ផ្ទុះការកោតសរសើរពីសំណាក់មហាជនអ្នកប្រើប្រាស់បណ្ដាញសង្គមហ្វេសបុកចំពោះនារីបរទេសម្នាក់ឈរចែកមួកសុវត្ថិភាពដល់កុមារតូចៗដែលធ្វើដំណើរលើដងផ្លូវជាមួយឪពុកម្ដាយនៅត្រង់ចំណុចរង្វង់មូលលោកតាដំបងក្រញូង ខេត្តបាត់ដំបង។

កាលពីម្សិលមិញនេះ វីដេអូមួយត្រូវបានចែករំលែកព្រោងព្រាតក្រោយបានឃើញសកម្មភាពមនុស្សធម៌របស់នារីជាជនជាតិអាមេរិកម្នាក់ដែលបានឈរចែកមួកសុវត្ថិភាពជូនដល់កុមារតូចៗនៅក្នុងខេត្តបាត់ដំបង។ តាមរយៈវីដេអូដែលបានបង្ហោះកាលពីម្សិលមិញនេះ ម្ចាស់គណនីហ្វេសបុកដែលមានឈ្មោះ ShanaeLael បានរៀបចំមួកសុវត្ថិភាព ៦០ ដើម្បីចែកជូនដល់កុមារតូចៗដែលធ្វើដំណើរនៅលើដងផ្លូវជាមួយឪពុកម្ដាយ ខណៈពួកគេពុំមានអ្វីពាក់សម្រាប់ពាក់ការពារក្បាល។ នារីបរទេសដែលអាចប្រើប្រាស់ភាសាខ្មែរយ៉ាងច្បាស់រូបនេះមានភាពរហ័សរហួនជាខ្លាំងដោយគ្រាន់តែបានឃើញអ្នកដំណើរឆ្លងកាត់ដែលពុំមានមួកសុវត្ថិភាពក៏បានឱ្យមួកការពារព្រមទាំងបានពាក់ឱ្យក្មេងតូចៗទាំងនោះផងដែរ។
អ្នកនាង ShanaeLael ក៏បានចែកមួកដល់ក្មេងៗសិស្សសាលានិងបន្តចែកដល់កុមារជាអ្នកដំណើរនៅតាមផ្លូវរហូតអស់។ បន្ថែមពីនេះ នារីបរទេសរូបនេះក៏បានផ្ដាំផ្ញើទៅដល់កុមារតូចៗ និងឪពុកម្ដាយរបស់ពួកគេឱ្យគិតគូពីសុវត្ថិភាពរបស់កូនៗឱ្យបានខ្ពស់ជាពិសេសគឺសុវត្ថិភាពនៅលើដងផ្លូវពេលកំពុងបើកបរតែម្ដង។








ក្រោយបានឃើញសកម្មភាពមនុស្សធម៌បែបនេះបណ្ដាអ្នកប្រើប្រាស់បណ្ដាញសង្គមហ្វេសបុក ក៏ដូចជាមហាជនបានកោតសរសើរជាខ្លាំងចំពោះទឹកចិត្តនារីបរទេសរូបនេះដែលបានគិតដល់សុវត្ថិភាពកុមារតូចៗ ជាចម្បង។ ទោះបីនេះជាចំណែកតូចមួយក៏ប៉ុន្តែបានធ្វើឱ្យក្មេងៗ ក៏ដូចជាឪពុកម្ដាយពួកគេញញឹមដោយក្ដីរីករាយនៅពេលដែលកូនៗរបស់ខ្លួនទទួលបានការពារពីសំណាក់មនុស្សដែលមានទឹកចិត្តល្អបែបនេះ៕
លីងសម្រាប់ទស្សនាវីដេអូ ៖ https://www.facebook.com/61557586252154/videos/1888140115269209
ប្រភពរូបភាព ៖ ShanaeLael

























Account
Security
Favourite Content