ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ការឈានជើងចូលក្នុងបន្ទប់ប្រជុំដែលមានសុទ្ធតែថ្នាក់ដឹកនាំ ឬអតិថិជនសំខាន់ៗ អាចធ្វើឱ្យមនុស្សជាច្រើនមានអារម្មណ៍ភ័យអររហូតធ្វើខ្លួនមិនត្រូវ។ ប៉ុន្តែទំនុកចិត្តពិតប្រាកដមិនមែនបានមកពីសម្លៀកបំពាក់ដែលមានតម្លៃថ្លៃ ឬការតែងខ្លួនលេចធ្លោនោះទេ តែវាជាទំនុកចិត្តដែលជះចេញពីខាងក្នុង។
ថ្ងៃនេះ AMS សូមណែនាំនូវគន្លឹះសំខាន់ៗចំនួន ៦ ដើម្បីបង្កើនទំនុកចិត្តពីខាងក្នុង ដែលនឹងជួយឱ្យអ្នកមានភាពលេចធ្លោក្នុងនាមជាអ្នកជំនាញ រាល់ពេលប្រជុំម្ដងៗ៖
១. ត្រៀមខ្លឹមសារឱ្យបានច្បាស់លាស់
ភាពភ័យព្រួយភាគច្រើន អាចកើតចេញពីការមិនចាំ ឬមិនប្រាកដចិត្តចំពោះព័ត៌មានដែលអ្នកត្រៀមធ្វើបទបង្ហាញ។ អ្នកគួរចំណាយពេលរំឭកចំណុចសំខាន់ៗ និងត្រៀមចម្លើយសម្រាប់សំណួរដែលអាចនឹងត្រូវសួរដោយក្រុមការងារ ឬអតិថិជន។
នៅពេលដែលអ្នកដឹងច្បាស់ពីអ្វីដែលអ្នកកំពុងនិយាយ ទំនុកចិត្តនឹងបញ្ចេញតាមរយៈសម្លេង និងក្រសែភ្នែកដោយស្វ័យប្រវត្តិ។ ការប្រាកដចិត្តចំពោះខ្លឹមសារដែលអ្នកត្រូវធ្វើបទបង្ហាញ គឺជាមូលដ្ឋានគ្រឹះដ៏សំខាន់ក្នុងការបង្កើនទំនុកចិត្ត។
២. កែលម្អបុគ្គលិកលក្ខណៈតាមរយៈភាសាកាយ
មុនពេលចូលប្រជុំ អ្នកគួរសាកល្បងពិនិត្យមើលរបៀបអង្គុយ ឬឈររបស់ខ្លួនឯង។ អ្នកគួរព្យាយាមអង្គុយឱ្យត្រង់ខ្នង និងមិនឱបដៃ។ ភាសាកាយល្អ គឺជាទំនុកចិត្តមួយ ដែលនឹងបញ្ជូនសញ្ញាទៅកាន់ខួរក្បាលថា អ្នកកំពុងគ្រប់គ្រងស្ថានការណ៍បានល្អ។ ទន្ទឹមគ្នានេះ វាក៏ធ្វើឱ្យអ្នកចូលរួមប្រជុំមានអារម្មណ៍ថា អ្នកគឺជាមនុស្សដែលគួរឱ្យទុកចិត្ត និងត្រៀមខ្លួនជានិច្ចក្នុងការទទួលយកមតិយោបល់ថ្មីៗ។
៣. សម្លឹងមើលអ្នកចូលរួមចំៗ
ការសម្លឹងភ្នែកអ្នកដទៃចំៗ (Eye Contact) គឺជាការបង្ហាញពីភាពស្មោះត្រង់ និងទំនុកចិត្តរបស់ខ្លួនអ្នក។ អ្នកគួរហ្វឹកហាត់សម្លឹងភ្នែកជាមួយអ្នកស្តាប់ មិនត្រូវសម្លឹងមើលតែពិដាន ឬសម្លឹងមើលទៅក្រោមយូរពេកនោះទេ។ ការសម្លឹងភ្នែកក្នុងកម្រិតសមល្មម នឹងជួយផ្សារភ្ជាប់ទំនាក់ទំនងរវាងអ្នក និងអ្នកស្តាប់ ធ្វើឱ្យសម្ដីរបស់អ្នកមើលទៅមានទម្ងន់កាន់តែខ្លាំង។
៤. គ្រប់គ្រងសម្លេង និងចង្វាក់នៃការនិយាយ
នៅពេលមានការភ័យអរ មនុស្សជាច្រើនតែងតែនិយាយលឿនពេករហូតស្តាប់មិនយល់។ ដូច្នេះ អ្នកគួរសាកល្បងហាត់និយាយឱ្យយឺតជាងមុន និងសង្កត់ពាក្យត្រង់កន្លែងដែលសំខាន់។ ការផ្អាកដកដង្ហើមឱ្យត្រូវចង្វាក់ នឹងជួយឱ្យអ្នកមើលទៅមានភាពហ្មត់ចត់ និងមានលក្ខណៈជាអ្នកដឹកនាំ ខណៈសំឡេងដែលនឹងនរ និងច្បាស់លាស់ ក៏ជួយឱ្យមនុស្សពេញមួយបន្ទប់យកចិត្តទុកដាក់ស្តាប់នូវអ្វីដែលអ្នកកំពុងចែករំលែក។
៥. តុបតែងខ្លួនដើម្បីជួយបង្កើនថាមពល
ទោះបីជាទំនុកចិត្តមកពីខាងក្នុងគឺជារឿងសំខាន់បំផុតក៏ដោយ ប៉ុន្តែការស្លៀកសម្លៀកបំពាក់ដែលសមល្មម ស្អាតបាត មិនចាំទាល់តែថ្លៃនោះទេ នឹងជួយរុញទំនុកចិត្តរបស់អ្នកឱ្យកាន់តែខ្ពស់បន្ថែមទៀត។ ការជ្រើសរើសស្លៀកពាក់ឱ្យមានរបៀបរៀបរយ នឹងជួយឱ្យអ្នកមានអារម្មណ៍ថា ខ្លួនឯងត្រៀមខ្លួនបានរួចរាល់សម្រាប់កិច្ចប្រជុំនេះ ខណៈវាក៏អាចទាក់ទាញការចាប់អារម្មណ៍ពីអ្នកនៅក្នុងបន្ទប់ប្រជុំផងដែរ។
៦. គិតវិជ្ជមាន និងលើកទឹកចិត្តខ្លួនឯងមុនពេលចាប់ផ្តើម
មុនពេលដើរចូលបន្ទប់ប្រជុំ សាកល្បងចំណាយពេល ១ នាទីបិទភ្នែក ហើយស្រមៃទៅដល់ភាពជោគជ័យក្នុងកិច្ចការនេះ។ ការប្រាប់ខ្លួនឯងថា “ខ្ញុំអាចធ្វើបាន” ឬ “ខ្ញុំបានត្រៀមខ្លួនមកយ៉ាងល្អហើយ” គឺជាការលើកទឹកចិត្តខ្លួនឯងមួយ ដែលអាចកាត់បន្ថយសម្ពាធ និងជួយឱ្យអ្នកអាចគ្រប់គ្រងស្ថានការណ៍បានយ៉ាងល្អ។
គួរឱ្យដឹងថា ទំនុកចិត្តមិនមែនជាអ្វីដែលអាចបង្កើតឡើងក្នុងពេលត្រឹមតែមួយយប់នោះទេ ប៉ុន្តែវាគឺជាជំនាញដែលទាមទារឱ្យអ្នកត្រូវហ្វឹកហាត់ និងជាបទពិសោធន៍ដែលត្រូវសន្សំម្ដងបន្តិចៗ។ វិធីបង្កើនទំនុកចិត្តដែលទទួលបានផលបំផុត គឺការជឿជាក់លើសក្ដានុពលរបស់ខ្លួនឯង។ នៅពេលដែលអ្នកជឿជាក់លើខ្លួនឯង មិនថានៅក្នុងបន្ទប់ប្រជុំ ឬស្ថានការណ៍ដ៏លំបាកយ៉ាងណាក៏ដោយ អ្នកនឹងអាចឆ្លងកាត់វាបានយ៉ាងរលូនជានិច្ច៕
Account
Security
Favourite Content