KBS បានចេញមុខបកស្រាយទៅលើការរិះគន់លើហេតុការណ៍ដែលក្រុមការងារផលិតរឿងភាគថ្មី The First Night with the Duke បានបំផ្លិចបំផ្លាញសំណង់អគារបេតិកភណ្ឌពិភពលោក Byeongsanseowon Confucian Academy តាមរយៈការដំដែកគោលចូលទៅក្នុងសសរ។
ដើមហេតុនៃការបកស្រាយនេះ ត្រូវត្រឡប់ទៅកាលពីថ្ងៃទី៣០ ខែធ្នូ ឆ្នាំ២០២៤វិញ នៅពេលដែលភ្ញៀវទេសចរដែលប្រកបអាជីពជាស្ថាបត្យករម្នាក់បានចែករំលែកពីកង្វល់របស់ខ្លួននៅលើបណ្ដាញទំនាក់ទំនងសង្គម បន្ទាប់ពីលោកសង្កេតឃើញទង្វើមិនគប្បីរបស់ក្រុមការងារ KBS ទៅលើសំណង់អាគារបុរាណ។
លោកបានសរសេររៀបរាប់ថា៖ “នៅពេលដែលខ្ញុំទៅលេងនៅ Byeongsanseowon Confucian Academy នៅរសៀលនេះ ខ្ញុំបានឃើញបុគ្គលិកបានដំដែកគោលទៅក្នុងសសរឈើ ហើយពួកគេបែរជាបង្ហាញអារម្មណ៍ខឹង នៅពេលដែលខ្ញុំព្យាយាមហាមឃាត់”។
អ្នកទេសចររូបដដែលបានបង្ហាញពីមូលហេតុដែលលោកបានតវ៉ាជាមួយនឹងក្រុមការងារ ព្រមជាមួយនឹងកង្វល់ថា៖ “អ្នកខ្លះប្រហែលគិតថា ការដំដែកគោលមិនមែនជារឿងធំដំអីទេ ក៏ប៉ុន្តែសូម្បីតែផ្ទះបែបប្រពៃណីរបស់កូរ៉េ មុននឹងដំដែកគោលមួយៗ គេត្រូវគិតពិចារណាឱ្យគ្រប់ជ្រុងជ្រោយមែនទែន។ ចុះទម្រាំតែទីតាំងបេតិកភណ្ឌ ការប្រុងប្រយ័ត្នគួរតែមានជាងនេះ”។
បច្ចុប្បន្នពាក្យបណ្ដឹងនៃរឿងហេតុនេះបានទៅដល់មន្ត្រីជំនាញរួចទៅហើយ ដោយតំណាងពីរដ្ឋបាលបេតិកភណ្ឌជាតិបានប្រាប់ HeraldPOP ថា ត្បិតមានការស្នើសុំសម្រាប់ការថតជាមុនក៏ពិតមែន តែសកម្មភាពនេះជាការបំពានទៅលើសម្បត្តិបេតិកភណ្ឌ ហើយរដ្ឋាភិបាលនៃទីក្រុង Adong និងរដ្ឋបាលបេតិកភណ្ឌជាតិកំពុងតែធ្វើការស៊ើបអង្កេតលើបញ្ហានេះ។
ឆ្លើយតបនឹងកំហុសខាងលើ នៅថ្ងៃទី២ ខែមករានេះ KBS បានចេញលិខិតសុំទោសជាផ្លូវការចំពោះការព្រួយបារម្ភរបស់សាធារណជន។ លិខិតសុំទោសនោះបានសរសេរថា៖ “KBS ទទួលស្គាល់ភាពតានតឹងនៃស្ថានការណ៍ និងសោកស្ដាយយ៉ាងខ្លាំងចំពោះអ្វីដែលបានកើតឡើង។ បច្ចុប្បន្នយើងកំពុងស៊ើបអង្កេតឧប្បត្តិហេតុនេះ និងពិភាក្សាលើវិធីសាស្ត្រដែលល្អបំផុតសម្រាប់ការជួសជុលឡើងវិញ”។
បន្ថែមពីនេះ KBS ក៏បានសន្យា បង្ការកុំឱ្យហេតុការណ៍តែមួយនេះកើតឡើងនៅពេលក្រោយផងដែរ។ ទាក់ទិននឹងបញ្ហាលើកនេះ ស្ថានីយទូរទស្សន៍ខាងលើបានយល់ឃើញថា៖ “វាបានជួយដាស់តឿនពួកយើងឱ្យថ្លឹងថ្លែងឱ្យបានល្អិតល្អន់រវាងកិច្ចការពារបេតិកភណ្ឌវប្បធម៌ និងការងារក្នុងវិស័យច្នៃប្រតិដ្ឋ”។
គួរបញ្ជាក់ផងដែរថា Byeongsanseowon Confucian Academy ជាទីតាំងប្រវត្តិសាស្រ្តមួយដ៏សំខាន់នៅក្នុងប្រទេសកូរ៉េខាងត្បូង។ ដំបូងឡើយទីតាំងនៃសាលាដ៏ចំណាស់មួយនេះមិនបានស្ថិតនៅក្នុងទីតាំងដូចគ្រាបច្ចុប្បន្ននោះទេ លុះមកដល់រជ្ជកាលស្តេច Seonjo ក្នុងឆ្នាំ១៥៧២ អ្នកប្រាជ្ញល្បីឈ្មោះ Yu Seong-ryonng បានសម្រេចផ្លាស់ប្ដូរទីតាំងសាលានេះមកកាន់ទីក្រុង Andong រហូតដល់សព្វថ្ងៃនេះ។
Byeongsan Seowon Confucian Academy ត្រូវបានបញ្ចូលទៅក្នុងបញ្ជីបេតិកភណ្ឌពិភពលោករបស់អង្គការយូណេស្កូនៅថ្ងៃទី ៦ ខែកក្កដា ឆ្នាំ ២០១៩ ក្នុងនាមជាផ្នែកមួយនៃ “Seowon, Korean Confucian Academies” ដែលមានសរុបចំនួន ៩ ទីតាំងផ្សេងគ្នា៕