បច្ចុប្បន្ន Nam Tae Hyun ដែលជាអតីតសមាជិកក្រុមចម្រៀងល្បី WINNER កំពុងស្ថិតក្រោមការស៊ើបអង្កេតពីបទប្រើប្រាស់គ្រឿងញៀន និងកំពុងទទួលការព្យាបាល។


ក្នុង Channel YouTube ‘Kizzle’ កាលពីថ្ងៃទី ២៤ ខែ កក្កដា ឆ្នាំ ២០២៣ តារាប្រុស Nam Tae Hyun បានទម្លាយថា លោកកំពុងទទួលការព្យាបាលនៅមជ្ឈមណ្ឌលអ្នកញៀនថ្នាំមួយក្នុងទីក្រុង Incheon ប្រទេសកូរ៉េខាងត្បូង។
Nam Tae Hyun បានចែករំលែកថា លោកកំពុងប្រឹងប្រែងយ៉ាងខ្លាំងក្នុងការផ្ដាច់គ្រឿងញៀន និងព្យាយាមធ្វើឱ្យជីវិតរបស់លោកប្រសើរជាងមុន។ លោកហាក់មានអារម្មណ៍សោកស្ដាយចំពោះទង្វើរបស់ខ្លួន។

លោកក៏បានប្រាប់ពីបទពិសោធក្នុងអំឡុងពេលពីរខែដែលបានចំណាយពេលនៅក្នុងមជ្ឈមណ្ឌលផ្ដាច់គ្រឿងញៀន។ ថ្វីត្បិតតែមានការតឹងរ៉ឹងប៉ុន្ដែជីវិតរបស់លោកហាក់មានភាពល្អប្រសើរជាងមុន មិនផឹកស្រា មិនជក់ថ្នាំ ធ្វើតាមការណែនាំរបស់អ្នកជំនាញ និងគេងបានលក់ស្រួល។

Nam Tae Hyun ក៏បានដាស់តឿនដល់ក្មេងៗ ជំនាន់ក្រោយ កុំចង់ដឹង ឬចង់សាកពីគ្រឿងញៀន វាមិនចំណេញនោះទេ។ លោកសារភាព លោកជាមនុស្សចង់ដឹង ចង់សាក ទើបជីវិតរបស់លោកធ្លាក់ដល់ដំណាក់កាលនេះ។ លោកបន្ដថា៖ “វាមិនមែនជារឿងប្លែកទេដែលមនុស្សមានការចង់ដឹង ចង់សាកល្បង ប៉ុន្ដែពេលខ្លះការចង់សាក ចង់ស្គាល់គឺមិនមានអ្វីចំណេញឡើយពេលខ្លះមានតែនាំទុកដល់ខ្លួនឯងទៅវិញ”។

គួរបញ្ជាក់ Nam Tae Hyun ត្រូវបានបញ្ជូនទៅធ្វើការស៊ើបអង្កេតបន្ថែម បើទោះបីជាមិនស្ថិតក្នុងការឃុំឃាំងក៏ដោយ ប៉ុន្ដែលោកត្រូវបានឃ្លាំមើលដោយប៉ូលីសដោយសារជាប់ពាក់ព័ន្ធរឿងប្រើប្រាស់គ្រឿងញៀនប្រភេទ Methamphetamine៕

























Account
Security
Favourite Content