គណៈកម្មការរៀបចំបុណ្យជាតិ នៃព្រះរាជាណាចក្រកម្ពុជា អាក់ខាននៅក្នុងការរៀបចំព្រះរាជពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ អស់រយៈពេលជាង១០ឆ្នាំមកហើយ ដោយសារវិបត្តិផ្សេងៗដូចជាគ្រោះទឹកជំនន់ និងបញ្ហារាលដាលជំងឺកូវីដ ១៩ជាដើម។ ពេលនេះព្រះរាជពិធីបុណ្យដ៏ធំបំផុតប្រចាំប្រទេសកម្ពុជា បានវិលត្រឡប់មកវិញហើយ និងត្រៀមប្រារព្ធឡើងយ៉ាងអធឹកអធមជាងបណ្ដាឆ្នាំណាៗទាំងអស់។
ជាក់ស្ដែងតាមរូបភាពមួយចំនួនពីទំព័រហ្វេសប៊ុកផេក នាយកដ្ឋានព័ត៌មាន នៃទូរទស្សន៍ជាតិកម្ពុជា បានបង្ហាញនូវទិដ្ឋភាពការរៀបចំដំឡើងប្រទីប នៃស្ថាប័នបរដ្ឋាភិបាល តាមបណ្ដាក្រសួង កំពុងបង្ហាញខ្លួនយ៉ាងត្រៀបត្រាលើផ្ទៃទន្លេចតុមុខ។ ប្រជាពលរដ្ឋគ្រប់រូបហាក់មានអារម្មណ៍រំភើបរីករាយក្រៃលែង ដែលបានឃើញរូបភាពបែបនេះកើតឡើងម្ដងទៀត បន្ទាប់អាក់ខានក្នុងការរៀបចំជាយូរមកហើយ។
ទូរទស្សន៍ជាតិ នៃកម្ពុជា បានបង្ហាញពីសកម្មភាពក្រុមការងារបាននឹងកំពុងរៀបចំដំឡើងប្រទីប ដើម្បីត្រៀមក្នុងការបណ្ដែតនៅក្នុង ព្រះរាជពិធីបុណ្យអុំទូក នៅថ្ងៃទី ២៦-២៧ និង ២៨ ខែវិច្ឆិកា ឆ្នាំ ២០២៣ខាងមុខនេះនៅរាជធានីភ្នំពេញ ព្រះរាជាណាចក្រកម្ពុជា។ ក្នុងនោះ ប្រទីបមួយជាមធ្យមត្រូវចំណាយអំពូលចន្លោះពី ៥ម៉ឺន ទៅ ៧ម៉ឺនគ្រាប់សម្រាប់ការតុបតែង ហើយចំណាយថវិកាប្រមាណជាង ៨ម៉ឺនដុល្លារសហរដ្ឋអាមេរិកក្នុងមួយប្រទីប៕