ជាការអបអរសាទរទិវាសិទ្ធនារីអន្តរជាតិ ៨មីនា លើកទី១១២ តារាសម្តែងប្រុសល្បីឈ្មោះ ២ រូប រួមមាន ខាត់ វ៉ៃហាំង និង លោក ជា លាងឈែ បាននាំគ្នាបង្ហោះរូបថតស្លៀកឈុតរ៉ូបកូនក្រមុំ ទុកជាការជូនពរដល់សុភាពនារីទាំងឡាយ ក្នុងឱកាសថ្ងៃពិសេស មួយឆ្នាំមានតែម្តងនេះ។
ភ្ជាប់ជាមួយរូបថតស្រស់ស្អាត តារាសម្តែងប្រុសឆ្វាក់តួឯកទាំងពីររូបក៏មិនភ្លេចភ្ជាប់ពាក្យពេចន៍ជូនពរដ៏មានអត្ថន័យនោះឡើយ។ ក្នុងនោះ តួឯកប្រុសរឿង លួចស្នេហ៍គូដណ្តឹង បានបង្ហោះថា «រីករាយទិវាសិទ្ធិនារីអន្តរជាតិ សូមជូនពរដល់សុភាពនារីទាំងអស់ទូទាំងសកលលោក ជួបតែសេចសុខសុភមង្គលក្នុងក្រុមគ្រួសារ ទទួលបានសំណាងល្អ សុខភាពល្អ ជោគជ័យគ្រប់ភារកិច្ចការងារ» ចំណែក តួឯកប្រុសរឿង លោកប្តី ៣៦៥ថ្ងៃ ក៏បានរៀបរាប់ភ្ជាប់ជាមួយថា «អបអរសារទរ ទិវាសិទ្ធិនារីអន្តរជាតិ ៨មីនា សូមជូនពរបងប្អូនសុភាពនារីជួបតែសំណាងល្អ សុខភាពល្អ សម្រស់ស្រស់ផូរផង់»។
សូមជម្រាបថា ទិវានារីអន្តរជាតិ (International Women’s Day) ត្រូវប្រារព្ធធ្វើជារៀងរាល់ឆ្នាំ នៅថ្ងៃទី៨ ខែមីនា ក្នុងគោលបំណងរំលឹកពីការតស៊ូរបស់នារីទូទាំងសកលលោក ក្នុងការទាមទារសិទ្ធិសេរីភាព ប្រជាធិបតេយ្យ និងការអនុវត្តន៏ សិទ្ធិស្មើគ្នារវាងបុរស និងស្ត្រី។ ក្រឡេកមកប្រទេសកម្ពុជាវិញ ជារៀងរាល់ឆ្នាំប្រជាជនកម្ពុជាតែងតែបង្ហោះសារអបអរសាទរទិវានារីអន្តរជាតិ ៨មីនា ដើម្បីបង្ហាញក្តីស្រលាញ់ទៅកាន់អ្នកម្តាយ ក្រុមគ្រួសារជាដើម៕























Account
Security
Favourite Content