ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ក្រោយទទួលបានដំណឹងថា ក្រុមហ៊ុនបានដាក់ពាក្យបណ្ដឹង ដើម្បីសុំការបញ្ជាក់ពីសុពលភាពកិច្ចសន្យាផ្ដាច់មុខរវាងភាគីទាំងពីរ សមាជិកទាំង ៥ រូបក៏បានចេញសេចក្ដីប្រកាសមួយភ្លាមៗ ព្រមរៀបរាប់ថា ក្រុមហ៊ុនលែងមានសិទ្ធិអ្វីមកលើពួកនាងទៀតហើយ។
តាមរយៈការបកប្រែរបស់ Allkpop សេចក្ដីប្រកាសនោះបានប្រឆាំងនឹងពាក្យបណ្ដឹងរបស់ក្រុមហ៊ុនបុត្រសម្ព័ន្ធរបស់ HYBE ដែលបានដាក់បញ្ជូនទៅតុលាតាំងតែពីថ្ងៃទី៣ ខែធ្នូ ដោយរៀបរាប់ថា ការមិនចង់បញ្ចប់កិច្ចសន្យារបស់ ADOR គឺធ្វើឡើង ដោយសារក្រុមហ៊ុនមិនទាន់អាចទទួលបានប្រាក់កម្រៃដែលពួកគេបានវិនិយោគមកលើក្រុមរបស់ខ្លួន។
ដោយឡែកពួកនាងជឿជាក់ថា ខ្លួនបានបំពេញតួនាទី និងអាចរកប្រាក់ចំណេញឱ្យក្រុមហ៊ុនរួចខ្លះទៅហើយ ដោយក្នុងសេចក្ដីប្រកាសបានសរសេរថា៖ “ការពិតទៅ យើងបានបំពេញការងារដែលជាតួនាទីរបស់យើងដើម្បីសងត្រឡប់ទៅនឹងការវិនិយោគរបស់ ADOR រួចទៅហើយ និងបានរកប្រាក់ចំណូលលើសពីចំនួនដើមដែលក្រុមហ៊ុនបានចំណាយទៅទៀត”។
Minji, Hanni, Danielle, Haerin និង Hyein បានយល់ឃើញថា ការផ្លាស់ប្ដូរអ្នកដឹកនាំថ្មីនៅ ADOR ប្រៀបបានទៅនឹងការយល់ព្រមធ្វើទៅតាមទង្វើបង្កាច់បង្ខូច និងមិនផ្ដល់តម្លៃដល់ភាពជោគជ័យរបស់ខ្លួន ដូចអ្វីដែលក្រុមហ៊ុនមេតែងតែធ្វើរហូតមកអ៊ីចឹង។ ក្រុមក្មេងស្រីទាំងនោះ និយាយពីការប្រែប្រួលខាងលើជាសំណេរថា៖ “ក្រុមហ៊ុនដែលមានកាត្វកិច្ចការពារសិល្បករបស់ខ្លួន បែរក្លាយជាភាគីមួយចាំបញ្ចេញមតិអាក្រក់ៗពីពួកយើងទៅវិញ។ វាធ្វើឱ្យពួកយើងបាត់បង់ទំនុកចិត្តយ៉ាងធ្ងន់ធ្ងរ ជាដើមហេតុដែលយើងគិតថា បើ NewJeans បន្តស្ថិតនៅក្រោមការគ្រប់គ្រងរបស់ ADOR ទៀត ពួកយើងនឹងកាន់តែមានឱកាសជួបគ្រោះថ្នាក់ច្រើនជាងនេះទៅទៀត។ បើសិនជាពួកខ្ញុំត្រូវបន្តធ្វើការក្រោមលក្ខខណ្ឌទាំងនេះ ដែលមានទាំងការរំលោភលើទំនុកចិត្ត និងការបំពានលើកិច្ចសន្យារយៈពេល ៥ឆ្នាំបន្ថែមទៀត វាមិនត្រឹមតែមិនសមហេតុផលសម្រាប់ពួកយើងនោះទេ តែវាក៏ជាអំពើអមនុស្សធម៌មួយផងដែរ” សមាជិកទាំង ៥បន្តបែបនេះ។
នៅក្នុងសេចក្ដីប្រកាសដដែល NewJeans រៀបរាប់ថា កិច្ចសន្យាផ្តាច់មុខចែងយ៉ាងជាក់លាក់ថា ប្រសិនបើ ADOR ខកខានក្នុងការបំពេញកាតព្វកិច្ចតាមកិច្ចសន្យារបស់ខ្លួន នោះសិល្បករមានសិទ្ធិបញ្ចប់កិច្ចសន្យា។ សមស្របទៅនឹងការអះអាងរបស់ពួកនាងដែលបាននិយាយក្នុងសន្នីសិទសារព័ត៌មានបន្ទាន់ថា ក្រុមហ៊ុនមិនបានបំពេញតាមសំណើររបស់ខ្លួននៅក្នុងរយៈពេលកំណត់ ២ សប្ដាហ៍។
ម្ចាស់បទ ETA ទាំង ៥ បានបន្តជីកកកាយពីបរិយាសកាសកៀបសង្កត់ដែលក្រុមការងារដទៃទៀតបានជួប៖”បច្ចុប្បន្ន យើងកំពុងតែបំពេញការងារតាមកាលវិភាគទាំងអស់តាមអ្វីដែលបានព្រមព្រៀងជាមួយគ្នាពីមុន។ ប៉ុន្តែក្នុងអំឡុងពេលនៃការធ្វើការងារនេះ យើងសង្កេតឃើញថា អ្នកគ្រប់គ្រង អ្នករៀបចំសម្លៀកបំពាក់ និងអ្នកតុបតែងខ្លួនឱ្យយើងទទួលរងនូវការបំពានតាមរយៈការសាកសួរ ស៊ើបអង្កេត និងរឹបអូសកុំព្យូរទ័រ រហូតដល់ពួកគាត់យំក៏មាន។ ពួកយើងកាន់តែពិបាកទ្រាំទ្រខ្លាំង ព្រោះពេលនេះវាមិនមែនមានតែយើងទេដែលទទួលរងនូវអំពើអសីលធម៌ និងអមនុស្សធម៌បែបនេះ”។ ទាំងនេះជាការលើកឡើងរបស់សមាជិកទាំង ៥។
NewJeans បានបញ្ជាក់ម្ដងទៀតថា ចាប់តាំងពីថ្ងៃទី២៩ ខែវិច្ឆិកាកន្លងទៅ ពួកនាងលែងជាសិល្បកររបស់ ADOR តទៅទៀតហើយ ឯក្រុមហ៊ុនក៏លែងមានសិទ្ធិក្នុងការគ្រប់គ្រង និងជ្រៀតជ្រែកក្នុងសកម្មភាពផ្សេងៗទៀតរបស់ក្រុមដូចគ្នាដែរ៕
Account
Security
Favourite Content