ក្នុងអំឡុងពេលនៃការចាក់ផ្សាយកម្មវិធីព័ត៌មាន Scandal Supervisor របស់ស្ថានីយទូរទស្សន៍ JTBC កាលពីថ្ងៃទី២១ ខែធ្នូ ឆ្នាំ ២០២៣ លោក Yang Won Bo ជាអ្នកអត្ថាធិប្បាយព័ត៌មាន បានចេញមុខសុំទោសតារាចម្រៀង G-Dragon ទាក់ទងនឹងការផ្សាយព័ត៌មានជុំវិញរឿងពាក្យចចាមអារ៉ាមគ្រឿងញៀន កន្លងទៅថ្មីៗនេះ។

Yang Won Bo បានទទួលស្គាល់ថាការផ្សាយរបាយការណ៍នៃដំណាក់កាលដំបូងក្នុងការស៊ើបអង្កេតរបស់ប៉ូលីស គឺពិតជាមានខ្លឹមសារ និងព័ត៌មានមិនសមរម្យមែនដែលធ្វើឱ្យប៉ះពាល់ដល់ទឹកចិត្តរបស់តារាចម្រៀង G-Dragon រួមទាំងអ្នកគាំទ្ររបស់តារាចម្រៀងប្រុសរូបនោះផងដែរ។ ដូច្នេះលោកពិតសូមអភ័យទោសយ៉ាងស្មោះអស់ពីចិត្តចំពោះទង្វើមួយនេះ។


ក្នុងរយៈពេល ២ ខែមកនេះ JTBC បានផ្សាយអំពីព័ត៌មានមិនពិតជាច្រើនជុំវិញករណីគ្រឿងញៀនរបស់តារាចម្រៀងប្រុសរូបនេះ ថែមទាំងមានពាក្យពេចន៍សើចចំអកលោកទៀតផង។ ជាក់ស្ដែងនៅពេលដែល G-Dragon បានបង្ហាញខ្លួននៅប៉ុស្ដិ៍ប៉ូលីស អ្នកអត្ថាធិប្បាយ Yang Won Bo បានរិះគន់ទៅលើអាកប្បកិរិយារបស់ម្ចាស់បទ “A BOY” ដោយសារលោកមិនបាននិយាយសុំទោសជាសាធារណៈ រួមជាមួយការផ្សាយព័ត៌មានដែលបានប្រើចំណងជើងមិនសមរម្យមួយចំនួនទៀតផង។

គួរបញ្ជាក់ផងដែរថាក្រោយចុះកិច្ចសន្យាផ្ដាច់ជាមួយក្រុមហ៊ុន Galaxy ហើយ អំឡុងពេលសន្និសីទសារព័ត៌មាន កាលពីថ្ងៃទី២១ ខែធ្នូ ថ្មីៗនេះ លោក Jo Sung Hae នាយកប្រតិបត្តិរបស់ក្រុមហ៊ុន Galaxy បានប្រកាន់ជំហរយ៉ាងម៉ឺងម៉ាត់ ដោយប្រកាសថាក្រុមហ៊ុននឹងចាត់វិធានការយ៉ាងតឹងរ៉ឹងចំពោះបុគ្គលណាដែលបានបង្ហោះសារមានខ្លឹមសារបង្ខូចកេរ្ដិ៍ឈ្មោះ ការរាយការណ៍ព័ត៌មានមិនពិត ឬវីដេអូរបស់ G-Dragon។
ក្រុមហ៊ុននឹងទុកពេលឱ្យមួយសប្ដាហ៍គឺពីថ្ងៃទី២១-២៨ ខែធ្នូ ដើម្បីលុបចោលរាល់ព័ត៌មានទាំងឡាយណាដែលមានទាក់ទងជាមួយបញ្ហាគ្រឿងញៀនរបស់តារាចម្រៀង G-Dragon។ លើសពីនេះក្រុមហ៊ុនក៏អំពាវនាវដល់ប្រព័ន្ធផ្សព្វផ្សាយទាំងអស់ឱ្យមានការអត់ធ្មត់ក្នុងការរាយការណ៍ព័ត៌មានណាមួយជុំវិញបញ្ហាគ្រឿងញៀនសិល្បកររបស់ខ្លួនដោយសង្កត់ធ្ងន់ទៅលើសារៈសំខាន់ និងផលប៉ះពាល់ដល់ការបន្តសកម្មភាពសិល្បរបស់ G-Dragon ផងដែរ៕























Account
Security
Favourite Content