ប្រជាជននៅតាមបន្ទាត់ព្រំដែនខ្មែរ បានរត់ភៀសខ្លួនទៅកាន់ទីសុវត្ថិភាព បន្ទាប់ពីសៀមបានចូលឈ្លានពាន និងបាញ់ប្រហារមកលើភូមិឋានតាំងពីព្រឹកព្រលឹមថ្ងៃ ៨ ខែធ្នូ ឆ្នាំ ២០២៥។ ដោយមើលឃើញពីទុក្ខលំបាករបស់ប្រជាជនខ្មែរ ដែលរត់ភៀសសឹកចេញពីផ្ទះរបស់ខ្លួន ទាំងគ្មានបានយកអ្វីជាប់ខ្លួន ធ្វើឲ្យសិល្បករខ្មែរជាច្រើនមិនបានឱបដៃឈរមើលឡើយ។


ក្នុងនោះ ហេង វិសាល ព្រមទាំងភរិយា ជា ស្រីនា និងបងប្រុស ហេង វាសនា បានចេញវីដេអូទាំងទឹកមុខស្រពោនខ្លាំង ដោយបើកទទួលជំនួយផ្សេងៗមិនថាជាថវិកា និងសម្ភារៈផ្សេងៗឡើយ។ សម្រាប់អ្នកដែលមានអីវ៉ាន់ ដែលចង់ផ្ញើតាមរយៈលោក អាចយកទៅទុកនៅ Eat More ដែលមានទីតាំងនៅបឹងកក់។
ហេង វិសាល បានឲ្យដឹងថា សម្ភារៈដែលមហាជនបរិច្ចាគចាំបាច់ខ្លាំងណាស់សម្រាប់ប្រជាពលរដ្ឋខ្មែរក្មេង-ចាស់ ប្រុស-ស្រី ដែលចាកចេញពីលំនៅឋានភ្លាមៗ និងមិនបានយកអ្វីជាប់ខ្លួនឡើយ ដើម្បីរកទីជម្រកសុវត្ថិភាពជាមុនសិន។ ក្នុងនោះ អ្វីចាំបាច់បំផុតមានទាំង ភួយ, តង់, សម្លៀកបំពាក់ក្រាស់ៗទប់ទល់អាកាសធាតុត្រជាក់, ចំណីអាហារហូបចុក និងរបស់របរចាំបាច់សម្រាប់ស្រ្តី ហើយសំខាន់បំផុតគឺទឹកដោះគោ សម្រាប់ទារក និងកុមារតូចៗ។



ក្រៅពីអីវ៉ាន់ចាំបាច់ដូចបានរៀបរាប់ ស្រីនា ក៏បន្ថែមទៀតថា កម្លាំងពលកម្មសម្រាប់ជួយរៀបចំ វិចខ្ចប់ លើដាក់សម្ភារៈយកទៅទីតាំងជំរំ ក៏នាងត្រូវការអ្នកស្ម័គ្រចិត្តមកជួយដូចគ្នាដែរ ប្រសិនបើនរណាមានពេលទំនេរ អាចមកជួយបានចាប់ពីម៉ោង ៣ រសៀល នៅ Eat More ដែលមានអាសយដ្ឋាននៅបឹងកក់ ចាប់ពីថ្ងៃ ៩ ខែធ្នូ ឆ្នាំ ២០២៥។
អ្នកបង្កើតមាតិកា ហេង វិសាល បានបន្ថែមថា ជំនួយដែលលោកទទួលបានមិនមែនជារបស់នរណាម្នាក់ឡើយ តែជារបស់ខ្មែរទាំងមូល ហើយជាចុងក្រោយអ្នកទាំង ៣ បានអរគុណស្មោះអស់ពីចិត្ត និងបួងសួងឲ្យកម្ពុជាឆាប់រួចផុតពីរឿងអាក្រក់ៗទាំងឡាយ៕


រូបភាព៖ Heng Visal និង អ៊ីន ធឺណេត























Account
Security
Favourite Content