នៅថ្ងៃទី ៦ ខែតុលានេះ សមាជិក BLACKPINK Jisoo បានប្រកាសជាផ្លូវការនូវគម្រោងចេញបទចម្រៀងថ្មីមួយបទ ជាបទឆ្លងឆ្លើយ។

ដោយមិនបង្ហាញពីអត្តសញ្ញាណរបស់ដៃគូចម្រៀង សមាជិកកូនច្បងរបស់ BLACKPINK បានចែករំលែករូបភាព Teaser ដែលបង្ហាញពីស្រមោលរបស់បុរសអាថ៌កំបាំងម្នាក់នៅផ្ទៃខាងក្រោយជាមួយនឹង Caption សរសេរថា “A duet is near”។
យោងតាមរបាយការណ៍ដោយសារព័ត៌មាន The Korea Herald ដែលដកស្រង់ព័ត៌មានពីប្រភពផ្ទៃក្នុងបានបង្ហើបថាដៃគូចម្រៀងរបស់ Jisoo គឺ Zayn Malik ដែលត្រូវបានស្គាល់ច្បាស់ជាសមាជិកក្រុម One Direction មុនពេលចេញច្រៀងជាសិល្បករទោល។ Zayn ធ្លាប់បានចូលរួមការប្រគុំតន្ត្រីរបស់ BLACKPINK នៅទីក្រុងញូវយ៉កកាលពីខែកក្កដាកន្លងទៅ ហើយក្រោយមកក៏បានបង្ហោះអរគុណក្រុម BLACKPINKសម្រាប់ការអញ្ជើញនៅលើ Instagram ។
ខណៈមិនទាន់មានការបញ្ជាក់ផ្លូវការប៉ុន្តែដំណឹងនៃការសហការដំបូងរវាងតារាល្បីទាំងពីរត្រូវបានចែករំលែកយ៉ាងទូលំទូលាយនៅលើបណ្ដាញសង្គម ដោយអ្នកគាំទ្រជាច្រើនបានបង្ហាញអារម្មណ៍រំភើបខ្លាំងសម្រាប់ការសហការរបស់ពួកគេ។
សូមបញ្ជាក់ថា បច្ចុប្បន្ន BLACKPINK ក៏កំពុងមមាញឹកក្នុងការរៀបចំចេញអាល់ប៊ុមខ្នាតតូចដំបូងរបស់ពួកគេក្នុងរយៈពេល ៣ ឆ្នាំចុងក្រោយផងដែរ រួមជាមួយការប្រគំតន្ត្រី Deadline World Tour។ឥឡូវនេះ Jisoo កំពុងសម្រាករយៈពេលខ្លី មុនការសម្តែងបន្ទាប់នឹងធ្វើឡើងនៅថ្ងៃទី ១៨ ខែតុលា នៅទីក្រុង Kaohsiung កោះតៃវ៉ាន់។
ចំពោះ Zayn Malik បន្ថែមពីលើកិច្ចសហការខាងលើនេះ លោកក៏កំពុងធ្វើការជាមួយអតីតមិត្តរួមក្រុម One Direction មួយរូបទៀតគឺ Louis Tomlinson សម្រាប់គម្រោងភាពយន្តឯកសារថ្មីមួយរបស់ Netflix ៕























Account
Security
Favourite Content