Awards ក្នុងវ័យត្រឹម ១៥ឆ្នាំ។

តារាសម្ដែងជនជាតិអង់គ្លេស ដើរតួជា Jamie Miller ក្មេងប្រុសម្នាក់ដែលត្រូវបានគេចោទប្រកាន់ថាជា អ្នកសម្លាប់មិត្តរួមថ្នាក់ បានទទួលពានរង្វាន់ Best Supporting Actor សម្រាប់ប្រភេទរឿង Limited Series ដោយសារតែភាពលេចធ្លោនៅក្នុងភាពយន្តរឿង Adolescence របស់ Netflix។
នៅគ្រាឡើងទទួលពានរង្វាន់ Owen Cooper បាននិយាយថា៖ “ការឡើងមកឈរនៅទីនេះគឺ វ៉ាវ តែម្ដង។ វាពិតជាអស្ចារ្យណាស់។ នៅពេលដែលខ្ញុំបានចូលរៀនថ្នាក់សម្ដែងកាលពី ២ឆ្នាំមុន ខ្ញុំមិនដែលរំពឹងថា ខ្ញុំនឹងមកដល់ទឹកដីសហរដ្ឋអាមេរិកទេ ហើយមកឈរទីនេះ កាន់តែមិនបាច់និយាយទៀត”។

ក្នុងឱកាសអាចបំបែកកំណត់ត្រាចាស់របស់ Scott Jacoby ដែលធ្លាប់ជាតារាប្រុសវ័យក្មេងបំផុត ទទួលបានពានរង្វាន់ពីកម្មវិធី Emmy Awards ក្នុងវ័យ ១៦ឆ្នាំ កាលពីឆ្នាំ ១៩៧៣ តារាសម្ដែងវ័យក្មេង ដែលទើបតែចូលប្រឡូកក្នុងអាជីពសម្ដែងតាមរយៈរឿង Adolescence ជារឿងដំបូង បានបន្តថា៖ “ខ្ញុំគិតថា ហេតុការណ៍យប់នេះ បានបង្ហាញឱ្យអ្នកឃើញហើយថា បើសិនជាអ្នកតាំងចិត្តស្ដាប់ ផ្ដោតអារម្មណ៍ និងដើរចេញពីចំណុចដដែលៗដែលអ្នកគិតថាខ្លួនមានសុវត្ថិភាព អ្នកនឹងអាចសម្រេចបានគ្រប់យ៉ាងនៅក្នុងជីវិត”។
ភាពយន្តដែលមានសរុបចំនួន ៤ភាគនេះ ទទួលបានកោតសរសើរច្រើន មិនថាពីមជ្ឈដ្ឋានទស្សនិកជនទូទៅ និងអ្នកវិភាគភាពយន្តទេ ជាពិសេសទៅលើការបង្ហាញផលប៉ះពាល់នៃទូរស័ព្ទដៃ និងបណ្ដាញទំនាក់ទំនងសង្គមនៅក្នុងចំណោមមនុស្សវ័យជំទង់។

ក្រៅពីពានរង្វាន់ដែល Owen Cooper ទទួលបាន ភាពយន្តខាងលើក៏ឈ្នះបានពានរង្វាន់ចំនួន ៤ទៀត រួមមាន ការដឹកនាំឆ្នើម ការនិពន្ធឆ្នើម ក៏ដូចជា ពានរង្វាន់កោតសរសើរទៅលើការសម្ដែងរបស់ Stephen Graham និង Erin Doherty។
យ៉ាងណាមិញ សូមបញ្ជាក់ផងដែរថា តំណែងជាតារាសម្ដែងវ័យក្មេង និងជាតារាស្រីវ័យក្មេងបំផុតដែលទទួលបានពានរង្វាន់ Emmy នៅតែជារបស់ Roxana Zal ដូចដើម ដោយកាលពីឆ្នាំ ១៩៨៤ តារាស្រីរូបនេះ បានឈ្នះពានរង្វាន់ពីការសម្ដែងក្នុងភាពយន្តរឿង Something About Amelia៕

























Account
Security
Favourite Content