Jun (Wen Junhui) សមាជិកក្រុម SEVENTEEN នឹងចូលរួមមហោស្រពភាពយន្តអន្តរជាតិទីក្រុងប៊ូសាន (BIFF) លើកទី ៣០ ជាមួយខ្សែភាពយន្តចុងក្រោយរបស់ខ្លួនមានចំណងជើងថា ‘The Shadow’s Edge’ ដែលរូបលោកបានរួមសម្តែងជាមួយតារាសម្តែងជើងចាស់ឈិនឡុង ឬ Jackie Chan ។

ខ្សែភាពយន្តបែបឧក្រិដ្ឋកម្មមួយនេះត្រូវបានជ្រើសរើសឱ្យចូលរួមក្នុងកម្មវិធី Open Cinema របស់មហោស្រព BIFF ដែលចាប់ផ្តើមពីថ្ងៃទី ៤ រហូតដល់១៣ ខែតុលា។ ខ្សែភាពយន្តនេះដែរគ្រោងនឹងចាក់បញ្ចាំងក្នុងប្រទេសកូរ៉េនៅថ្ងៃទី ២០ ខែកញ្ញា ប៉ុន្តែទស្សនិកជននៅប៊ូសាននឹងបានឃើញទិដ្ឋភាពនៅក្នុងកម្មវិធីមហោស្រពដែល Jun នឹងបង្ហាញខ្លួនដោយផ្ទាល់សម្រាប់ការបញ្ចាំងពិសេស និងជំនួបជាមួយទស្សនិកជន។
គួរបញ្ជាក់ថាផ្នែក Open Cinema ក្នុងមហោស្រពភាពយន្តក្រុងប៊ូសានគឺជាការបង្ហាញខ្សែភាពយន្តដែលរួមបញ្ចូលគ្នាទាំងគុណភាព និងការទាក់ទាញទស្សនិកជនបានទូលំទូលាយ។ ការចាក់បញ្ចាំងភាពយន្តនឹងធ្វើឡើងនៅបរិវេណខាងក្រៅមជ្ឈមណ្ឌលភាពយន្តប៊ូសានដោយផ្តល់នូវការជួបគ្នាដ៏មានអត្ថន័យរវាងខ្សែភាពយន្ត និងទស្សនិកជននៅកូរ៉េ។
ទន្ទឹមនឹងការប្រកាសនេះ វីដេអូស្វាគមន៍ពិសេសមួយរបស់ Jackie Chan ក៏ត្រូវបានចេញផ្សាយផងដែរ។ ចាប់ផ្តើមជាភាសាកូរ៉េជាមួយពាក្យសួស្ដី “Annyeonghaseyo” តារាសម្តែងជើងចាស់បានស្វាគមន៍យ៉ាងកក់ក្តៅចំពោះអ្នកគាំទ្រកូរ៉េរបស់ខ្លួន និងបានធ្វើការណែនាំពីខ្សែភាពយន្តនេះ។ ឈុតខ្លីៗ បានបង្ហាញឈុតឆាកដ៏រំភើបខ្លះៗនៃតួអង្គរបស់លោកគឺ Huang Dezong ជាគិញសម្ងាត់ជនចូលនិវត្តន៍ ដែលត្រូវប្រឈមមុខជាមួយតួអង្គរបស់ Jun គឺ Hu Feng ជាកូនចិញ្ចឹមរបស់មេក្លោងឧក្រិដ្ឋកម្មដ៏មានឥទ្ធិពល។ ឈុតឆាកប្រយុទ្ធដ៏ខ្លាំងក្លារបស់ពួកគេបានធ្វើឱ្យទស្សនិកជនកាន់តែពុះកញ្ជ្រោលចង់ទស្សនាខ្សែភាពយន្តពេញ។
‘The Shadow’s Edge’ និយាយពីរឿងរ៉ាវឧក្រិដ្ឋកម្មបច្ចេកវិទ្យាកម្រិតខ្ពស់ដែលរៀបចំដោយអង្គភាពឧក្រិដ្ឋជន ខណៈអង្គភាពគិញសម្ងាត់ត្រូវតាមដាននិងបង្ក្រាបពួកគេ។ ចាប់តាំងពីចេញបញ្ចាំងនៅថ្ងៃទី ១៦ ខែសីហានៅក្នុងប្រទេសចិន ខ្សែភាពយន្តនេះរកចំណូលបានជាង ៧៧.៥ លានដុល្លារអាមេរិក។ តួសម្តែងសំខាន់ៗរួមមាន Jackie Chan, Simon Yam, Tsui Siu Ming, Zhang Zifeng និង Wen Junhui (SEVENTEEN’s Jun) ៕




















































Account
Security
Favourite Content