ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ប្រិយមិត្តគ្រប់គ្នាប្រហែលជាធ្លាប់ស្គាល់ច្បាស់អំពីហ្វេសប៊ុកហើយ ដែលជាបណ្តាញសង្គមដ៏ពេញនិយម ហើយខណៈពេលនេះវាបានក្លាយជាផ្នែកសំខាន់មួយទៅហើយសម្រាប់ជីវិតប្រចាំថ្ងៃរបស់យើង។ ទោះយ៉ាងណា ថ្ងៃនេះ AMS នឹងនាំប្រិយមិត្តមកដឹងការពិតបែបខ្មៅងងឹត ១០ យ៉ាងអំពីហ្វេសប៊ុកម្ដង។
១. ចងចាំមុខមាត់
នៅពេលដែលយើងបង្ហោះរូប ហ្វេសប៊ុកមានប្រព័ន្ធសម្គាល់មុខមាត់មនុស្សដោយស្វ័យប្រវត្តិ ហើយ Tag ទៅមនុស្សក្នុងរូបថតបានយ៉ាងត្រឹមត្រូវ។ ចំណុចនេះ មនុស្សមួយចំនួនមានការព្រួយបារម្ភទាក់ទងនឹងការរំលោភបំពានលើភាពឯកជនដោយពុំមានការយល់ព្រមពីសាមីខ្លួនក្នុងករណីណាមួយ។
២. រក្សាទុកសារជាសំឡេង
រឿងរ៉ាវនេះធ្លាប់លេចឡើងព័ត៌មាននៅឆ្នាំ ២០១៩ ថា ហ្វេសប៊ុកបានជួលភាគីទីបីដើម្បីស្តាប់ និងបម្លែងសារជាសំឡេងដែលអ្នកប្រើប្រាស់និយាយទាក់ទងគ្នានៅក្នុងកម្មវិធី Messenger។ ហើយទន្ទឹមនឹងនេះដែរ ហ្វេសប៊ុកបានលួចថតសំឡេងអ្នកប្រើប្រាស់តាមរយៈមីក្រូហ្វូនទូរស័ព្ទដៃ។ ទង្វើនេះធ្វើឱ្យអ្នកប្រើប្រាស់ជាច្រើនមិនពេញចិត្ត ព្រោះជាការរំលោភលើភាពឯកជន។ ទីបំផុត ហ្វេសប៊ុកបានបញ្ចប់គម្រោងនេះ ដោយលើកហេតុផលថាការប្រមូលទិន្នន័យសំឡេងនេះគឺដើម្បីយកទៅអភិវឌ្ឍប្រព័ន្ធ AI ឱ្យចងចាំសំឡេង និងប្រើប្រាស់ភាសាឱ្យបានប្រសើរឡើងប៉ុណ្ណោះ។
៣. តាមដាន timestamp
នៅឆ្នាំ ២០១៦ មាន Hacker ម្នាក់ឈ្មោះ Soren Louv-Jansen បានលាតត្រដាងដំណឹងគួរឱ្យភ្ញាក់ផ្អើលមួយថាគេអាចទាញយកអត្ថប្រយោជន៍ពីមុខងារ time stamp របស់ Messenger ដើម្បីកំណត់អត្តសញ្ញាណ របៀបរស់នៅរបស់មនុស្សក្នុងហ្វេសប៊ុកបាន។ ដោយប្រើវិធីសង្កេតពេលវេលាដែលពួកគេ Online និង Offline ជារឿយៗ រហូតដល់អាចឃើញថា ក្នុងមួយថ្ងៃបុគ្គលនោះលេងហ្វេសប៊ុកនៅពេលណាខ្លះ លេងយូរប៉ុណ្ណា លេងនៅក្នុងកុំព្យូទ័រ ឬក្នុងទូរស័ព្ទដៃ។ បន្ទាប់មក នៅពេលយកទិន្នន័យទាំងអស់ដាក់បញ្ចូលគ្នា គួបផ្សំនឹងកត្តាផ្សេងទៀត អាចធ្វើឱ្យគាត់វិភាគបានពីឥរិយាបថរបស់បុគ្គលនោះបាន ដូចជា ពេលវេលាគេង ពេលភ្ញាក់ ពេលធ្វើការ ឬពេលសម្រាករបស់គេ។ គាត់កំពុងតែបង្ហាញឱ្យឃើញថា ទោះបីមុខងារនេះតូចតាច ប៉ុន្តែអាចធ្វើឱ្យយើងតាមដានជីវិតរបស់អ្នកប្រើប្រាស់បានយ៉ាងលម្អិត។
៤. ឥរិយាបថទទួលទានអាហារ
នៅឆ្នាំ ២០១៤ សាកលវិទ្យាល័យរដ្ឋ Florida បានចេញផ្សាយការសិក្សាលើស្ត្រីវ័យក្មេងចំនួន ៩៦០ នាក់។ លទ្ធផលបានរកឃើញថា ស្រ្តីដែលលេងហ្វេសប៊ុកច្រើនពេក មានទំនោរផ្លាស់ប្តូរឥរិយាបថការទទួលទានអាហារ ដោយសារការប្រៀបធៀបរូបរាងខ្លួនឯង និងរូបរាងអ្នកដទៃដែលឃើញក្នុងហ្វេសប៊ុក ហើយចង់បង្ហាញឱ្យគេឃើញថាខ្លួនក៏អាចមានរូបរាងស្អាតដែរ។ ហេតុនេះហើយ គេមានទំនោរផ្លាស់ប្តូរទម្លាប់ញ៉ាំ និងគ្រប់គ្រងរបបអាហារ ទាំងវិធីដែលត្រឹមត្រូវ និងវិធីដែលមិនត្រឹមត្រូវដូចជា បង្អត់អាហារ ឬលេបថ្នាំសម្រកគីឡូ។
៥. ប៉ះពាល់សុខភាពផ្លូវចិត្ត
យោងតាមការសិក្សារបស់សាកលវិទ្យាល័យ Yale បានបង្ហាញថា ការញៀនហ្វេសប៊ុកច្រើនពេកអាចជះឥទ្ធិពលអវិជ្ជមានដល់សុខភាពផ្លូវចិត្តជាច្រើនផ្នែក ដូចជា មិនសូវមានទំនាក់ទំនងជាមួយសង្គមក្នុងជីវិតពិត មិនដឹងពីរបៀបចូលចំណោម ការប្រៀបធៀបជីវិតខ្លួនឯងជាមួយអ្នកដទៃ បាត់បង់ការពេញចិត្តនឹងខ្លួនឯងដែលជាការដាក់សម្ពាធ និងធ្វើបាបផ្លូវចិត្តខ្លួនឯង។ ប្រសិនបើសន្សំទុកយូរៗទៅ បញ្ហាអាចនឹងរីករាលដាលកាន់តែធំ។
៦. ដឹងថាយើងនៅឯណា
កាលពីពាក់កណ្តាលឆ្នាំ ២០១៥ Hacker ម្នាក់បានទម្លាយថា Messenger អាចកំណត់ទីតាំងអ្នកប្រើប្រាស់បាន ហើយពួកគេក៏យកទៅអនុវត្តដើម្បីតាមដានទីតាំងរបស់ Friend ក្នុងហ្វេសប៊ុកក្នុងពេលវេលាជាក់ស្តែង។ បើប្រើក្នុងផ្លូវខុស អាចនាំឱ្យមានគ្រោះថ្នាក់ ឬឧក្រិដ្ឋកម្ម។ ប្រាកដណាស់ គ្មាននរណាចង់ឱ្យគេដឹងថាខ្លួននៅទីណាទេ។ ក្រោយមកហ្វេសប៊ុកក៏បានបិទកម្មវិធីនេះ ធ្វើឱ្យ Hacker មិនអាចប្រើប្រាស់វាតទៅទៀតបាន។ ប៉ុន្តែ មនុស្សជាច្រើននៅតែបារម្ភថាហ្វេសប៊ុកនៅតែប្រមូលទិន្នន័យដូចនេះ តែគ្រាន់តែមិនត្រូវបានបង្ហាញឱ្យសាធារណជនទូទៅបានដឹងទេឬយ៉ាងណា?
៧. ញៀន
ក្រុមហ៊ុនហ្វេសប៊ុកបានយកចិត្តទុកដាក់ក្នុងការអភិវឌ្ឍន៍ Algorithm ដើម្បីទាក់ទាញឱ្យមនុស្សលេងហ្វេសប៊ុកកាន់តែយូរ។ ទង្វើបែបនេះ អ្នកស្រាវជ្រាវឆ្ងល់ថា តើវាអាចជាការញៀន ឬអត់? ទើបនៅឆ្នាំ ២០១៤ មានការសិក្សាស្កែនខួរក្បាលអ្នកប្រើប្រាស់ថ្នាំញៀន និងអ្នកដែលលេងហ្វេសប៊ុករយៈពេលយូរៗ។ ជាលទ្ធផល អ្នកដែលចូលចិត្តលេងហ្វេសប៊ុកយូរៗ ការធ្វើការរបស់ខួរក្បាលមានលក្ខណៈស្រដៀងគ្នានឹងអ្នកប្រើថ្នាំញៀន ខូខេន។ ក្រៅពី Algorithm របស់ហ្វេសប៊ុកវាក៏រួមបញ្ចូលកត្តាផ្ទាល់ខ្លួន និងកត្តាសង្គមផងដែរ ដែលធ្វើឱ្យមនុស្សចំណាយពេលច្រើនលើហ្វេសប៊ុក។
៨. កាន់តែលេង កាន់តែឯកោ
ផ្សារភ្ជាប់នឹងចំណុចកន្លងមក ការសិក្សាបានរកឃើញថា ការប្រើប្រាស់ហ្វេសប៊ុកច្រើនពេកអាចបណ្តាលឱ្យមានការដកខ្លួនឃ្លាតឆ្ងាយពីសង្គមក្នុងជីវិតពិត ប្រៀបធៀបខ្លួនឯងជាមួយអ្នកដទៃ អាចក្លាយជាមនុស្សឯកោ ព្រោះឃើញតែសេចក្តីសុខ សុភមង្គល ភាពសប្បាយរីករាយ និងរឿងល្អៗដែលគេចង់បង្ហាញ ខណៈពេលដែលជីវិតខ្លួនឯងពោរពេញដោយភាពឯកា និងភាពស្រពិចស្រពិល ធ្វើឱ្យកាន់តែមានអារម្មណ៍ឯកោ មិនចេញទៅក្រៅសង្គម សុខចិត្តតាមដានជីវិតគេក្នុងហ្វេសប៊ុកតែម្នាក់ឯងវិញ។
៩. បន្ទប់ឆ្លុះបញ្ចាំងខ្លួនឯង
ដោយហេតុថា Algorithm របស់ហ្វេសប៊ុកស្វែងយល់ និងចងចាំអាកប្បកិរិយារបស់យើងនៅពេលលេង ធ្វើឱ្យវាព្យាយាមបង្ហាញមាតិកាដែលយើងចាប់អារម្មណ៍ជារឿយៗ។ នេះជាមូលហេតុបង្កឱ្យមានបាតុភូត Echo Chamber ឬការឆ្លុះបញ្ចាំងខ្លួនឯង។ វាជាបាតុភូតដែលយើងអាចមើលឃើញ ឬទទួលបានព័ត៌មានតែម្ខាង ដោយមិនមានការទទួលដឹងព័ត៌មានពីជ្រុងផ្សេងៗទៀត។ ឧទាហរណ៍ បើយើងចូលចិត្តតាមដានបក្សស្តាំនិយម ដូចជា ចុច Like និង Share ញឹកញាប់ ហ្វេសប៊ុកនឹងបង្ហាញតែមាតិកាទាក់ទងនឹងបក្សស្តាំនិយម។ វាក៏រួមបញ្ចូលរឿងផ្សេងៗទៀតក្នុងជីវិតរស់នៅដែរ ហើយអ្នកស្រាវជ្រាវចង្អុលបង្ហាញថាអាចនាំទៅរកការស្អប់ខ្ពើម និងជំនឿបែបខុសៗនៅក្នុងសង្គមបាន។
១០. បែកធ្លាយទិន្នន័យ
ហ្វេសប៊ុកបានប្រមូលទិន្នន័យផ្ទាល់ខ្លួនរបស់អ្នកប្រើប្រាស់ស្ទើរតែទាំងអស់ ដែលជារបស់ដ៏មានតម្លៃនិងជាចំណុចរសើបរបស់មនុស្ស។ ប្រសិនបើមានការបែកធ្លាយដោយចេតនា ឬអចេតនា នឹងនាំមកនូវបញ្ហាជាច្រើន។ ដូចជា រងការយាយី លួចព័ត៌មាន ក្លែងបន្លំខ្លួន និងជាច្រើនទៀត ឬអាចរីករាលដាលក្លាយជាឧក្រិដ្ឋកម្មធ្ងន់ធ្ងរជាច្រើនដែលបង្កការខូចខាតដល់អាយុជីវិត និងទ្រព្យសម្បត្តិ។ មិនថាក្រុមហ៊ុនធំប៉ុណ្ណាទេ ក៏មិនអាចធានាបាន ១០០% ដែរថាគេអាចរក្សាទុកព័ត៌មានរបស់យើងបានរហូត ឬមិនមានការលក់ទិន្នន័យរបស់យើងជាសម្ងាត់។ ករណីរបស់ហ្វេសប៊ុកនៅឆ្នាំ ២០២១ ពួកគេបានធ្វើឱ្យព័ត៌មានផ្ទាល់ខ្លួនរបស់អ្នកប្រើប្រាស់បែកធ្លាយចំនួន ៥៣៣ លានគណនីរហូតដល់ក្លាយជាបញ្ហាធំដុំត្រូវឡើងតុលាការ៕
Account
Security
Favourite Content