ផ្អែកតាមសេចក្ដីរាយការណ៍ពី Billboard ចុះផ្សាយកាលពីថ្ងៃទី១៨ ខែកញ្ញា បានឱ្យដឹងថាតារាចម្រៀងអាមេរិក Katy Perry បានលក់សិទ្ធិលើបទចម្រៀងរបស់នាងដែលចេញចាប់ពីឆ្នាំ២០០៨ដល់ឆ្នាំ២០២០ ឱ្យក្រុមហ៊ុន Litmus Music ដែលជាបុត្រសម្ព័ន្ធរបស់ក្រុមហ៊ុន Carlyle Group ក្នុងតម្លៃ ២២៥លានដុល្លារអាមេរិក។

កិច្ចសន្យានេះគឺរួមបញ្ចូលបទចម្រៀងចំនួន ៥អាល់ប៊ុមរបស់ម្ចាស់បទ “Firework” ក្នុងផលិតកម្ម Capitol Records រួមមានអាល់ប៊ុម One of the Boys (2008), អាល់ប៊ុម Teenage Dream (2010), អាល់ប៊ុម Prism (2013), អាល់ប៊ុម Witness (2017) និងអាល់ប៊ុម Smile (2020)។
លោក Dan McCarroll អតីតប្រធានក្រុមហ៊ុន Capitol Records និងជាសហស្ថាបនិក Litmus បានបញ្ជាក់តាមសេចក្ដីថ្លែងការណ៍មួយថា៖ “Katy Perry គឺជាសិល្បករមានទស្សនវិស័យប្រកបដោយភាពច្នៃប្រឌិត ដែលបានសាងឥទ្ធិពលយ៉ាងធំធេងលើវិស័យតន្ត្រី ទូរទស្សន៍ ភាពយន្ត និងសប្បុរសធម៌។ ខ្ញុំពិតជាមានកិត្តិយសណាស់ដែលបានចាប់ដៃគូជាមួយនាងម្តងទៀត និងជួយឱ្យ Litmus អាចគ្រប់គ្រងនិងចាត់ចែងស្នាដៃដ៏អស្ចារ្យរបស់នាង”។
គួរបញ្ជាក់ថាក្រុមហ៊ុន Carlyle Group បានវិនិយោគដើមទុនជាង ៣ ពាន់លានដុល្លារនៅក្នុង និងជុំវិញវិស័យកីឡា ប្រព័ន្ធផ្សព្វផ្សាយ និងកម្សាន្តចាប់តាំងពីឆ្នាំ ២០១៨មក និងបានបង្ហាញថាពួកគេពិតជាមានសមត្ថភាពក្នុងការរៀបចំដំណោះស្រាយហិរញ្ញវត្ថុតាមតម្រូវការ សម្រាប់ដៃគូពាណិជ្ជកម្ម និងសិល្បករ។
ពាក់ព័ន្ធការលក់សិទ្ធិលើបទចម្រៀងនេះដែរ Katy Perry មិនមែនជាសិល្បករដំបូងឡើយដែលបានលក់សិទ្ធិលើបទចម្រៀងខ្លួនឯង ដោយកាលពីដើមឆ្នាំកន្លងទៅនេះ តារាចម្រៀង Justin Bieber ក៏បានលក់សិទ្ធិលើបទចម្រៀងរបស់គេឱ្យក្រុមហ៊ុន Hipgnosis Songs Capital ក្នុងតម្លៃ ២០០លានដុល្លារដូចគ្នា ៕


























Account
Security
Favourite Content