ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ក្នុងនាមជាសមាជិកក្មេងជាងគេក្នុងក្រុម Jung Kook, Dino, Huening Kai, Eun Chae និង Hyein ត្រូវបានអ្នកគាំទ្រជាច្រើនទទួលស្គាល់ថាមានមន្តស្នេហ៍ខ្លាំង ព្រមជាមួយទេពកោសល្យចម្រុះរបស់ពួកគេ។
Jung Kook (BTS)៖ មានរហស្សនាមជា “Golden maknae” ឬសមាជិកពៅមាសរបស់ BTS, Jung Kook មិនត្រឹមតែត្រូវបានមហាជនក្នុងស្រុក និងអន្តរជាតិទទួលស្គាល់ថាមានទេពកោសល្យពូកែប៉ុណ្ណោះទេ ប៉ុន្តែនៅក្នុងបទសម្ភាសន៍មួយ លោក Son Seung Deuk ដែលជានាយកច្នៃប្រឌិតជាន់ខ្ពស់ និងជាអ្នកបង្កើតក្បាច់រាំរបស់ Big Hit ក៏បានសរសើរទេពកោសល្យ និងភាពស្វាហាប់របស់ Jung Kook ដែរ។
លោកបាននិយាយថាសមាជិក BTS សុទ្ធតែមានទេពកោសល្យ ប៉ុន្តែ Jungkook គឺជាសមាជិកលេចធ្លោជាងគេ។ ជាមួយគ្នានេះ លោកក៏បានបញ្ជាក់ដែរថា តារាប្រុសកើតឆ្នាំ ១៩៩៧ រូបនេះគឺជាគំរូដ៏សំខាន់របស់ Idol ដែលមិនត្រឹមតែមានអត្តចរិតល្អ តែថែមទាំងមានទេពកោសល្យគ្រប់ជ្រុងជ្រោយក្នុងវិស័យ Kpop ផងដែរ។
ថ្មីៗនេះ ទស្សនាវដ្ដីដ៏ល្បីល្បាញរបស់អាមេរិក – Rolling Stone បានប្រកាសបញ្ជីឈ្មោះអ្នកចម្រៀងដ៏អស្ចារ្យបំផុតទាំង ២០០ នាក់ក្នុងប្រវត្តិសាស្ត្រ ហើយក្នុងនោះ Jungkook គឺជាតារាប្រុសកូរ៉េតែម្នាក់គត់ដែលបានជាប់ក្នុងតារាង ដោយស្ថិតនៅចំណាត់ថ្នាក់លេខ ១៩១ វ៉ាដាច់ Billie Eilish ដែលនៅលេខ ១៩៨។ Rolling Stone បានបញ្ចេញមតិថា “Jung Kook គឺជាសមាជិកវ័យក្មេងដែលមានទេពកោសល្យពហុជំនាញពី BTS ។ លោកជាសិល្បករដ៏អស្ចារ្យម្នាក់ដែលមានសមត្ថភាពនិពន្ធបទចម្រៀងគួរឱ្យចាប់អារម្មណ៍ និងត្រូវគេស្គាល់សម្រាប់អត្តចរិតខិតខំប្រឹងប្រែង និងសុភាពរាបសា”។
នៅអាយុ ២៥ ឆ្នាំ Jungkook ទទួលបានសមិទ្ធិផលដ៏អស្ចារ្យ ដែលបានជួយឱ្យរូបគេត្រូវបានទទួលស្គាល់ថាជាអ្នកមានទេពកោសល្យវ័យក្មេងដ៏កម្រនៅក្នុងវិស័យសិល្បៈពិភពលោក។
Dino (Seventeen)៖ ដោយសារសមត្ថភាពដ៏ទូលំទូលាយរបស់ខ្លួន សមាជិកកូនពៅរបស់ Seventeen, Dino ត្រូវបានគេស្គាល់ថាជាអនាគតនៃវិស័យចម្រៀងប៉ុបកូរ៉េឬ “The Future of Kpop” ។ ល្បីល្បាញក្នុងនាមជាក្រុមចម្រៀងដែលផលិតបទដោយខ្លួនឯង សមាជិក Seventeen បានចូលរួមក្នុងការនិពន្ធ ផលិតបទភ្លេង ក៏ដូចជាក្បាច់រាំផងដែរ។ នៅក្នុងនោះ Dino បានបង្ហាញពីភាពប៉ិនប្រសប់របស់គេក្នុងនាមជាអ្នកនិពន្ធបទភ្លេងសម្រាប់បទចម្រៀងជាច្រើនរបស់ក្រុម។
មិនត្រឹមតែពូកែរាំ រ៉េប និងច្រៀង តែសមាជិកកូនពៅរបស់ HYBE Labels មួយរូបនេះក៏ត្រូវបានគេសរសើរយ៉ាងខ្លាំងចំពោះសម្រស់ដ៏មន្តស្នេហ៍របស់គេ។ តារាប្រុសកើតឆ្នាំ ១៩៩៩ រូបនេះគឺជាសមាជិកម្នាក់ក្នុងចំណោមសមាជិក Seventeen មួយចំនួនដែលលេចធ្លោនៅក្នុងវិស័យម៉ូដ និងការផ្សាយពាណិជ្ជកម្ម។ ដោយមានរូបរាងគួរឱ្យចាប់អារម្មណ៍ Dino បានក្លាយជាអ្នកតំណាងរបស់ម៉ាកយីហោជាច្រើនក្នុងឧស្សាហកម្មសម្រស់។
Huening Kai (TXT)៖ សមាជិកក្មេងជាងគេរបស់ TXT គឺជាតារាមានឈាមជ័របរទេសដំបូងគេរបស់ Big Hit Entertainment ។ ក្រៅពីសម្រស់កូនកាត់ដ៏គួរឲ្យចាប់អារម្មណ៍ Huening Kai ក៏មានសមត្ថភាពលេងឧបករណ៍ភ្លេងផងដែរ។ ជាមួយរហស្សនាមថា “អ្នកលេងភ្លេងអច្ឆរិយៈ” រូបគេចេះលេងទាំងស្គរ ហ្គីតា ព្យាណូ និងខ្លុយយ៉ាងប៉ិនប្រសប់តាំងពីក្មេង។
លើសពីនេះទៅទៀត តារាប្រុសកើតឆ្នាំ ២០០២ រូបនេះអាចប្រើប្រាស់និយាយ ៤ភាសាយ៉ាងស្ទាត់ជំនាញរួមមាន កូរ៉េ ចិន ព័រទុយហ្គាល់ និងអង់គ្លេស។ ដូច្នេះហើយ គេតែងតែទទួលតួនាទីជា “អ្នកនាំពាក្យ” សម្រាប់ TXT គ្រប់ពេលដែលក្រុមមានកម្មវិធីនៅក្រៅប្រទេស។
មិនតែប៉ុណ្ណោះ Huening Kai ក៏ត្រូវបានទទួលស្គាល់ផងដែរសម្រាប់សមត្ថភាពនិពន្ធ និងផលិតចម្រៀង។ សមាជិកក្មេងជាងគេរបស់ TXT ត្រូវបានចុះឈ្មោះនៅលើគេហទំព័រសមាគមរក្សាសិទ្ធិតន្ត្រីកូរ៉េ (KOMCA) ជាមួយនឹងបទចម្រៀង ” Roller Coaster” ដែលជាបទក្នុងអាល់ប៊ុម “The Dream Chapter: Magic” របស់ TXT។ អ្វីដែលគួរឱ្យកត់សម្គាល់គឺនៅពេលនោះ រូបគេមានអាយុត្រឹមតែ ១៧ ឆ្នាំ ហើយទើបបង្ហាញខ្លួនជាមួយ TXT បាន ៩ខែប៉ុណ្ណោះ។
Eun Chae (LeSserafim)៖ ថ្វីត្បិតតែមានអាយុត្រឹម ១៧ ឆ្នាំក៏ដោយ ប៉ុន្តែ Eun Chae ត្រូវបានគេវាយតម្លៃថាជាតារា Kpop ជំនាន់ថ្មីដ៏មានទេពកោសល្យខ្លាំងមួយរូប។ Eun Chae ធ្លាប់ចូលរួមក្លឹប Def Dance Skool ជិតពីរឆ្នាំ ដូច្នេះហើយនាងបានដើរតួជាអ្នករាំសំខាន់របស់ក្រុម។
យោងតាម Naver តារាស្រីកើតឆ្នាំ ២០០៦រូបនេះបានឆ្លងផុតវគ្គជ្រើសរើសរបស់ក្រុមហ៊ុនធំៗទាំងពីរគឺ JYP Entertainment និង Pledis Entertainment ។ យ៉ាងណាមិញ នៅទីបំផុតនាងបានជ្រើសរើសចូលរួមជាមួយ Source Music ហើយបន្ទាប់ពីធ្វើជាអ្នកហ្វឹកហាត់បានមួយឆ្នាំ Eun Chae ក៏បានបង្ហាញខ្លួនជាផ្លូវការក្នុងក្រុមចម្រៀងស្រីដំបូងរបស់ HYBE គឺ LeSserafim។
មិនត្រឹមតែមានសមត្ថភាពរាំដ៏ពូកែ ប៉ុន្តែ Eun Chae ក៏ត្រូវបានគេកោតសរសើរខ្លាំងចំពោះទឹកដមសំឡេង និងការសម្ដែងរបស់នាង។ ជាការកត់សម្គាល់ នៅក្នុងការវិលត្រលប់ចុងក្រោយរបស់ក្រុមជាមួយនឹងបទចម្រៀង “Anti-fragile” Eun Chae ចាប់ផ្តើមទទួលបានការចាប់អារម្មណ៍យ៉ាងខ្លាំងពីទស្សនិកជន។ រូបរាងដ៏គួរឱ្យស្រឡាញ់ បុគ្គលិកលក្ខណៈសប្បាយៗ ភាពឆ្លាតវៃ ភាពស្លូតបូតរបស់សមាជិកក្មេងជាងគេនៃក្រុម LeSserafim រូបនេះ ជួយឱ្យនាងក្លាយជាទីចាប់អារម្មណ៍ខ្លាំងបន្តិចម្តងៗ។
Hyein (NewJeans)៖ ថ្វីត្បិតតែមានអាយុ ១៥ ឆ្នាំក៏ដោយ ប៉ុន្តែ Hyein បានធ្វើឱ្យមានការចាប់អារម្មណ៍យ៉ាងខ្លាំងនៅក្នុងវិស័យចម្រៀងកូរ៉េ។ មានទាំងទេពកោសល្យ និងបទពិសោធន៍ក្នុងការសម្តែង Hyein បានបង្ហាញពីភាពទាក់ទាញ និងទំនុកចិត្តរបស់នាងភ្លាមៗ ចាប់តាំងពីថ្ងៃដំបូងនៃការបង្ហាញខ្លួនជាមួយ NewJeans ។
មិនត្រឹមតែមានទេពកោសល្យទេ តារាស្រីកើតក្នុងឆ្នាំ ២០០៨ ក៏មានភាពទាក់ទាញខ្លាំងក្នុងវិស័យហ្វេសិនផងដែរ។ រយៈពេលត្រឹមតែ ៦ ខែក្រោយការបង្ហាញខ្លួន Hyein បានជាប់ចំណាត់ថ្នាក់កំពូលនៃចំណាត់ថ្នាក់កេរ្តិ៍ឈ្មោះតារាស្រីនៅក្នុង Kpop ជាប់ជានិច្ច។
ថ្មីៗនេះ សមាជិកក្មេងជាងគេរបស់ NewJeans ក៏មានវត្តមាននៅក្នុងបញ្ជីតារាស្រី Kpop ទាំង ៨ រូបក្នុងឆ្នាំ ២០២២ ដែលប្រកាសដោយទស្សនាវដ្តី Korean Cosmopolitan ។ ដោយសារការខិតខំប្រឹងប្រែងក្នុងសិល្បៈតាំងពីកុមារភាពមក ដល់អាយុ ១៥ ឆ្នាំ Hyein មានទ្រព្យសម្បត្តិគួរឱ្យកត់សម្គាល់នៅក្នុងដៃ។ ប្រព័ន្ធផ្សព្វផ្សាយកូរ៉េប៉ាន់ប្រមាណថាសមាជិកក្មេងជាងគេនៃគ្រួសារ HYBE បច្ចុប្បន្នមានទ្រព្យសម្បត្តិប្រហែល 1.5 លានដុល្លារ ដែលជាចំនួនច្រើនបំផុតក្នុងចំណោមសមាជិក NewJeans ។
ទន្ទឹមនឹងភាពល្បីល្បាញក្នុងនាមជាតារាចម្រៀងស្រីរបស់ HYBE, Hyein ក៏ត្រូវបានម៉ាកយីហោ Louis Vuitton ជ្រើសរើសជាអ្នកតំណាងវ័យក្មេងបំផុតរបស់ខ្លួនដែរ។ ដូច្នោះហើយកេរ្តិ៍ឈ្មោះតារាស្រីវ័យ១៥ឆ្នាំរូបនេះត្រូវបានគេរំពឹងថាកាន់តែឡើងខ្លាំងបន្តទៀតទៅថ្ងៃអនាគត ៕
Account
Security
Favourite Content