BamBam ជាសមាជិកក្រុមចម្រៀងខេប៉ុបល្បី GOT7 និងជាតារាទោលម្នាក់ដែលត្រូវបានគេស្រឡាញ់ចូលចិត្ដយ៉ាងច្រើនផងដែរ។ បន្ទាប់ពីសមាជិកក្រុមចម្រៀង GOT7 ប្រកាសចាកចេញពីផលិតកម្ម JYP សមាជិកម្នាក់ៗ ផ្ដោតលើការងារទោលរបស់ខ្លួន។ សម្រាប់ BamBam ក៏ផ្ដោតលើសកម្មភាពទោលរបស់ខ្លួន និងធ្វើការប្រគំតន្ដ្រីទេសចរណ៍ នៅឯប៉ែកខាងអឺរ៉ុប។



នៅព្រឹកព្រលឹមចូលថ្ងៃទី ២៥ តារាប្រុសរូបនេះបានបង្ហោះសារក្នុងបណ្ដាញសង្គម អ៊ីនស្ដាក្រាមរបស់ខ្លួន និងបានលើកឡើងថា លោកគ្រាន់តែចង់គេង មិនចង់ភ្ញាក់ឡើយ ទីបំផុតលោកអាចសម្រាកបានយ៉ាងស្ងប់សុខ។ ក្រោយការបង្ហោះសារនេះ បានធ្វើឲ្យអ្នកគាំទ្រជាច្រើនហាក់មានការព្រួយបារម្ភយ៉ាងខ្លាំងពីស្ថានភាពរបស់លោក ខ្លាចក្រែងលោកកំពុងមានជួបបញ្ហាអ្វី និងគិតខ្លីថែមទៀត។ ឈ្មោះរបស់លោកក៏បានក្លាយជាប្រធានបទក្ដៅលើបណ្ដាញសង្គម ខណៈម្នាក់ៗ បានបញ្ចេញមតិសាកសួរគ្នាពីស្ថានភាពរបស់លោក ថាតើលោកមានបញ្ហាអ្វី ឬក៏អត់។



រហូតដល់ម៉ោងជាង ៩ ព្រឹក ទើបតារាប្រុសរូបនេះបានលុបសារនោះចោល និងបង្ហោះថ្មីមួយទៀត។ លោកបានលើកឡើងថា លោកមិនមានបញ្ហាអ្វីទេ លោកមិនអីនោះទេ។ លោកបានលើកឡើងថា៖ វាជាដំណើរដ៏វែងឆ្ងាយមួយសម្រាប់លោក ចាប់តាំងពីឆ្នាំមុន រហូតដល់ពេលនេះ ហើយនៅមានដំណើរវែងឆ្ងាយទៀតត្រូវដើរបន្ដ។ លោកកំពុងមានបញ្ហាស្ដ្រេស និងសម្ពាធ រាងកាយរបស់លោកគឺធ្វើមិនបានល្អទេ ពេលខ្លះគឺហាក់មានភាពឆេវឆាវ និងអារម្មណ៍ឆាប់ឡើងចុះ។
លោកបានបន្ដថា៖ លោកនឹងខំប្រឹងធ្វើឲ្យល្អ និងរកពេលវេលាខ្លះសម្រាក លោកនឹងមិនអីនោះទេ។ លោកក៏បានសុំទោសដល់អ្នកគាំទ្រដែលធ្វើឲ្យមានការព្រួយបារម្ភ។



មែនទែនទៅ បើទោះជាមានការបកស្រាយ ក៏អ្នកគាំទ្រ និងមហាជនជាច្រើននៅតែមានការព្រួយបារម្ភចំពោះរូបលោក ដោយលោកប្រហែលអាចកំពុងជួបវិបត្ដិណាមួយដែលពិបាកក្នុងការគិត និងសម្រេច ទើបលោកក្លាយជាបែបនេះ ស្របពេលអ្នកគាំទ្រជាច្រើនក៏បានជូនពរឲ្យលោកឆ្លងផុតពេលវេលាលំបាកទាំងឡាយផងដែរ៕























Account
Security
Favourite Content