កាលពីថ្ងៃទី២៩ ខែកញ្ញា កន្លងទៅ មានបុរសម្នាក់ដែលបានអះអាងថា ខ្លួនជាអ្នកគាំទ្ររបស់តារាចម្រៀង និងរ៉េប Jessi បានទទួលគ្រោះថ្នាក់ដោយការវាយតប់ ក្រោយពីបានសុំតារាស្រីរូបនេះថតរូប។

យោងតាមការរាយកាណ៍របស់សារព័ត៌មាន JTBC ជនរងគ្រោះដែលមានវ័យត្រឹម ១៨ឆ្នាំរូបនេះបានរាយការណ៍ទៅប៉ូលីសថា ខ្លួនបានជួបនឹងតារាកូរ៉េសញ្ជាតិអាមេរិកកាំងរូបនេះនៅផ្លូវតូចមួយក្នុងតំបន់ Apgujeong ទីក្រុងសេអ៊ូល ហើយខ្លួនបានចូលទៅរកតារាក្នុងដួងចិត្តដើម្បីសុំថតរូប តែត្រូវបាននាងធ្វើការបដិសេដ និងសុំទោសសម្រាប់រឿងនេះ។
យ៉ាងណាមិញ ហេតុការណ៍នេះមិនបានបញ្ជាប់ត្រឹមនេះទេ ដោយបន្ទាប់ពីនោះ ស្រាប់តែមានបុរសម្នាក់ទៀត ដើរចូលមកវាយមុខ និងទាត់ធាក់ខ្លួនទៀតផង។ វីដេអូពីកាមេរ៉ាសុវត្ថិភាពនៅទីនោះបានបង្ហាញថា Jessi និងមិត្តនាងក៏ព្យាយាមបញ្ឈប់ហេតុការណ៍នេះដែរ តែមិនយូរប៉ុន្មានពួកគេក៏បានដកថយចេញទៅវិញ។


នៅថ្ងៃតែមួយនោះ ម្ដាយរបស់ជនរងគ្រោះក៏បានទៅរកដំណោះស្រាយនៅឯផលិតកម្មរបស់តារាស្រីវ័យ ៣៦ ឆ្នាំរូបនេះដែរ តែគាត់បែរជាបានទទួលដំណឹងថា អ្នកបង្កហេតុមិនបានជាប់ពាក់ព័ន្ធអ្វីនឹងនាងទេ តែគេជាអ្នកស្គាល់គ្នាជាមួយនឹងផលិតករដែលជិតស្និទ្ធនឹងតារារូបនេះទៅវិញ។
រំលងទៅ ១០ថ្ងៃ ជនរងគ្រោះមិនបានទទួលដំណោះស្រាយ និងដំណឹងអ្វីទាំងអស់ពីសំណាក់ប៉ូលិស និងផលិតកម្មរបស់ Jessi។ ទើបខ្លួនសម្រេចចិត្តទៅប៉ុស្តិ៍ប៉ូលិសម្ដងទៀត តែសមត្ថកិច្ចបានត្រឹមប្រាប់ថា ពួកគេនៅមិនទាន់អាចកំណត់អត្តសញ្ញាណជនដៃដល់បាននៅឡើយ។

ដោយឡែក កាលពីថ្ងៃទី១២ ខែតុលាកន្លងមក ម្ចាស់បទ «Zoom» រូបនេះបានចេញមុខឆ្លើយតបនឹងបញ្ហាខាងលើតាមរយៈគណនី Instagram របស់ខ្លួន។ នាងបានទទួលស្គាល់ថា នាងពិតជាបានប្រកែកក្នុងការថតរូបជាមួយនឹងអ្នកគាំទ្ររូបនេះ ២ដង ដោយលើកហេតុថលថា យប់ជ្រៅពេក។
ទាក់ទងនឹងអំពើហិង្សា Jessi រៀបរាប់ថា៖ “នៅពេលនោះ អ្នកនៅជិតខ្ញុំ ដែលខ្ញុំទើបតែបានជួបជាលើកដំបូងនៅយប់នោះ ស្រាប់តែចូលមកវាយអ្នកគាំទ្រ។ ដោយហេតុថា ខ្ញុំតក់ស្លុតនឹងហេតុការណ៍កើតឡើងភ្លាមៗពេក ខ្ញុំមិនបានបង្ហាញការព្រួយកង្វល់របស់ខ្ញុំសម្រាប់អ្នកគាំទ្ររូបនោះឡើយ”។
តារាស្រីវ័យ ៣៥ ឆ្នាំបានបន្តទៀតថា “ខ្ញុំសូមសម្ដែងការសុំទោសដល់ជនរងគ្រោះ សម្រាប់រឿងរ៉ាវដែលអយុត្តិធម៌មួយនេះ។ ក្រោយហេតុការណ៍នេះកើតឡើង ក្រុមហ៊ុន និងខ្ញុំបានទាក់ទងទៅម្ដាយរបស់ជនរងគ្រោះ ហើយបច្ចុប្បន្នយើងកំពុងធ្វើការស្រាវជ្រាវរកជនល្មើស ដើម្បីចេញមុខមកទទួលកំហុស ផ្ដល់សំណង និងប្រឈមមុខនឹងការផ្តន្ទាទោសតាមផ្លូវច្បាប់តាមករណីជាក់ស្ដែង” នាងបន្តដូច្នេះ។
មុននឹងបញ្ចប់សំណេររបស់ខ្លួន Jessi បានអំពាវនាវដល់សាធារណជនថា សូមកុំទទួលព័ត៌មាន និងជឿស្លុងទៅតែម្ខាង លើការរាយការណ៍ដែលស្ថិតនៅក្នុងការសង្ស័យនៅឡើយ៕
























Account
Security
Favourite Content