ជឿជាក់ថាប្រិយមិត្តអ្នកនិយមតាមដានជីវិតឯកជនរបស់សិល្បករ-សិល្បការិនី ពិតជ្រាបច្បាស់ហើយថា តារាស្រីហាយសូ គង់ ចាន់ស្រីមុំ និងស្វាមី គឹម សីហា រមែងតែងធ្វើដំណើរកម្សាន្តទៅក្រៅប្រទេសជាលក្ខណៈគ្រួសារ ហើយផ្តិតយករូបភាពអនុស្សាវរីយ៍ស្រស់ស្អាតបង្ហោះលើបណ្តាញសង្គមទៀតផង។
តួយ៉ាង ប៉ុន្មានថ្ងៃមុននេះនាងបានដកឃ្លាការងារសិល្បៈ និងមុខជំនួញនៅខ្មែរ ធ្វើដំណើរទៅទឹកដីអាមេរិក ដែលនេះជាលើកទី១ហើយដែលនាង និងក្រុមគ្រួសារធ្វើដំណើរទៅទីនោះ។ គ្រាន់តែដល់ទឹកដីសហរដ្ឋអាមេរិកភ្លាម តារាស្រីរាងតូចច្រឡឹងរូបនេះ និងគ្រួសារ ចាប់ផ្តើមចេញដើរកម្សាន្តតាមទីតាំងល្បីៗ ដែលទេសចរនិយមទៅកម្សាន្ត ថែមទាំងថតរូបស្អាតៗបង្ហោះលើបណ្ដាញសង្គមទៀតផង។



យោងតាមការបង្ហោះរបស់អ្នកនាង យ៉ាន លីនដា បង្ហាញឱ្យដឹងថា គង់ ចាន់ស្រីមុំ និងស្វាមី មិនមែនត្រឹមតែទៅដើរកម្សាន្តនៅទឹកដីសម្បូរដុល្លារនោះប៉ុណ្ណោះទេ តែអ្នកទាំងពីរថែមទាំងឆ្លៀតពេលរកលុយនៅទីនោះទៀតផង ដោយត្រៀមចូលរួមកម្មវិធីមួយជាមួយអ្នកនាង។
តាមរយៈផ្ទាំងផ្សព្វផ្សាយ (Poster) លើគណនី Instagram របស់ យ៉ាន លីនដា បញ្ជាក់ឱ្យដឹងថា អ្នកនាង រួមទាំង តារាសម្តែង គង់ ចាន់ស្រីមុំ និង គឹម សីហា, គឿន នភាល័យ និងតារាសម្តែង ពឹង ពុទ្ធិស័ក្ក នឹងមានការប្រគំតន្រ្តីពិសេសមួយ នៅថ្ងៃទី៧ ខែមេសា ខាងមុខនេះ នៅ Stockton Ballroom។ ភ្ជាប់ជាមួយផ្ទាំងផ្សព្វផ្សាយ សិល្បករខ្មែរទាំង ៥ រូបក៏បានអំពាវនាវ ឱ្យពុកម៉ែបងប្អូនខ្មែរកំពុងរស់នៅសហរដ្ឋអាមេរិកចូលរួមទទួលយកភាពសប្បាយរីករាយឱ្យបានច្រើនកុះករផងដែរ។
ក្រៅពីសិល្បករខ្មែរទាំង៥រូបខាងលើ តន្ត្រីសម័យ MOONLIGHT BAND និង តន្រ្តីស្រុកស្រែ DONTREY SROK SRAE ក៏មានវត្តមានក្នុងកម្មវិធីជាមួយគ្នានេះផងដែរ៕
























Account
Security
Favourite Content