ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
នៅថ្ងៃទី៨ ខែវិច្ឆិកាកន្លងទៅ Netflix បានបញ្ចេញខ្សែភាពយន្ដភាគកូរ៉េថ្មីមួយមានចំណងជើងថា “Mr. Palnkton” ដែលធ្វើឱ្យផ្ទុះការចាប់អារម្មណ៍យ៉ាងរហ័សទាំងក្នុង និងក្រៅប្រទេសរហូតដល់ហក់ឡើងចូលចំណាត់ថ្នាក់កំពូលរឿងទាំង ១០ ក្នុងប្រភេទរឿងដែលមិនមែនភាសាអង់គ្លេសផងដែរ។
យោងតាមក្រុមហ៊ុន Netflix កាលពីថ្ងៃទី២១ ខែវិច្ឆិកា សេរ៊ីរឿងមួយនេះបានជាប់ចំណាត់ថ្នាក់លេខ ៥ ក្នុងបញ្ជីកំពូលរឿងទាំង ១០ ដែលមិនមែនជាភាសាអង់គ្លេសសម្រាប់សប្ដាហ៍ទីបីនៃខែវិច្ឆិកាដោយផ្អែកទៅលើទិន្នន័យចំនួនអ្នកទស្សនាជាក់ស្ដែង។ មិនត្រឹមប៉ុណ្ណេះ “Mr. Plankton” ក៏បានឈានចូលទៅក្នុងចំណាត់ថ្នាក់លេខ ១០ ក្នុងចំណោម ៤២ ប្រទេសរួមទាំងកូរ៉េខាងត្បូងជាខ្សែភាពយន្ដដែលទទួលបានការសាទរជាសកលយ៉ាងលើសលប់ក្នុងរយៈពេលត្រឹមពីរសប្ដាហ៍នៃការចាក់បញ្ចាំងរបស់ខ្លួន។
រឿង “Mr. Plankton” គឺជាខ្សែភាពយន្ដកំប្លែងបែបមនោសញ្ចេតនាមានចំនួន ១០ ភាគដោយមានតួឯកប្រុស Hae Jo សម្ដែងដោយតារាប្រុស Woo Do Hwan និងតួឯកស្រី Jae Mi សម្ដែងដោយតារាស្រី Lee Yoo Mi ព្រមទាំងតួល្បីៗជាច្រើនទៀតដូចជា Oh Jung Se និង Kim Hae Sook ដែលធ្វើឱ្យរឿងភាគមួយនេះកាន់តែមានគុណភាពបន្ថែមទៀត។
ពាក្យ Plankton ជាភាសាក្រិកមានន័យថា “មនុស្សរសាត់” ឬ ”មនុស្សវង្វេង”។ បើនៅក្នុងធម្មជាតិ Plankton គឺជាសារពាង្គកាយអកម្មតូចដែលរសាត់តាមទឹក ហើយក៏ស្ថិតនៅជួរទាបបំផុតក្នុងសង្វាក់អាហារផងដែរ។ យោងតាមការបំផុសដោយគំនិតនេះ អ្នកនិពន្ធ Jo Yong បានបន្ថែមពាក្យ “Mr. Plankton” ដើម្បីបង្កប់នូវចរិតរបស់តួឯកប្រុស Hae Jo ដែលជាបុរសម្នាក់រស់នៅក្នុងភាពទទេស្អាត គ្មានសុបិន គ្មានបំណងប្រាថ្នា ថែមទាំងមិនបានទទួលក្ដីស្រឡាញ់ពិត ឬការយកចិត្តទុកដាក់ពីអ្នកណាម្នាក់ឡើយ ដោយជីវិតរបស់លោកប្រៀបដូចជា plankton រសាត់អណ្ដែតគ្មានគោលដៅ។ ប៉ុន្តែក្រោយមកលោកក៏បានជួបជាមួយតួឯកស្រី Jae Mi ជាមនុស្សស្រីសំណាងអាក្រក់បំផុត តែបែរជាអាចធ្វើឱ្យលោកចាប់ផ្ដើមមើលឃើញពីអនាគតដ៏ត្រចះត្រចង់ បន្ទាប់ពីអ្នកទាំងពីរបានឆ្លងកាត់រឿងរ៉ាវជាមួយគ្នាជាច្រើន។
អ្វីដែលគួរឱ្យចាប់អារម្មណ៍កាន់តែខ្លាំងបន្ថែមទៅទៀតនោះ សេរ៊ីរឿង “Mr. Plankton” បានបង្កប់នូវសារដ៏ជ្រាលជ្រៅមួយជូនអ្នកគាំទ្រ ខណៈពេល plankton មើលទៅហាក់ដូចជាមិនសំខាន់ហើយរសាត់អណ្ដែតតាមទឹកមែន ប៉ុន្តែការផលិតអុកស៊ីសែនរបស់ពួកគេមានសារៈសំខាន់ណាស់សម្រាប់ប្រព័ន្ធអេកូឡូស៊ីរបស់ផែនដី ដែលនេះបានបញ្ជាក់យ៉ាងច្បាស់អំពីតម្លៃដ៏ពិតប្រាកដរបស់ plankton។ ហេតុនេះហើយទើបអ្នកនិពន្ធបានប្រើពាក្យនេះដើម្បីប្រៀបធៀប និងបង្ហាញតាមរយៈតួអង្គថា “គ្មានអ្វីដែលមានមិនមានតម្លៃឡើយនៅក្នុងពិភពលោក”។
តាមរយៈខ្សែភាពយន្ដមួយនេះ លោកក៏ចង់ឱ្យទស្សនិកជនបានយល់អំពីការតស៊ូជម្នះនៅក្នុងភាពវង្វេង ការឈឺចាប់ និងភាពទទេរស្អាតរបស់ជីវិតមនុស្សម្នាក់ៗដើម្បីស្វែងរកគោលបំណង និងអត្ថន័យពិតក្នុងជីវិត។ បូករួមជាមួយអត្ថបទសាច់រឿង និងការសម្ដែងដ៏អស្ចារ្យរបស់តារាសម្ដែងប្រុសស្រីល្បីៗបន្ថែមទៀត កាន់តែធ្វើឱ្យ “Mr. Plankton” ទទួលបានការគាំទ្រខ្លាំងឡើងៗនៅទួទាំងពិភពលោក។ ជាពិសេសវាមិនត្រឹមតែផ្ដល់ឱ្យអ្នកទស្សនាមើលជាការកម្សាន្ដប៉ុណ្ណោះទេ ប៉ុន្តែថែមទាំងផ្ដល់នូវបទពិសោធន៍ និងមេរៀនជីវិតល្អៗដល់ទស្សនិកជនទៀតផង ៕
Account
Security
Favourite Content