ឈុតអប្សរាបានធ្វើឲ្យ Mélia Constantin កាន់ស្អាតប្លែកមួយបែបទៀតហើយ ក្រៅពីរូបសម្រស់ដ៏ផូរផង់បែកកូនកាត់ដែលជាសម្ផស្សធម្មជាតិផ្ដល់ឲ្យ។ ក្នុងរូបភាពជាច្រើនដែល មាលា បានបង្ហោះ ពេលគ្រងឈុតអប្សរា នរណាៗក៏លាន់មាត់សរសើរតារាស្រីមានឈាមខ្មែរ-បារាំងរូបនេះដែរ។
Mélia Constantin កំពុងឡើងកូដខ្លាំងក្នុងប៉ុន្មានឆ្នាំចុងក្រោយនេះ ក្ដោបបានតំណែងតួឯកខ្នាតធំ និងបានចូលរួមសម្ដែងក្នុង MV ហើយនិង TVC ជាមួយកំពូលតារាប្រុស ២ រូប។ ការងារឆ្នាំនេះ មាលា សុទ្ធតែធំៗ ហើយវាក៏ធ្វើឲ្យប្រជាប្រិយភាពតារាស្រីវ័យ ២៥ នេះ កាន់តែកើនឡើង ដោយមានទាំងអ្នកគាំទ្រក្នុង និងក្រៅប្រទេសដូចគ្នា។
ក្នុងឈុតនារីអប្សរាពណ៌សលាយពណ៌មាសយ៉ាងប្រណីត ធ្វើឲ្យអ្នកគាំទ្រស្រមៃថា បើកញ្ញាគ្រងឈុតនេះ ហើយស្លៀកវាដើរលើវេទិកាអន្តរជាតិក្នុងនាមជាបវរកញ្ញាតំណាងកម្ពុជាមិនដឹងអស្ចារ្យយ៉ាងណាឡើយ ព្រោះសម្លៀកបំពាក់សមនឹងទម្រង់មុខដងខ្លួន ហើយ មាលា ក៏ជាតារាស្រីមានចំណេះដឹងជ្រៅជ្រះ ព្រមទាំងនិយាយភាសាអង់គ្លេស បារាំង បានល្អ ដែលអាចជាការណែនាំពីខ្មែរយ៉ាងល្អ។
អ្នកគាំទ្រពិតជាភ្ញាក់ផ្អើលនឹងសម្រស់ Mélia ជាមួយសម្លៀកបំពាក់បុរាណខ្មែរល្អល្អះ ប៉ះជាមួយកំពូលសម្រស់តារាស្រី សក្ដិសមហើយដែលទទួលបានកេរ្តិ៍ឈ្មោះបោះសំឡេងខ្លាំងយ៉ាងនេះ។ តារាស្រីកម្ពស់ ១,៦៥ ម៉ែត្រ រូបនេះធ្លាប់បានគ្រងឈុតខ្មែរជាច្រើនរួចមកហើយ តែឈុតអប្សរាដែលនាងទើបបញ្ចេញរូបភាពថ្មីៗ មើលពីជ្រុងណាក៏ឃើញស្អាតដែរ។
មាលា មានអាជីពជាតារាបង្ហាញម៉ូដ សម្ដែង និងជាអ្នកផ្សព្វផ្សាយផលិតផលដ៏ពេញនិយមនាពេលបច្ចុប្បន្ន ដោយសារតែសម្រស់ស្រស់ស្អាត បូករួមទេពកោសល្យសិល្បៈ៕
រូបភាព៖ Mélia Constantin