“សូមដោះលែងបុគ្គលិកដែលត្រូវ​ឃុំឃាំងក្នុងក្រុមហ៊ុនឱ្យត្រលប់ទៅផ្ទះវិញ!” KARINA ប្រធានក្រុមចម្រៀងនារី aespa បានលើកផ្ទាំងក្រដាសដែលមានពាក្យពេចន៍នេះឡើងក្នុងកម្មវិធីជួបជុំចុះហត្ថលេខាសម្រាប់អ្នកគាំទ្ររបស់ខ្លួនកាលពីពេលថ្មីៗនេះ ដើម្បីប្រឆាំងនឹងវប្បធម៌ធ្វើការហួសពេលវេលា និងកម្លាំងពលកម្មរបស់បណ្ដាបុគ្គលិកក្រុមហ៊ុន​ទាំងអស់។ ការប្រឆាំងតវ៉ានេះបានទទួលការចាប់អារម្មណ៍យ៉ាងខ្លាំងលើសង្គមអនឡាញ ខណៈបញ្ហានេះគឺជាបញ្ហារ៉ាំរ៉ៃមួយសម្រាប់សង្គមធ្វើការនៅកូរ៉េខាងត្បូង។ បច្ចុប្បន្ន ប្រទេសជាច្រើនកំពុងជួបប្រទះបញ្ហាក្នុងវិស័យការងារ ដូចជាការផ្ដល់ប្រាក់ឈ្នួលមិនយុត្តិធម៌របស់និយោជក ការគាបសង្កត់ក្នុងក្រុមហ៊ុន បញ្ហាពលករចំណាកស្រុក រួមទាំងបន្ទុកការងារដែលធ្ងន់ពេកសម្រាប់បុគ្គលិក ហើយក្នុងមួយក្នុងចំណោមប្រទេសជួបបញ្ហាទាំងនោះគឺកូរ៉េខាងត្បូង។ ជាពិសេសស្របពេលដែលប្រទេសនេះជាប្រទេសដែលមានភាពម៉ត់ចត់ក្នុងការងារខ្ពស់ ជាលទ្ធផលធ្វើឱ្យបុគ្គលិកខ្លះមិនទទួលបានការសម្រាកគ្រប់គ្រាន់ មិនបានសម្រាកនៅចុងសប្តាហ៍ ឬក្រុមខ្លះអាចមិនបានត្រលប់ទៅផ្ទះទាល់តែសោះពេញមួយសប្ដាហ៍។