ការថែរក្សាសុខភាពគឺជាកត្តាចម្បងដែលទាមទារឱ្យមនុស្សសព្វថ្ងៃថែទាំដោយមានការប្រុងប្រយ័ត្ន។ ស្របពេលនេះ សុខភាពខួរក្បាលក៏ជាចំណែកមួយដែលយើងមិនគួររំលងដែរ។ ដូច្នេះថ្ងៃនេះយើងសូមណែនាំនូវបន្លែ៣ មុខដែលជួយខួរក្បាល ជំនួយការចងចាំ៖
១.បន្លែស្លឹកបៃតង
បន្លែស្លឹកបៃតងដូចជា ខាត់ណា ស្ពៃ ឬសាឡាដត្រូវបានគេចាត់ទុកជាបន្លែល្អសម្រាប់សុខភាពខួរក្បាល។ វាសម្បូរទៅដោយវីតាមីន E វីតាមីន K បេតាការ៉ូទីន សារធាតុ folate និង lutein អាចជួយការពារការបាត់បង់ការចងចាំ និងធ្វើអោយប្រសើរនៃដំណើរការប្រព័ន្ធខួរក្បាល។ មិនតែប៉ុណ្ណោះ វាក៏មានសារធាតុប្រឆាំងអុកស៊ីតកម្មដើម្បីជួយប្រឆាំងនឹងការខូចខាតកោសិកានៅក្នុងរាងកាយ និងធ្វើឱ្យរាងកាយរឹងមាំផងដែរ។
២.ប្រូខូលី
ប្រូខូលីសម្បូរដោយវីតាមីន K ខ្ពស់ដែលរួមចំណែកដល់ការកែលម្អប្រព័ន្ធខួរក្បាល និងការចងចាំរបស់យើង។ ជាមួយគ្នានេះ វាក៏មាននូវសារធាតុប្រឆាំងអុកស៊ីតកម្មដែលអាចជួយការពារខួរក្បាលពីការខូចខាត។ លើសពីនេះ វីតាមីន C និង flavonoids ដែលនៅក្នុងផ្កាខាត់ណាខៀវក៏អាចជួយដល់សុខភាពខួរក្បាលរបស់យើងបានមួយកម្រិតទៀតផងដែរ។
៣.រមៀត
រមៀតមានសារធាតុ Curcumin ដែលមានប្រយោជន៍ដល់កោសិកាខួរក្បាល ជំនួយការចងចាំ ជាពិសេសល្អចំពោះអ្នកជំងឺ Alzheimer (វង្វេង)។ មិនតែប៉ុណ្ណោះ វាក៏អាចជួយបន្ថយការធ្លាក់ទឹកចិត្តផងដែរដោយសារតែcurcumin នឹងបង្កើន serotonin និង dopamine ដែលជាសារធាតុជួយធ្វើឱ្យអារម្មណ៍របស់យើងកាន់តែប្រសើរឡើង និងការលូតលាស់នៃកោសិកាខួរក្បាលថ្មីផងដែរ៕