កាលពីពេលថ្មីៗនេះ Nayeon សមាជិកក្រុម TWICE បានធ្វើការវិលត្រលប់ក្នុងនាមជាតារាទោលជាមួយមីនីអាល់ប៊ុមទី២ មានចំណងជើងថា “NA” ដែលទទួលបានការគាំទ្រខ្លាំងពីសំណាក់ហ្វេនៗ ជាពិសេសសម្រាប់បទចម្រៀងមេមានចំណងជើងថា “ABCD”។ មិនតែប៉ុណ្ណោះ អាល់ប៊ុមថ្មីរបស់នាងបានសាងសមិទ្ធផលធំមួយទៀតលើតារាង Billboard។
យោងតាមទិន្នន័យចុងក្រោយពី Billboard នៅថ្ងៃទី ២៤ ខែមិថុនា អាល់ប៊ុម “NA” របស់ Nayeon បានបង្ហាញខ្លួននៅចំណាត់ថ្នាក់ទី ៧ ក្នុងសប្ដាហ៍ដំបូងលើតារាង Billboard 200 ខណៈអាល់ប៊ុមចំនួន ៤៧០០០ ឈុតត្រូវបានលក់ដាច់នៅសហរដ្ឋអាមេរិក។

គួររំឭកថា អាល់ប៊ុមទី១របស់ Nayeon មានចំណងជើងថា “IM NAYEON” ក៏បានជាប់ចំណាត់ថ្នាក់លេខ ៧ ដូចគ្នាលើតារាង Billboard 200 នៅសប្ដាហ៍ដំបូង។ សមិទ្ធិផលដ៏គួរឱ្យចាប់អារម្មណ៍នេះធ្វើឱ្យ NAYEON អាចបង្កើតកំណត់ត្រាថ្មីក្នុងអាជីពទោល ដោយក្លាយជាតារាស្រី K-pop ដំបូងគេ និងតែមួយគត់ដែលមានអាល់ប៊ុមចំនួន ២ ជាប់ចំណាត់ថ្នាក់ Top 10 ក្នុងតារាងអាល់ប៊ុមពិភពលោកមួយនេះ។
កាលពីខែមិថុនា ឆ្នាំ២០២២ តារាស្រីវ័យ ២៨ឆ្នាំរូបនេះបានក្លាយជាសមាជិកដំបូងគេក្នុងក្រុម TWICE ដែលបានចេញអាល់ប៊ុមទោល ដោយបទល្បីរបស់នាងក្នុងអាល់ប៊ុមដំបូងនោះគឺបទ “POP!”។ រយៈពេល២ឆ្នាំកន្លងផុត នៅខែមិថុនាឆ្នាំ២០២៤នេះ នាងក៏បានចេញអាល់ប៊ុមទោលទី២នេះ មានចំណងជើង “NA” ដែលជាពាក្យភាសាកូរ៉េមានអត្ថន័យថា “ខ្ញុំ” ៕




























Account
Security
Favourite Content