ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
នៅព្រឹកថ្ងៃទី២២ ខែកុម្ភៈ ឆ្នាំ ២០២៣ នេះ លោក ហ្វៃ សំអាង អ្នកនិពន្ធ និងជាអ្នកដឹកនាំរឿងជើងចាស់ដ៏ល្បីល្បាញ បានរៀបចំពិធីក្រុងពាលីចេញថតរឿងភាគប្រវត្តិសាស្ត្រខ្មែរដំបូងបង្អស់ ចំណងជើង «អប្សរាមហាអង្គរ» ដែលជាវណ្ណកម្មថ្មីរបស់ទូរទស្សន៍ហង្សមាស។
ថ្លែងក្នុងពីធីក្រុងពាលីរឿង «អប្សរាមហាអង្គរ» លោក ហ្វៃ សំអាង ថា «អប្សរាមហាអង្គរ» ជារឿងភាគប្រវត្តិសាស្ត្រខ្មែរដំបូងបង្អស់ ដែលនឹងឆ្លុះបញ្ចាំងពីវប្បធម៌ អរិយធម៌ ភាពរុងរឿងរបស់ខ្មែរកាលពីសម័យបុរាណ ហើយរឿងភាគបុរាណមួយនេះ ជាគំនិតច្នៃប្រឌិតបែបប្រវត្តិសាស្ត្រ ដែលចំណាយពេលតែងនិពន្ធដល់ទៅ ៣ ឆ្នាំ ទើបកើតចេញជាសាច់រឿងមួយនេះ។ ទៀតសោត រឿងភាគបុរាណខ្នាតធំនេះ ក៏នឹងលាតត្រដាងពីភាពរីកចម្រើនរបស់នគរខ្មែរនាសម័យអង្គរដូចជាការប្រឡងជ្រើសរើសបណ្ឌិតអក្សរសាស្ត្រនៃព្រះនគរ និងភាពរីកចម្រើនផ្នែកសុខាភិបាលនាសម័យនោះ ជាដើម។
ចំណុចពិបាកបំផុតក្នុងរឿងនេះ គឺការជ្រើសរើសសម្លៀកបំពាក់ និងគ្រឿងអលង្ការ ព្រោះតួនីមួយៗតុបតែងកាយខុសៗគ្នា ជាពិសេសតួប្រជាជនតែម្តង។ ដូច្នេះ ដើម្បីឱ្យសាច់រឿងចេញមកដូចពិតៗ លោកត្រូវសិក្សាស្រាវជ្រាវពីផ្ទាំងសិលាចាស់ៗ និងឯកសារប្រវត្តិសាស្ត្រដែលយើងមាន ទើបចេញជាសមិទ្ធផលដូចអ្វីដែលបានឃើញនៅពេលនេះ។
ដោយឡែក សម្រាប់តួអង្គសម្តែងវិញនោះ គឺមានរហូតដល់ជាង ១០០ នាក់ សូម្បីតារាសម្តែងស្រីដ៏ល្បីអំឡុងទសវត្សរ៍ឆ្នាំ ៨០-៩០ អ្នកស្រី អម្ពរ ទេវី និងអតីតតារាសម្តែងជំនាន់ អ្នកស្រី នារី រ័ត្នគន្ធា ក៏លោកអញ្ញើញឱ្យចូលរួមសម្តែងក្នុងរឿង «អប្សរាមហាអង្គរ» ផងដែរ។ ក្រៅពីនោះ ក៏នៅមានតួអង្គសំខាន់ៗជាច្រើនទៀតដែលនឹងចូលរួមសម្តែងក្នុងរឿងភាគបុរាណនេះ។
អ្នកដឹកនាំរឿងនេះសង្កត់ធ្ងន់ថា តួអង្គប្រុស-ស្រីដែលជ្រើសមកសម្តែងរឿងនេះ ត្រូវជ្រើសរើសមកយ៉ាងសម្រិតសម្រាំង ដោយតួអង្គប្រុសៗត្រូវកំណត់កម្ពស់ស្តង់ដារ មើលទៅបែបបុរសនាសម័យអង្គរ ហើយតម្រូវឱ្យមានសាច់ដុំមាំមួន និងត្រូវហាត់រៀនក្បាច់គុនល្បុក្កតោខ្មែរថែមទៀតផង ព្រោះតួអង្គខ្លះត្រូវប្រើប្រាស់ក្បាច់គុនល្បុក្កតោ។ ចំណែក តួអង្គស្រីៗវិញនោះ ត្រូវមានរូបសម្រស់ស្រស់ផូរផង់ស័ក្តិសមតួអង្គដែលត្រូវសម្តែង និងត្រូវហាត់រៀនរាំរបាំអប្សរាផងដែរ។
សូមជម្រាបថា តួអង្គដែលនឹងចូលរួមសម្តែងក្នុងរឿងនេះរួមមាន លោក ទេព រិនដារ៉ូ អ្នកនាង សារ៉ាយ សក្កណា លោក យិត មាសឧស្សាហ៍ លោក ពៅ ពិសិដ្ឋ លោក រស់ សុភ័ណ្ឌ លោក សន ពិសិដ្ឋ លោក ឈឹម សក្កដា កញ្ញា ពេជ្រ វត្តីសារ៉ាវឌ្ឍី អ្នកនាង កែវ ឡាវីញ កញ្ញា ប៊ី សុធារី កញ្ញា ប៉ូ គឹមថេងសុតធីតា កញ្ញញ ស៊ឹម ស្រីនិច្ច អ្នកនាង លី ម៉ារីណា តារាកំប្លែងនាយកុយ តារាកំប្លែងគ្រត និងតារាកិត្តិយសជាច្រើននាក់ផ្សេងទៀត។
តាមការបញ្ជាក់របស់អ្នកនិពន្ធ និងអ្នកដឹកនាំរឿង ហ្វៃ សំអាង រឿងនេះអាចនឹងប្រើរយៈពេលថតយូរ ព្រោះត្រូវសម្រិតសម្រាំងខ្លាំង និងត្រូវថតនៅទីតាំងជាច្រើនកន្លែងក្នុងប្រទេសកម្ពុជា។ ដ្បិតមិនបើកបង្ហាញខ្ទង់ចំណាយជាក់លាក់ ប៉ុន្តែគេអាចដឹងថារឿងនេះចំណាយទុនផលិតច្រើនខ្លាំងមិនធ្លាប់មានពីមុនមកនោះឡើយ៕
Account
Security
Favourite Content