Lee Si Young បានសម្រេចប្រើប្រាស់អំប្រ៊ីយ៉ុងបង្កកំណើតកក របស់អតីតស្វាមី ដើម្បីពពោះកូនទី ២ បើទោះបីជាជីវិតអាពាហ៍ពិពាហ៍បានបញ្ចប់ទៅហើយក្ដី។

នៅថ្ងៃទី ៨ ខែកក្កដានេះ តារាកូរ៉េខាងត្បូង Lee Si Young បានប្រកាសជាសាធារណៈនៅលើគណនី Instagram ថា នាងកំពុងតែមានផ្ទៃពោះ តាមរយៈការបង្កកំណើតសិប្បនិម្មិត ដោយប្រើប្រាស់អំប្រ៊ីយ៉ុងរបស់អតីតស្វាមី គឺលោក Cho Seong-hyun ដែលបានបង្កកទុកតាំងតែពីពេលដែលអ្នកទាំងពីរនៅជាប្ដីប្រពន្ធគ្នានៅឡើយ។
ជាក់ស្ដែង Lee Si Young បានរៀបរាប់ថា៖ “នៅពេលដែលទំនាក់ទំនងរបស់ខ្ញុំជាមួយអតីតដៃគូបានឈានដល់ទីបញ្ចប់ អំប្រ៊ីយ៉ុងដែលបានបង្កកទុកអស់ពេលជាង ៥ឆ្នាំទៅហើយនោះ ក៏ជិតដល់កាលបរិច្ឆេទផុតកំណត់ដូចគ្នា។ ខ្ញុំមិនអាចបោះបង់វាចោលទេ ទើបខ្ញុំសម្រេចចិត្តពពោះតែម្នាក់ឯង”។
ដ្បិតមិនមានការយល់ស្របពីអតីតស្វាមីក្ដី តារាស្រីវ័យ ៤៣ឆ្នាំរូបនេះ បានបង្ហាញជំហររបស់ខ្លួនថា នឹងបំពេញតួនាទីរបស់ខ្លួនឱ្យពេញទី ហើយចាត់ទុកការសម្រេចចិត្តនេះ គឺជាការសម្រេចចិត្តដ៏មានតម្លៃ និងអត្ថន័យបំផុតសម្រាប់នាង។

យ៉ាងណាមិញ ថ្វីបើ លោក Cho Seong-hyun មិនបានយល់ស្របទៅនឹងគំនិតនេះនៅគ្រាដំបូងក្ដី តែលោកបានបង្ហាញការតាំងចិត្ត បំពេញតួនាទីជាឪពុកចំពោះកូនទី ២របស់ខ្លួន ព្រោះបច្ចុប្បន្ននេះ លោកនៅតែរក្សាទំនាក់ទំនងជាមួយនឹងអតីតភរិយាជាប្រចាំ ដើម្បីមើលថែកូនប្រុសទី ១រួមគ្នា។
គួរឱ្យដឹងផងដែរថា Lee Si Young និងស្វាមីអ្នកជំនួញ Cho Seong-hyun បានរៀបការជាមួយគ្នានៅក្នុងឆ្នាំ ២០១៧ ដោយមានកូនប្រុសដំបូងរួមគ្នា មានឈ្មោះថា Jung Yoon។ ក្រោយរួមរស់អស់ពេល ៨ ឆ្នាំ នៅខែមីនា ឆ្នាំ ២០២៥នេះ អ្នកទាំងពីរបានប្រកាសថា ជីវិតជាប្ដីប្រពន្ធរបស់ខ្លួនបានមកដល់ទីបញ្ចប់ហើយ៕
























Account
Security
Favourite Content