នៅថ្ងៃទី៣ ខែកុម្ភៈនេះ Galaxy Corporation បានដាក់ឱ្យប្រើប្រាស់ជាផ្លូវការនូវសមាគមន៍អ្នកគាំទ្ររបស់ G-Dragon មានឈ្មោះថា b.stage ស្របពេលដែលអាល់ប៊ុមទោលរបស់តារាចម្រៀងរូបនេះកំពុងតែត្រៀមចេញផ្សាយនៅចុងខែកុម្ភៈ អមដោយកម្មវិធីប្រគំតន្ត្រីនៅក្នុងខែមីនា។

ក្រោយពីសម្រាកពីការងារចម្រៀងអស់ពេលជាង ១១ឆ្នាំ តារាខេប៉ុបវ័យ ៣៦ ឆ្នាំបានត្រឡប់មកសម្រុកការងារនៅក្នុងវិស័យចម្រៀងសាជាថ្មី ដោយមានបញ្ចេញនូវសកម្មភាពនានាជាបន្តបន្ទាប់ ជាក់ស្ដែងដូចជាបទ Power ជាដើម។ បន្ថែមពីនេះ នៅថ្ងៃទី៣ ខែកុម្ភៈកន្លងទៅ ទីភ្នាក់ងាររបស់ G-Dragon ទើបតែបានបើកបង្ហាញសមាគមន៍អ្នកគាំទ្រថ្មី b.stage ដែលបង្កើតឡើងក្នុងគោលបំណងផ្សាភ្ជាប់ទំនាក់ទំនងរវាងសិល្បកររបស់ខ្លួន និងអ្នកគាំទ្រពីជុំវិញពិភពលោកឱ្យកាន់តែមានភាពល្អប្រសើរជាងមុន តាមរយៈការចែករំលែកមាតិកាផ្លូវការ និង ព័ត៌មានពីសកម្មភាពផ្សេងៗពីតារារូបនេះជាដើម។
តំណាងពីទីភ្នាក់ងាររបស់ស្ដេចខេប៉ុបរូបខាងលើបានឱ្យដឹងថា៖ “យើងបានចាប់ផ្តើមសហគមន៍ b.stage នេះ ដើម្បីជួយសម្រួលដល់ការទំនាក់ទំនងដោយផ្ទាល់ និងសកម្មជាងមុនរវាង G-Dragon និងអ្នកគាំទ្រទូទាំងពិភពលោក។ យើងមានបំណងបន្តពង្រឹងទំនាក់ទំនងដែលមានគុណភាពល្អជាងមុន ខណៈពេលដែលសហគមន៍នេះនឹងធ្វើឱ្យទំនាក់ទំនងរវាងអ្នកគាំទ្រ និងសិល្បករកាន់តែមានភាពជិតស្និទ្ធជាងមុន”។
ដោយឡែក មួយថ្ងៃបន្ទាប់ពីដាក់ឱ្យប្រើប្រាស់ b.stage ពោលគឺនៅថ្ងៃទី៤ ខែកុម្ភៈ សមាជិកក្រុម BIGBANG រូបនេះបានប្រកាសជាផ្លូវការនូវការចេញអាល់ប៊ុមទោលទី ៣របស់ខ្លួន ក្រោយពីអាល់ប៊ុមទី២ Coup d’Etat ដែលបានចេញផ្សាយតាំងតែពីឆ្នាំ ២០១៣ មកម៉្លេះ។
អាល់ប៊ុមថ្មីដែលគ្រោងនឹងចេញផ្សាយនៅថ្ងៃទី ២៥ ខែកុម្ភៈនេះ មានឈ្មោះថា Ubermensch ជាឈ្មោះដែលឬសដើមពីទស្សនវិជ្ជារបស់ Friedrich Nietzsche ដែលសំដៅទៅលើ “Superman” ឬ “Beyond-Man” មានន័យផ្ដោតទៅលើបុគ្គលដែលហ៊ានធ្វើអ្វីហួសពីព្រំដែនដែលខ្លួនបានកំណត់។ តម្រុយនៃអត្ថន័យរបស់ឈ្មោះថ្មីនេះ បានបង្ហាញថាការត្រឡប់មកប្រឡូកក្នុងវិស័យខេប៉ុបនៅគ្រានេះ G-Dragon បា្រកដជានាំយកអ្វីថ្មីៗដែលទស្សនិកជនមិនធ្លាប់បានឃើញជាក់ជាមិនខាន។

ជាដំណឹងល្អមួយទៀតដែរ នៅក្នុងកម្មវិធីប្រគំតន្រ្តី THE LIGHT YEAR របស់មិត្តរួមក្រុម Taeyang ដែលទើបតែបញ្ចប់កាលពីថ្ងៃទី១ កន្លងទៅនេះ សមាជិកមួយរូបទៀតរបស់ BIGBANG គឺ Daesung ក៏បានធ្លោយមាត់និយាយពីកម្មវិធីប្រគំតន្ត្រីរបស់ G-Dragon ផងដែរ។
ជាក់ស្ដែង ក្រោយពីច្រៀងបទ Wings ចប់ Daesung ដែលបានចូលរួមជាភ្ញៀវកត្តិយសជាមួយនឹង G-Dragon បាននិយាយថា៖ វាហាក់ដូចជាមានរឿងល្អជាច្រើនកើតឡើងនៅឆ្នាំនេះ។ យើងមានការប្រគំតន្ត្រីរបស់ Taeyang នៅក្នុងខែកុម្ភៈ ហើយនឹងមានការប្រគំតន្ត្រីរបស់ G-Dragon នៅខែមីនា”។
យ៉ាងណាមិញ ត្បិតព័ត៌មានខាងលើនេះមិនទាន់មានការចេញមកបញ្ជាក់ឱ្យច្បាស់ការណ៍ពីសំណាក់ផលិតកម្ម ឬ G-Dragon ផ្ទាល់ក៏ពិតមែន តែនេះជាដំណឹងល្អមួយបន្ថែមទៀត ឆ្លើយតបនឹងពាក្យចចាមអារ៉ាមកន្លងមក និងជាដំណឹងដែលអ្នកគាំទ្រកំពុងរង់ចាំដូចគ្នា៕
























Account
Security
Favourite Content