ថ្មីៗនេះតារាសម្ដែងស្រីកូរ៉េល្បី Han SoHee ត្រូវបានអ្នកដឹកនាំរឿងចុចឈ្មោះសរសើរនាងមិនដាច់ពីមាត់ ដោយសារតែអត្ដចរិតរបស់នាងអំឡុងពេលថតរឿង “Gyeongseong Creature”។

លោក Jeong DongYoon ជាអ្នកដឹកនាំរឿង “Gyeongseong Creature” បានលើកឡើងក្នុងបទសម្ភាសន៍ និងរំឮកដល់តារាស្រី Han SoHee អំឡុងពេលដែលនាងថតរឿងភាគមួយនេះ។ លោកបាននិយាយពីរឿងដែលតារាស្រី Han SoHee បានរងរបួសលើផ្ទៃមុខពេលថតឈុតឆាកមួយក្នុងរឿង។ អ្វីដែលធ្វើឲ្យលោកភ្ញាក់ផ្អើល គឺនាងពិតជាយកចិត្ដទុកដាក់ខ្លាំងចំពោះតួអង្គខ្លួនសម្ដែង។


លោកចាំបានថា កាលនោះនាងបានថតឈុតឆាកមានការដាក់ច្រវាក់ដែកធំ ដើម្បីវាយគ្នាជាមួយបិសាច ប៉ុន្ដែខុសបច្ចេកទេសច្រវាក់ទាំងនោះបានបុកត្រូវមុខរបស់នាង។ បើទោះជាមានរបួសជាប់ខ្លួន តែនាងនៅចង់បន្ដថតឲ្យចប់ ដើម្បីកុំឲ្យប៉ះពាល់ដល់ក្រុមការងារ។ មែនទែនទៅ ស្ថានភាពរបួសរបស់ Han SoHee គឺមិនអាចបន្ដថតបានទៀតឡើយ បើទោះជានាងចង់ ដូច្នេះនាងត្រូវឈប់សម្រាកមួយរយៈ។


Jeong DongYoon បន្ដថា Han SoHee បានសុំអភ័យទោសច្រើនដង ព្រោះមិនអាចបន្ដការថតរឿងបានដោយសារបញ្ហារបួស។ នៅពេលនាងជាសះស្បើយត្រឡប់មកវិញ រូបនាងខិតខំប្រឹងប្រែងសម្ដែងកាន់តែខ្លាំង មិនឲ្យក្រុមការងារខកបំណង។ វាពិតជាមិនងាយស្រួលទេ ដែលនាងត្រូវប្រឈមមុខនឹងការថតទាំងមានរបួស ប៉ុន្ដែនាងធ្វើបានល្អខ្លាំង។
ទាក់ទិននឹងបញ្ហារបួសនេះ Han SoHee ក៏ធ្លាប់បានលើកឡើងថា នៅពេលមានរបួស មិនមែនមានតែនាងទេដែលជួបបញ្ហា គ្រប់គ្នាសុទ្ធតែខិតខំប្រឹងប្រែង មិនអាចព្រោះតែរបួសខ្លះធ្វើឲ្យនាងឈប់ថតដោយងាយស្រួលទេ។ អ្នករាល់គ្នាពិតជាយកចិត្ដទុកដាក់ចំពោះការថតរឿងមួយនេះ។

គួរបញ្ជាក់ថា កាលពីចុងឆ្នាំ ២០២២ តារាសម្ដែងស្រី Han SoHee ជួបឧបទ្ទវហេតុមានរបួស ពេលកំពុងថតរឿង “Gyeongseong Creature”។ នាងត្រូវបានរាយការណ៍ថា មានរបួសនៅលើផ្ទៃមុខ របួសរបស់នាងមិនធ្ងន់ធ្ងរខ្លាំងរហូតដល់ត្រូវទទួលការវះកាត់ទេ ប៉ុន្ដែនាងត្រូវតាមដានយ៉ាងយកចិត្ដទុកដាក់ដោយសារវាជារបួសលើផ្ទៃមុខ៕























Account
Security
Favourite Content