បើទោះបីភាពយន្តជាវគ្គបន្តនៃសែស្រលាយភាពយន្តល្បីៗភាគច្រើនអាចរកចំណូលបានលើសលប់ ប៉ុន្តែក៏មិនប្រាកដថាភាពយន្តបែបវគ្គបន្តទាំងអស់សុទ្ធតែជោគជ័យនោះដែរ។
ជាក់ស្ដែងភាពយន្ត “Joker” ដែលទទួលបានជោគជ័យកប់ពពកកាលពីឆ្នាំ២០១៩ បានចេញវគ្គ២នៅឆ្នាំ២០២៤មានចំណងជើងថា “Joker: Folie a Deux” ដោយបន្ថែមតារាចម្រៀង Lady Gaga ជាតួអង្គសំខាន់ម្នាក់ទៀត ប៉ុន្តែអាចរកចំណូលសរុបបានត្រឹមតែ ២០៦ លានដុល្លារប៉ុណ្ណោះ ខណៈដើមទុនផលិតត្រូវបានរាយការណ៍ថាមានការចំណាយរហូតដល់ ៣០០ លានដុល្លារ។ មូលហេតុមួយផ្នែកនៃភាពបរាជ័យត្រូវបានគេសន្និដ្ឋានថាដោយសារការកែប្រែភាពយន្តទៅជាប្រភេទល្ខោនតន្ត្រី និងការដំណើរសាច់រឿងខុសពីអ្វីដែលទស្សនិកជនចង់បាន។
ភាពយន្តខាតទុនធ្ងន់ធ្ងរមួយរឿងទៀតក្នុងឆ្នាំនេះគឺភាពយន្តវិទ្យាសាស្ត្រ “Coppola” សម្ដែងដោយតារាប្រុស Adam Driver ដែលចំណាយដើទុនផលិតអស់ ១២០ លានដុល្លារ ប៉ុន្តែអាចរកចំណូលត្រលប់មកវិញត្រឹម ១៣,៧ លានដុល្លារប៉ុណ្ណោះពីទូទាំងពិភពលោក។
ភាពយន្តបែបកំប្លែងនិងបាញ់ប្រហារ “The Fall Guy” ដែលសម្ដែងដោយកំពូលតារាប្រុសស្រីពីររូបគឺ Ryan Gosling និងEmily Blunt បានចំណាយដើមទុនផលិតអស់ចន្លោះ ១២៥ ទៅ ១៥០ លានដុល្លារ។ ខណៈរកចំណូលពីការបញ្ចាំងទូទាំងពិភពលោកបានត្រឹម ១៨១ លានដុល្លារ ភាពយន្តនេះធ្វើឱ្យ Universal Pictures ខាតទុនមិនក្រោម ៥០ លានដុល្លារនោះទេបន្ទាប់ពីគិតរួមទាំងការចំណាយលើការផ្សព្វផ្សាយនិងចែកភាគរយជាមួយរងកុន។
មួយទៀតគឺភាពយន្តមនុស្សពីងពាងស្រី “Madame Web” ដែលសម្ដែងដោយ Dakota Johnson អាចរកចំណូលបាន ១០០ លានដុល្លារជុំវិញពិភពលោក បន្ទាប់ពីចំណាយដើមទុនផលិតប្រមាណ ១០០ លានដុល្លារដែរ ដែលមិនចាត់ទុកថារួចដើមដូចគ្នាបើដកថ្លៃភាគរយជាមួយរោងកុននិងការធ្វើទីផ្សារ។
ភាពយន្តខាតទុនមហាសាលមួយទៀតប្រចាំឆ្នាំនេះគឺភាពយន្តភ្នាក់ងារសម្ងាត់បែបកំប្លែង “Argylle” ពីអ្នកដឹកនាំរឿង “The King’s Man” លោក Matthew Vaughn ដែលបានចាយទុនផលិតអស់ ២០០ លានដុល្លារ ប៉ុន្តែអាចរកចំណូលពីការបញ្ចាំងទូទាំងពិភពលោកត្រឹមតែ ៩៦ លានដុល្លារប៉ុណ្ណោះ បើទោះបីមានការចូលរួមសម្ដែងពីតារាល្បីៗជាច្រើនដូចជា Henry Cavill, Dua Lipa, Bryce Dallas Howard និង Sam Rockwell។
រីឯ ភាពយន្ត “Furiosa: A Mad Max Saga” ដែលជាវគ្គថ្មីពីសែស្រឡាយភាពយន្ត “Mad Max” ប៉ុន្តែផ្ដោតលើរឿងរ៉ាវរបស់តួស្រី Furiosa បានចំណាយដើមទុនផលិតអស់ ១៦៨ លានដុល្លារ។ ទោះបីមានការំពឹងទុកខ្ពស់ តែចុងក្រោយភាពយន្តនេះអាចរកចំណូលពីការបញ្ចាំងមកវិញបាន ១៧៣ លានដុល្លារ ដែលទាបជាងភាពយន្ត “Mad Max” មុនៗខ្លាំង។
ចុងក្រោយគឺភាពយន្តបេសកកម្មសង្គ្រោះតាណូអែល “Red One” ដែលសម្ដែងដោយកំពូលតារាពីររូបគឺ Dwayne Johnson និង Chris Evans អាចរកចំណូលបាន ២៨១ លានដុល្លារទូទាំងពិភពលោក ខណៈចំណាយដើមទុនផលិតអស់ដល់ ២៥០ លានដុល្លារ។ យ៉ាងណាក្ដី បើទោះជាបរាជ័យពេលចេញបញ្ចាំងតាមរោងកុន ប៉ុន្តែភាពយន្តនេះបានទទួលជោគជ័យនៅពេលចាក់បញ្ចាំងអនឡាញដោយអាចបំបែកកំណត់ត្រាលើ Prime Video បន្ទាប់ពីទទួលបានការបង់លុយចូលទស្សនា ៥០ លានដង ៕