បកត្រឡប់ទៅកាលពីឆ្នាំ ២០១៧ តារាសម្ដែងប្រុសកូរ៉េល្បី Kim WooBin បានប្រកាសថាលោកមានជំងឺមហារីកបំពង់ក និងត្រូវផ្អាកការងារសិល្បៈមួយរយៈដើម្បីសម្រាកព្យាបាលជំងឺរបស់ខ្លួន។ ដំណឹងនេះដែរ ពិតជាបានធ្វើឱ្យអ្នកគាំទ្រជាច្រើនហាក់មានការតក់ស្លុត និងព្រួយបារម្ភជាខ្លាំង។

មែនទែនទៅ តារាប្រុសវ័យ ៣៣ ឆ្នាំនេះ បានឈប់ពីសិល្បៈអស់ប្រមាណជា ២ ឆ្នាំរហូតដល់ឆ្នាំ ២០១៩ លោកចាប់ផ្ដើមទទួលការងារសិល្បៈវិញដោយថតរឿងភាគខ្លីៗ សិនប៉ុណ្ណោះ និងចង់មើលថែសុខភាពឱ្យល្អសិនទើបលោកអាចត្រឡប់មកធ្វើការងារសិល្បៈបានដូចកាលពីមុនបាន។ ក្នុងឆ្នាំ ២០២២ លោកក៏បានបង្ហាញខ្លួនសាជាថ្មីក្នុងរឿងភាគមានចំណងជើងថា “Our Blues” ស្របពេលដែលរឿងនេះក៏ទទួលបានការគាំទ្រយ៉ាងខ្លាំងពីអ្នកគាំទ្រ។
ថ្មីៗ នេះ លោកបានចូលរួមជាភ្ញៀវកិត្ដិយសក្នុងកម្មវិធី “Quiz On The Block” និងបាននិយាយពីរៀបរាប់ពីអារម្មណ៍របស់លោកបន្ទាប់ពីតស៊ូប្រឆាំងជាមួយជំងឺមហារីកអស់រយៈពេលជាង ២ ឆ្នាំ។ Kim WooBin បានលើកឡើងថា លោកពិតជាមានអារម្មណ៍ភ័យខ្លាចកាលពីដំបូងៗ ចុះប្រសិនបើលោកមិនជាសះស្បើយ និងមិនអាចវិលត្រឡប់ចូលសិល្បៈវិញបាន តើរឿងនឹងទៅជាយ៉ាងណា?


លោកបានបន្ដថា ដោយសារតែមានអារម្មណ៍ភ័យខ្លាចខ្លាំង លោកចាប់ផ្ដើមស្រកគីឡូខ្លាំង ជាពិសេសសុខភាពផ្លូវកាយ ផ្លូវចិត្តរបស់លោកគឺចាប់ផ្ដើមថយចុះដូចគ្នា។ អ្វីដែលលោកបារម្ភ និងភ័យខ្លាចគឺមិនអាចត្រឡប់ទៅសម្ដែងរឿងវិញ។ លោកពិតជាអរគុណដល់មនុស្សក្បែរខ្លួនលោកដែលតែងតែលើកទឹកចិត្ត និងគាំទ្រនៅក្បែរទើបលោកមានកម្លាំងចិត្តឡើងវិញ។
លោកបន្ថែមថា មួយរយៈពេលដែលលោកតស៊ូប្រឆាំងជំងឺមហារីកគឺជាវិស្សមកាលមួយសម្រាប់ឱ្យលោកគិតពិចារណាអំពីសុខភាពរបស់ខ្លួន។ សុខភាពពិតជារឿងសំខាន់មួយដែលមិនគួរមើលរំលង។



ជាចុងក្រោយលោកបានលើកឡើងថា ជំងឺមួយនេះបានផ្ដល់មេរៀនជាច្រើនដល់លោក គឺឱ្យចេះស្រឡាញ់មើលថែសុខភាព និងមានពេលវេលាយកចិត្តទុកដាក់ជាមួយក្រុមគ្រួសារផងដែរ។
គួរបញ្ជាក់ថា តារាប្រុស Kim WooBin ក៏ត្រៀមត្រឡប់មកវិញជាមួយរឿងភាគថ្មីរបស់ Netflix ផងដែរ ដោយរឿងនោះមានចំណងជើងថា “Black Knight” ដែលត្រៀមចាក់ផ្សាយនៅថ្ងៃទី ១២ ខែ ឧសភា ឆ្នាំ ២០២៣ ខាងមុខនេះ៕



























Account
Security
Favourite Content