កាលពីថ្ងៃទី៤ ខែធ្នូ ឆ្នាំ២០២៣ កន្លងទៅនេះគឺថ្ងៃកំណើតរបស់ Jin សមាជិកកូនបង BTS ដោយមានអ្នកគាំទ្រជាច្រើនបានបង្ហោះសារជូនពរលោកជាបន្តបន្ទាប់ព្រមទាំងបង្ហាញអារម្មណ៍ខូចចិត្តបន្តិចបន្តួចដែលឆ្នាំនេះមិនមានវត្តមានរបស់លោកមក live ឆ្លងថ្ងៃកំណើតជាមួយគ្នាដោយសារកាតព្វកិច្ចដ៏សំខាន់។
យ៉ាងណាមិញ ទោះមិនបានមកឆ្លងខួបកំណើតដូចរាល់ឆ្នាំពិតមែន Jin ក៏មិនបានទុកឱ្យអ្នកគាំទ្រមានអារម្មណ៍ពិបាកចិត្តយូរនោះទេដោយលោកបានសរសេរសារនៅលើបណ្ដាញសង្គម Weverse ដើម្បីថ្លែងអំណរគុណទៅដល់អ្នកគាំទ្រជុំវិញពិភពលោកទាំងអស់របស់ BTS ដែលបានជូនពរលោកនៅក្នុងថ្ងៃកំណើត។
Jin បានចែករំលែកបន្ដថាជារៀងរាល់ឆ្នាំលោកតែងតែ live ជាមួយ ARMYs ដើម្បីឆ្លងថ្ងៃកំណើត ប៉ុន្តែគួរឱ្យសោកស្ដាយដែលឆ្នាំនេះលោកមិនបានជួបអ្នកគាំទ្រដូចឆ្នាំមុន។ បើទោះបីជាឆ្នាំនេះពួកយើងមិនអាចជួបគ្នាមែន ប៉ុន្តែលោកសង្ឃឹមថាអ្នកគាំទ្ររបស់លោកនៅរស់នៅដោយរីករាយជាមួយពេលវេលាល្អជានិច្ច។
ឆ្លៀតក្នុងឱកាសនោះ តារាចម្រៀងប្រុសរូបនេះ ឬគេស្គាល់ថាជា WWH (World Wide Handsome) បានបន្ដថាមកដល់ពេលនេះលោកបានចូលបម្រើយោធារយៈពេលមួយឆ្នាំទៅហើយ បើទោះបីជាសល់ពេលច្រើនទៀតរហូតដល់លោកត្រលប់មកវិញក៏ដោយ គ្រាន់តែគិតដល់ថ្ងៃដែលលោកនឹងវិលមកជួបអ្នកគាំទ្រជាទីស្រឡាញ់ឆាប់ៗក៏លោកកំពុងរំភើបចិត្តរួចទៅហើយ។ ជាមួយគ្នានេះ Jin ក៏មិនភ្លេចប្រាប់ហ្វេនដែរថាពេលនេះក្នុងជួរយោធា លោកត្រូវបានដំឡើងឋានៈមុខងារជាពលបាលត្រី Kim Seok Jin ហើយ។
គួរបញ្ជាក់ដែរថាសមាជិក BTS គឺ Jin, Jhope និង Suga កំពុងបំពេញកាតព្វកិច្ចក្នុងជួរយោធាហើយ ខណៈ RM, V, Jimin និង Jungkook កំពុងត្រៀមខ្លួនចូលបំពេញកាតព្វកិច្ចយោធាដូចគ្នាដែរ។ ដូច្នេះបើមិនមានអ្វីប្រែប្រួលនោះទេ BTS នឹងវិលត្រលប់មកជួបអ្នកគាំទ្រវិញឆាប់ៗក្នុងឆ្នាំ ២០២៥ ៕