ក្រុម K-pop ដ៏ល្បីល្បាញទូទាំងពិភពលោក BTS បានប្រារព្ធខួបគម្រាប់ ១០ឆ្នាំនៃការបង្ហាញមុខរបស់ពួកគេជាមួយនឹងការចេញផ្សាយសៀវភៅជីវប្រវត្តិគួរឱ្យចាប់អារម្មណ៍មានចំណងជើងថា ‘Beyond the Story: 10-Year Record of BTS’។ សៀវភៅនេះរៀបរាប់ពីដំណើរតស៊ូដ៏ត្រចះត្រចង់របស់ក្រុម ដោយរួមបញ្ចូលនូវសមិទ្ធិផលដ៏អស្ចារ្យរបស់ពួកគេ ការចងចាំគួរឱ្យស្រឡាញ់ និងបទពិសោធន៍គួរឱ្យរំភើប។

ក្រោយចេញផ្សាយកាលពីថ្ងៃទី ៩ ខែកក្កដា សៀវភៅនេះទទួលបានការកោតសរសើរយ៉ាងខ្លាំងពីអ្នកគាំទ្រ និងមហាជនទូទៅ ជាពិសេសសម្រាប់ការរៀបរាប់ដ៏រស់រវើកដែលបានចែករំលែកដោយផ្ទាល់ពីសំណាក់សមាជិក BTS។
ថ្មីៗនេះ អ្នកនិយមលេងអ៊ីនធឺណែតម្នាក់បានចាប់អារម្មណ៍លើផ្នែកមួយនៃសៀវភៅដែលបង្ហាញពីភាពតានតឹង និងការប្រកួតប្រជែងដែលសមាជិកត្រូវប្រឈមមុខក្នុងអាជីពរបស់ពួកគេក្នុងវិស័យកម្សាន្តដែលពួកគេមិនធ្លាប់បាននិយាយពីមុនមកឡើយ។

នៅក្នុងការដកស្រង់នេះ J-Hope បានបើកចំហដោយការចែករំលែកថា៖ “វាពិតជាលំបាកណាស់ខណៈដែលពួកយើងចេញ Promote បទ “Danger” ។ នៅពេលចេញអាល់ប៊ុម DARK & WILD និងត្រលប់មកវិញជាមួយបទ ‘Danger’ យើងបានចូលរួមក្នុងកម្មវិធីតន្ត្រីដែលមានការប្រកាសជ័យលាភីលេខមួយ។ ខណៈដែលពួកយើងបានបញ្ចប់ការថតទុកមុនចំនួនម្ភៃសម្រាប់កម្មវិធីតន្ត្រីផ្សេងៗរួចហើយ ប៉ុន្តែពេលដល់ថ្ងៃផ្សាយពួកយើងបែរត្រូវបានគេណែនាំឲ្យមានវត្តមាននៅលើឆាកសម្រាប់ការផ្សាយផ្ទាល់ ដូច្នេះយើងត្រូវតែធ្វើតាមទាំងដែលយើងគ្មានឈ្មោះប្រកួតយកចំណាត់ថ្នាក់កំពូលផង”។

បន្ថែមពីនេះ V ក៏បានរៀបរាប់អំពីស្ថានភាពនេះ និងចែករំលែកថា៖ “វាមិនអីទេដែលក្រុមផ្សេងមានឈ្មោះប្រកួតប្រជែងយកលេខ ១ ប៉ុន្តែអត់មានយើង ពីព្រោះពេលនោះយើងត្រូវការការខិតខំបន្ថែមទៀត។ នៅពេលណាដែលយើងទៅស្ថានីយទូរទស្សន៍ យើងតែងរាក់ទាក់គួរសមជាមួយគ្រប់គ្នាមិនថាពួកគេជាសិស្សច្បង ឬសិស្សប្អូននោះទេ។ ប៉ុន្តែពេលនោះបែរជាមានអ្នកខ្លះមិនអើពើនឹងការស្វាគមន៍របស់យើង ហើយអ្នកខ្លះថែមទាំងសើចចំអកថាយើងមិនដែលបានជាប់ឈ្មោះប្រកួតយកពានទៀត”។
សមាជិករូបនេះបានបន្តទៀតថា៖ “បន្ទាប់ពីចប់កម្មវិធី ពួកយើងទាំងអស់គ្នាបានធ្វើដំណើរក្នុងឡានតែមួយ… អ្នកខ្លះយំ អ្នកខ្លះខឹង ហើយខ្លះទៀតមិនអាចនិយាយអ្វីបានឡើយ ព្រោះតែអារម្មណ៍សោកសៅ និងអយុត្តិធម៌ ដែលយើងមិនអាចរកពាក្យអ្វីមកនិយាយឱ្យសម”។ V បានបន្ថែមថា៖ “ពេលនោះហើយជាពេលដែលយើងគិតថា ‘យើងត្រូវតែជោគជ័យ ដើម្បីកុំឱ្យនរណាម្នាក់មើលងាយយើង’។ យើងមានការតាំងចិត្ត និងប្រមូលផ្តុំក្នុងបេះដូងតែមួយ ដើម្បីក្លាយជាក្រុមដ៏អស្ចារ្យមួយ”។
អ្នកគាំទ្រជាច្រើននិយាយមិនចេញចំពោះការលំបាកដែល BTS ត្រូវប្រឈមមុខ ហើយបានបញ្ចេញមតិថា៖ “ខ្ញុំមិនជឿថាពួកគេបានឆ្លងកាត់រឿងបែបនេះទេ” “វាពិតជាអស្ចារ្យណាស់ដែលពួកគេបានតាំងចិត្តឡើងដល់កំពូល” “ឧស្សាហកម្មខេប៉ុបគឺសាហាវណាស់! “ខ្ញុំក៏ឈឺចាប់ដែរ ម៉េចក៏មិត្តរួមអាជីពបែរជាសើចចំអកឱ្យ idol ផ្សេងទៀតបែបនេះ?” “ខ្ញុំមិនមែនជាអ្នកគាំទ្រ BTS ប៉ុន្តែខ្ញុំចាំថា BTS ត្រូវបានគេសើចចំអកច្រើនក្នុងអាជីពរបស់ពួកគេកាលពីដើម” និង “ការសងសឹកគឺពិតជាផ្អែមល្ហែមណាស់” ៕

























Account
Security
Favourite Content