នាព្រឹកថ្ងៃទី ១០ ខែឧសភា ឆ្នាំ ២០២៣ នេះសហព័ន្ធកីឡាជឺជីតស៊ូកម្ពុជា បានបង្ហាញឲ្យដឹងពីការបំផុសគំនិតនៃការរចនាអាវប្រកួត (Rashguard) របស់ក្រុមជម្រើសជាតិជឺជីតស៊ូ។
សហព័ន្ធកីឡាជឺជីតស៊ូកម្ពុជាបានឲ្យដឹងថា «ផ្អែកលើចម្លាក់ជញ្ជាំងដែលរកឃើញនៅត្រើយខាងកើតនៃប្រាសាទអង្គរវត្ត ដែលបានច្នៃប្រឌិត ដោយវិចិត្រករផ្សេងៗគ្នា ហើយទីបំផុតបានច្នៃទៅជា Rashguard ដ៏អស្ចារ្យដែលរចនាដោយវិចិត្រករ Chifumi»។
សេចក្តីប្រកាសដដែលនេះក៏បានបញ្ជាក់ថា អាវនេះ (Rashguard) ក៏ត្រូវបានពាក់ចូលទីលានប្រកួត ដោយកីឡាការិនី ខាន់ ជេសា ក្នុងការប្រកួតវិញ្ញាសារ Ne-Waza NOGI ទម្ងន់ ៥២ គីឡូក្រាម ក្នុងព្រឹត្តិការណ៍ប្រកួតកីឡាស៊ីហ្គេមលើកទី ៣២ កម្ពុជា។
ជាមួយគ្នានេះដែរ សហព័ន្ធបានបញ្ជាក់បន្ថែមថា ចាប់ពីសប្តាហ៍ក្រោយទៅ សហព័ន្ធនឹងចាប់ផ្តើមលក់ អាវពណ៌ខ្មៅសម្រាប់អ្នកគាំទ្រ។
ចំណែកឯ ប្រាក់ចំណេញដែលទទួលបានពីការលក់អាវទាំងអស់នឹងត្រូវបញ្ចូលក្នុងមូលនិធិសហព័ន្ធកីឡាជឺជីតស៊ូកម្ពុជា ក្នុងគោលបំណងប្រើប្រាស់ ដើម្បីពង្រីកកិច្ចខិតខំប្រឹងប្រែងរបស់មន្ត្រីសហព័ន្ធនិងលើកកម្ពស់ អភិវឌ្ឍន៍ សមត្ថភាពកីឡាករកីឡាការិនី ឲ្យបានកាន់តែប្រសើមួយកម្រិតទៀត៕