តារាចម្រៀងស្រីជួរមុខលំដាប់ប្រទេស មាស សុខសោភា ថ្មីៗនេះ ទើបបង្ហើបប្រាប់ឱ្យអ្នកសារព័ត៌មានសិល្បៈក្នុងស្រុកដឹងថា នាងបានបញ្ចប់កុងត្រាជាមួយផលិតកម្ម រាម ហើយ ក្រោយជ្រកកោនទ្រនំនេះរយៈពេលប្រមាណ ២ ឆ្នាំ។ មែនទែនទៅ កុងត្រារវាងតារាស្រីរូបនេះ និងផលិតកម្ម រាម បានបញ្ចប់តាំងពីខែធ្នូ ឆ្នាំ ២០២២ មកម៉្លេះ តែពេលនេះនាងនិងផលិតកម្មនៅដោះស្រាយការងារផ្សេងៗដែលសេសសល់។
មិនត្រឹមចប់កុងត្រាជាតារាចម្រៀងប៉ុណ្ណោះទេ សូម្បី ហាង មាស សុខសោភា សម្រស់ធម្មជាតិ ជាជំនួញរបស់នាងក៏ដាច់កុងត្រាអស់ហើយដែរ។ ជាក់ស្តែង បច្ចុប្បន្ន តារាចម្រៀងសំឡេងផ្អែមរូបនេះ នៅជាប់តែការងារជាមួយ បុរីបុស្បា តែប៉ុណ្ណោះ។
ម្ចាស់បទ «ដោះសា» បន្ថែមថា ជុំវិញការបញ្ចប់កុងត្រាជាមួយផលិតកម្ម រាម នេះដែរ គឺមិនមែនដោយសារមានជម្លោះ ឬបញ្ហាអ្វីនោះឡើយ។ ហេតុផល គឺដោយសារខាងផលិតកម្មចង់ផ្តោតទៅលើវិស័យភាពយន្ត ហើយរូបនាងផ្ទាល់ក៏មិនសូវមានពេលវេលាគ្រប់គ្រាន់ ខណៈបទចម្រៀងត្រូវបញ្ចេញច្រើនធ្វើឱ្យនាងមានអារម្មណ៍ហត់ ដូច្នេះទើប ចង់ដកឃ្លាមកធ្វើបែបសន្សឹមៗមួយៗវិញម្តង។ ម៉្យាង ពេលនេះនាងទើបប្រកាសបើកក្រុមហ៊ុនផ្ទាល់ខ្លួន និងសម្ពោធផលិតផលថ្មីដំបូងផង ធ្វើឱ្យនាងកាន់តែមមាញឹកខ្លាំងឡើង។
ដ្បិតប្រកាសបញ្ចប់ងារជាតារាចម្រៀងកុងត្រាក៏ពិតមែន ប៉ុន្តែ សោភា អះអាងមិនបោះបង់សិល្បៈ និងការច្រៀងនោះទេ ផ្ទុយទៅវិញនាងនឹងយកចំណូលពីការលក់ផលិតផលមកជួយការងារសិល្បៈ តាមរយៈការពង្រឹងគុណភាពបទចម្រៀងថ្មីៗ ព្រោះឆ្នាំថ្មីនេះនាងមានគម្រោងផលិតចម្រៀងជាអាល់ប៊ុម នៅក្នុងផលិតកម្មផ្ទាល់ខ្លួនឈ្មោះថា Camtrax Music ដែលការងាកមកផលិតចម្រៀងផ្ទាល់ខ្លួនត្រូវការចំណាយដើមទុនធំ ដើម្បីពង្រឹងការផលិតឱ្យបទចម្រៀង និង MV ចម្រៀងចេញមកមានគុណភាពស្តង់ដាអាចទទួលយកបាន។
មាស សុខសោភា បង្ហើបថា អាល់ប៊ុមថ្មីដែលគ្រោងផលិតនោះជាប្រភេទ Mini album មានចម្រៀងប្រហែល ៥-៦ បទ ដែលភាគច្រើនបទចម្រៀងទាំងនោះរៀបរាប់ និងលើកតម្កើងពីមនុស្សស្រី និងភាពរឹងមាំរបស់មនុស្សស្រីក្នុងយុគសម័យឌីជីថលទំនើប។ យ៉ាងណាមិញ រាជនីសំឡេងផ្អែមរូបនេះ នៅមិនទាន់អាចកំណត់ថា អាល់ប៊ុមអាចនឹងបញ្ចប់នៅពេលណាមួយឱ្យប្រាកដនោះទេ ព្រោះសព្វថ្ងៃនាង និងក្រុមការងារម្នាក់ៗរវល់ខ្លាំង មិនទាន់អាចដកឃ្លាបាន៕























Account
Security
Favourite Content