ស្ត្រីវ័យខ្ទង់ ៤០ ឆ្នាំម្នាក់ត្រូវបានចាប់ខ្លួនពីបទលួចចូលលំនៅដ្ឋានរបស់សមាជិក BTS Jungkook ដោយគ្មានការអនុញ្ញាត រយៈពេលប៉ុន្មានខែប៉ុណ្ណោះបន្ទាប់ពីជនល្មើសម្នាក់ត្រូវបានចាប់ខ្លួនដោយសារលួចចូលផ្ទះរបស់សមាជិក BTS រូបនេះដែរ។

យោងតាមរបាយការណ៍កាលពីថ្ងៃទី ៣១ ខែសីហា ជនសង្ស័យ A ត្រូវបានសន្តិសុខប្រទះឃើញនៅវេលាម៉ោងប្រហែល ១១:២០ នាទីយប់ថ្ងៃទី ៣០ ខែកក្កដា ខណៈព្យាយាមចូលក្នុងបរិវេណចំណតឡានក្នុងអគារលំនៅដ្ឋាន Jungkook នៅសង្កាត់ Yongsan ទីក្រុងសេអ៊ូល។ ភ្លាមៗនោះ សន្តិសុខបានជូនដំណឹងទៅប៉ូលីស។
ហេតុការណ៍ចុងក្រោយនេះកើតឡើងបន្ទាប់ពីមានករណីស្រដៀងគ្នាមួយនៅក្នុងខែមិថុនា នៅពេលដែលស្ត្រីជនជាតិចិនម្នាក់ត្រូវបានចាប់ខ្លួនបន្ទាប់ពីប៉ុនប៉ងចូលទៅកាន់លំនៅដ្ឋានរបស់ Jungkook ដោយបញ្ចូលពាក្យសម្ងាត់ចាក់សោទ្វារម្តងហើយម្តងទៀត។ នាងត្រូវបានចាប់ខ្លួននៅនឹងកន្លែង ហើយបន្ទាប់មកបានបញ្ជូនទៅកាន់ការិយាល័យរដ្ឋអាជ្ញានៅថ្ងៃទី ២៧ ខែកក្កដា ពីបទប៉ុនប៉ងរំលោភចូលផ្ទះអ្នកដទៃ។
ស្ត្រីរូបនេះបានប្រាប់ប៉ូលីសថា នាងមិនបានរស់នៅក្នុងប្រទេសកូរ៉េខាងត្បូងទេ ប៉ុន្តែបានធ្វើដំណើរទៅប្រទេសនេះដើម្បីទៅលេង Jungkook ។
មកដល់នៅថ្ងៃច័ន្ទ ទី១ ខែកញ្ញានេះកំឡុងពេល Live វីដេអូអបអរខួបកំណើតរបស់ខ្លួន Jungkook បានធ្វើការព្រមានដល់គ្រប់គ្នាដែលចង់សម្រុកចូលផ្ទះរបស់ខ្លួនដោយនិយាយថា “ប្រសិនបើអ្នកមិនចង់ចូលប៉ុស្តិ៍ប៉ូលីស សូមកុំមកជិតផ្ទះរបស់ខ្ញុំ”។ តារារូបនេះនិយាយថាលោកមានការភ័យខ្លាច បន្ទាប់ពីមានឧប្បត្តិហេតុរំលោភបំពានជាបន្តបន្ទាប់នៅឯលំនៅដ្ឋានរបស់ខ្លួន។
ពាក់ព័ន្ធករណីចុងក្រោយ ម្ចាស់បទ “Seven” បាននិយាយថា “ខ្ញុំបានឃើញសកម្មភាពទាំងស្រុងនៅក្នុងកាមេរ៉ាសុវត្ថិភាព។ គាត់បានបើកទ្វារនៅចំណតក្រោមដី ហើយប៉ូលិសនៅទីនោះនៅពីមុខគាត់”។
“គាត់ថាយើងជាមិត្តនឹងគ្នា” Jungkook បន្តដោយដកដង្ហើមធំ។ “ខ្ញុំចង់និយាយថា ARMY គឺដូចជាគ្រួសារ និងមិត្តភ័ក្តិ ប្រាកដណាស់ ប៉ុន្តែរឿងនេះពិតជាគួរឱ្យសោកសៅ។ ខ្ញុំសូមកោតសរសើរចំពោះការគាំទ្រ ប៉ុន្តែសូមកុំធ្វើបែបនោះអី” ៕
Jungkook បានបញ្ចប់ការបម្រើយោធាកាលពីថ្ងៃទី ១១ ខែមិថុនា បន្ទាប់ពីបានចូលបំពេញកាតព្វកិច្ចតាំងពីខែធ្នូ ឆ្នាំ ២០២៣ ដោយទទួលតំណែងជាចុងភៅនៅក្នុងកងពលកាំភ្លើងធំទី ៥ របស់កងទ័ព។
ស្របពេលសមាជិក BTS ទាំងអស់ត្រូវបានរំពឹងថានឹងបញ្ចប់កាតព្វកិច្ចយោធារបស់ពួកគេនៅឆ្នាំ ២០២៥ បច្ចុប្បន្នពួកគេកំពុងរៀបចំសម្រាប់ការត្រលប់មកវិញជាក្រុមពេញលេញនៅឆ្នាំ ២០២៦ ខណៈមានការទន្ទឹងរង់ចាំពីអ្នកគាំទ្រទូទាំងពិភពលោក ៕
























Account
Security
Favourite Content